Read SEBR SÕNGO, 1998 Sɩngrẽ 17 Bible Online

Sɩngrẽ 17 - SEBR SÕNGO, 1998 bible

Sɩngrẽ 17

¹A Abram yʋʋm sẽn waa n dabd pis-wɛ la a wɛ, Soaala lik-a lame n yeel-a: «Yaa maam la Pãng-Soaba, Wẽnde, kẽn m taoore, yɩ sõng zãnga.

²M na n yõga zood ne foo, m na n kɩtame tɩ f buud lebg zembala.»

³A Abram lʋɩ-la a yãvabga Soaala taoore tɩ b gom ne-a woto:

⁴«Ade, m na n yõga zood ne foom, f na n yɩɩ buud ka tɛk yaaba.

⁵[54†] B kõn le bool-f tɩ Abram ye, yaa Abraam la b na n bool-fo, tɩ rũnna tɛka, m kɩtame tɩ f lebg buud ka tɛk ba.

⁶M na n kɩtame tɩ f buud wek al wʋsgo, m na n kɩtame tɩ f buuda yɩ sags ka tɛka, m na n yiisa dĩm dãmb a pʋgẽ.

⁷[55†] Maam ne foo na n yɩɩ zoodo, la fo loogr poore, m zooda na n paa ne f buudã n ka tol n yãe sɛɛb ye, tɩ m datame n yɩ fo Wẽnde la fo kamba Wẽnde, fo loogr poore.

⁸[56†] M na n kõo foo ne f kamba tẽnga tõre t'a yɩ f soolem daar fãa, la mam na n yɩɩ yãmb Wẽnde.»

⁹La Soaala yeela a Abraam: «Tall m zooda neere, foo ne f buudu, zamaan woo zamaan.

¹⁰[57†] Zood ninga sẽn ka tog n sɛ, maam ne foom la f kamba tẽnsʋkã, zood kãng kaset la woto: kẽes bi-ribl fãa bãongo.

¹¹Bãonga kõom n na n yɩ maam ne yãmb zooda kaseto.

¹²Bi-ribl fãa sẽn dog tɩ dasem maan a nii, bɩ y kẽes-a bãongo; dɩlla, a yaa fo meng biiga, f yamb biiga, sãan biiga, kẽes-a bãongo.

¹³Mam zooda kaset na n zĩnda yãmb yĩngẽ wala bũmb sẽn ka tõe n menem ye.

¹⁴Woto wã, bi-ribl ning fãa sẽn ka kẽ bãongo, b na n yiis-a-la buudẽ t'a zãgsa zooda kaseto.»

¹⁵Soaala-Wẽnd yeela a Abraam: «Da le bool f pagã a Sarayi ye, a yʋʋr lebga Sara.

¹⁶M na n ning-a-la barka, a na doga biig n kõ fo tɩ m ning bi-kãng me barka; a na n doga bu-yalengo, mooga dĩm dãmb na n yi-la a pʋgẽ.»

¹⁷A Abraam lʋɩɩ-la a yãvabga, n pusg laado t'a yeela a sũurẽ: Yʋʋm koabg rao na rog biiga, yʋʋm pis-wɛ pag na le kũm dogem?

¹⁸Ad-a sẽn le yeele: «A Ismayɛl we n kell n zĩnd ne laafi.»

¹⁹Dẽ la Soaala-Wẽnd leok a Abraam: «F paga, a Sara, na n doga biiga tɩ f bool-a t'a Izaak la m na n yõga zood ne yẽndã la a kamba la yaa zood sẽn ka na n zĩnd sɛɛbo.

²⁰Fo sẽn kos bũmb ning a Ismayɛl yĩnga, m deegame, ade, m ningd-a-la barka, yẽ me na n paasame, a na n weka zembala, a na n doga dĩm dãmb piig la a yiibu, a buuda na n yɩɩ bu-kãsenga.

²¹La m zooda yẽ, yaa ne a Izaak la m na n yõge, bi-kãng la f paga na n dog n kõ foo, vẽer wakat kãnga.»

²²La Soaala-Wẽnd sẽn togs b koɛɛg n sɛ, b leba yĩngri n bas a Abraam,

²³t'a Abraam bool a biig a Ismayɛl la kom-dibli fãa sẽn dog a zakẽ bɩ a sẽn da ra b rãmba, la badaar bala a kẽesa rapa fãa bãongo, wala Soaal sẽn da kõ noore.

²⁴A Abraam sẽn waa n kẽ bãong t'a tara yʋʋm pis-wɛ la a wɛ.

²⁵Dẽ t'a Ismayɛl yʋʋm yaa piig la a tãabo.

²⁶A Abraam ne a biig a Ismayɛl kẽe bãong daar a ye.

²⁷Sẽn naag-ba n kẽ bãongã yaa yẽ zak kom-dibli gilli, b ka bak sẽn dog-b zaka pʋga bɩ sãamba sẽn da ne ligd ye.