Read SEBR SÕNGO, 1998 Sɩngrẽ 11 Bible Online

Sɩngrẽ 11 - SEBR SÕNGO, 1998 bible

Sɩngrẽ 11

¹Neba fãa da yaa zelem yɛnga tɩ b goama ya goam yɛnga.

²La yaang sẽnegã neba gõome n wa yãe tẽn-nabre n tɩ n kẽ, yaa Sinear tẽn-nabre.

³B yeela taaba: «Wa-y tɩ d wẽ tãn-koɛɛm n wʋme.» La tãn-koɛɛm n yɩ b kug tɩ tãn-sũud yɩ tãn-fãoodem.

⁴B yeelame: «D me tẽng a ye la d yals gaosg a pʋgẽ. Yaa gaosg sẽn na n lug n tãag saaga. D tʋm n bao yʋʋre la d kell n pa zĩ yɛng la d da sẽeg moog ye.»

⁵Soaala-Wẽnd sigame n ges tẽngã la gaosgã b sẽn me wã.

⁶B yeelame: «Ade, b lagma taab n ya buud a ye tɩ b zelemd me yaa a ye; la nan yaa b tʋʋma sɩngre; d nee tagsg ning sẽn be b sũurẽ, bũmb ka le tõe n yɩ toog ne b ye.

⁷Wa-y tɩ d sig n kalem b goama tɩ b da le wʋm taab ye.»

⁸La Soaala-Wẽnd sẽega ninsaalb zĩis fãa, dũni pʋgẽ la tẽnga ka tõog n me n baas ye.

⁹Yaa rẽ yĩng la b boond tẽn-kãng tɩ Babɛl tɩ yaa zĩ-kãng la Soaala kalem zɛlma la b sẽeg ninsaalba zĩis fãa tẽng zugu.

¹⁰A Sɛm doog la woto: a Sɛm yʋʋm sẽn waa n ta koabga, a roga a Arpaksad, ko-kẽenga sẽn loog tɩ yʋʋm a yi.

¹¹A Arpaksad rogem poore, a Sɛm vɩɩnda yʋʋm kobs-nu, n dog kom-dibli la kom-pugli.

¹²A Arpaksad yʋʋm sẽn waa n ta pis-tã la a nu, a roga a Sela.

¹³A Sela rogem poore, a Arpaksad vɩɩnda yʋʋm kobs-naase la a tãabo, n dog kom-dibli la kom-pugli.

¹⁴A Sela yʋʋm sẽn waa n ta pis-tã, a roga a Ebɛr.

¹⁵A Ebɛr rogem poore, a Sela vɩɩnda yʋʋm kobs-naase la a tãabo, n dog kom-dibli la kom-pugli.

¹⁶A Ebɛr yʋʋm sẽn waa n ta pis-tã la a naase, a roga a Pelɛg.

¹⁷A Pelɛg dogem poore, a Ebɛr vɩɩnda yʋʋm kobs-naase la pis-tã, n dog kom-dibli la kom-pugli.

¹⁸A Pelɛg yʋʋm sẽn ta pis-tã, a roga a Rewu.

¹⁹A Rewu dogem poore, a Pelɛg vɩɩnda yʋʋm kobs-yi la a wɛ, n dog kom-dibli la kom-pugli.

²⁰A Rewu yʋʋm sẽn waa n ta pis-tã la a yiibu, a roga a Serug.

²¹A Serug rogem poore, a Rewu vɩɩnda yʋʋm kobs-yi la a yopoe, n dog kom-dibli la kom-pugli.

²²A Serug yʋʋm sẽn waa n ta pis-tã, a roga a Nawor.

²³A Nawor dogem poore, a Serug vɩɩnda yʋʋm kobs-yi, n dog kom-dibli la kom-pugli.

²⁴A Nawor yʋʋm sẽn waa n ta pisi la a wɛ, a roga a Tera.

²⁵A Tera rogem poore, a Nawor vɩɩnda yʋʋm koabg la piig la a wɛ, n dog kom-dibli la kom-pugli.

²⁶A Tera yʋʋm sẽn waa n ta pisopoe, a roga a Abram, a Nawor [39] la a Arã.

²⁷A Tera roog la woto: a Tera n dog a Abram, a Nawor la a Arã; a Arã n dog a Lot.

²⁸A Arã ki-la a ba, a Tera, nugẽ, Kalde rãmb tẽng sẽn boond tɩ Ur.

²⁹A Abram ne a Nawor paama pagba. A Abram pag yʋʋr la a Sarayi t'a Nawor rẽnd boond tɩ Milka. A Milka ne a Yiska ba la a Arã.

³⁰Bãng-y t'a Sarayi da yaa pʋg-kiiri n ka tar biig ye.

³¹A Tera peega a biiga Abram la a yao, a Arã, biig a Lot, n paas a Abram pag a Sarayi n tall-ba n yi Ur, Kalde rãmb tẽnga tɩ b na n dɩk Kanaã tẽng sor. B sẽn ta tẽng a ye b sẽn pʋd tɩ Arã, b ti-la b rot be.

³²A Tera pʋlemd zãng yɩɩ yʋʋm kobs-yi la a nu t'a yaool n ki Arã tẽnga.