Read SEBR SÕNGO, 1998 Sɩngrẽ 13 Bible Online

Sɩngrẽ 13 - SEBR SÕNGO, 1998 bible

Sɩngrẽ 13

¹A Abram yii Ezipt tẽng ne a paga, ne a Lot, ne a sẽn tar fãa la b teesa Negɛb.

²A ra yaa rakãagre n tar bãga la wuba la wanzurf la sãnem.

³A sẽn tar kẽnde, bilf-bilfu, a waa n yii Negɛb n ta Betɛl; n ta a sẽn deng n sig zĩig ninga, Betɛl ne Ayi tẽnsʋka,

⁴n ta a sẽn da me maan-kugrã zĩig ningã. Beene, a yõka Soaala-Wẽnd sɛɛga.

⁵A Lot da tũuda a Abram. Yẽ me ra tara rũmsi, bɛd la bõonego n paas pɛɛl la gãnd sẽn tar n tiid so-toak roto.

⁶Tẽnga ra pa tar tɩ sek a rɩlg bãmb b yiib ye tɩ b paoong ra yaa wʋsgo.

⁷Woto zabr n waa n yik a Abram ne a Lot rũm-kɩɩmba sʋka. Tẽnga ra yaa Kanaã rãmb la Perizitsa tẽnga.

⁸Dẽ la a Abram yeel a Lot: «Zabr bɩ beem da zĩnd maam ne foom tẽnsʋk ye, a ra zĩnd mam dũm-kɩɩmbã la fo rũm-kɩɩmba sʋk ye, tɩ d yaa saam-biisi.

⁹Tẽnga yɛdgame n dɩg d taoore. Wa tɩ d welg taab, fo sã n digd goabga bɩ mam kẽng dɩtgo, fo sã n digd dɩtgo bɩ mam tees goabga.»

¹⁰ [44†] A Lot zẽka a neng n kaag Zʋrdẽ kʋɩlga foolle la a yãeeme t'a gãee ne yamdo. Wakat kãng tɩ Soaala-Wẽnd da nan pa sãam Sodom la Gomor ye. Al n ta Soar, zĩiga ra yaa waa Soaala zẽedo, wa Ezipt tẽnga.

¹¹A Lot yãka Zʋrdẽ bãooga foolle, n tees yaanga. Yaa woto la b welg taaba.

¹²A Abram zĩnda Kanaã tẽnga, t'a Lot pa bãg-faasẽ, n tol n tilg a zak Sodom tẽnga.

¹³Sodom neba da yaool n yaa nin-wẽnse, b da beegda Soaala beegr kãsenga.

¹⁴A Lot sẽn welg ne a Abram bala la Soaala sẽn yeel-a: «Abram, bɩ f zẽk f neng marsã la f yaas f sẽn be zĩig ningã n ges goabg la rɩtgo, yaang la taoore.

¹⁵[45†] Tẽnga fo sẽn ne wã, m na n kõ-a-la foo ne f buudu, tɩ f soog-a wakat buud fãa.

¹⁶F buuda sõor na n paasa wʋsgo wala tẽng bĩisri. Ned ninga sẽn tõe n sõd tẽnga bĩisri, yẽ bal n wat n tõog n sõd f yagense.

¹⁷Aya, yik n saag tẽngã, a woglem la a yalem tɩ m dɩk-a lame n kõ foom!»

¹⁸A Abram yikame n dɩk a teedo n tɩ ti Mambre googo. Tɩ-bɛd wa kʋgs n da be be. Googa pẽe ne Ebrõ. Beene a vigla maan-kugri Soaala-Wẽnd waoogr yĩnga.