Read SEBR SÕNGO, 1998 Sɩngrẽ 18 Bible Online

Sɩngrẽ 18 - SEBR SÕNGO, 1998 bible

Sɩngrẽ 18

¹Soaala-Wẽnd lika a Abraam a Mambre kʋgsẽ; a ra zĩ-la a doog noor n kokd pemsem. Zĩiga ra wɩngame.

²[58†] A waa n zẽka a nenga, la ade, rap a tãab n da yɛs a taoore. A sẽn yãend-ba, a wudg n kolgame n wõgemd tẽnga

³n yeel-ba: «M Zu-soaba, m kotame tɩ ning-taab [59] sã n beẽ, bɩ y ra loog n pa yaas bilfr ye.

⁴Bas-y tɩ m tall koom bilf n wa tɩ y waas y nao la y zĩnd maasmẽ n vʋʋse.

⁵Yaas-y ka tɩ m wa ne dɩɩb bilfu, tɩ y na le paam pãng n kẽng taoore; m tẽedame tɩ y raab la boto la y sẽn tũ y yamba nengẽ wã!» Tɩ b leok-a: «Be neere, maan wala f sẽn yeelã.»

⁶A Abraam zoe tao-tao n tɩ yeel a Sara: «Yãk zom nug a tã n nage n dõos miisd var-vare.»

⁷A Abraam meng wudg n kẽnga a bãgrẽ n tɩ bao nag-bil poll sẽn ya sõmbo n kɩs a rakõore t'a reeg n dʋg tao.

⁸A rɩka bĩisim sẽn gũsi, n paas bĩs-naare la nag-bil a sẽn seglã n wa tẽgen sãamba taoore, tɩɩga maasmẽ, la yẽ meng yalsa be.

⁹B sẽn dɩ n sɛ, b sok-a lame: «F pag a Sara bɛɛ?» T'a leoke: «A be-la a roogẽ.»

¹⁰[60†] Sãan a ye yeelame: «M na n lɛɛg n waa vẽer zĩ-lik paalle la ade, f pag a Sara na n paama biiga.» Mik a Sara ra bee yẽ poorẽ bala, a roog noore.

¹¹A Abraam ne a Sara ra kʋʋla wʋsgo; a Sara ra pa le tẽr kiuug pukda taoor bɩ yaang ye;

¹²[61†] Dẽ la a Sara laa a sũurẽ n yetẽ: «M sẽn kʋʋl woto wã m na le tõog n bãng dogem sũ-noogo? M sɩd yẽ sẽ n ka lebg nin-kẽem kʋdre.»

¹³Soaala-Wẽnd yeela a Abraam: «Bõe yĩng la a Sara laa a sũurẽ n yetẽ: ‹M sẽn kʋʋl woto wã m na n yɩɩ wãn n le rog biiga?›

¹⁴[62†] Bõe n be n ya toog ne Wẽnnaam? Vẽere, zĩ-lik paalle, m na le sig f yiri la a Sara na n doga biiga.»

¹⁵A Sara kɩɩsa woto: «Ad-y mam pa la ye.» Rabeem da yõk-a lame. Tɩ Soaala-Wẽnd yeele: «Da kɩɩs ye, f laame sẽ.»

¹⁶Rapa yikame tɩ b na n looge t'a Abraam yãag-b bilfu n tees Sodom sẽnẽ.

¹⁷Soaala yeelame: «M sẽn na n maan bũmb ningã, m tõe n solg-a-la a Abraam bɩ?

¹⁸A Abraam buuda tog n lebga bu-kãsenga, buud sẽn tar pãnga, tɩ tẽng zug buud a taaba tũ yẽ maasem n paam barka.

¹⁹Yẽnda la m yama kẽ yã tɩ m kos-a t'a wilg a kamba la a roogo, tɩ yẽ loogr poore, bɩ b tũ Soaala raabo n maan sẽn zems la sẽn toge tɩ Soaala me tõog n pids b sẽn kãab-a bũmb ningã fãa.»

²⁰Soaala-Wẽnd waa n yeelame: «Ad koɛɛg ning sẽn ningd Sodom la Gomor taala sãta zĩig zãnga; b yel-wẽna labsa.

²¹Togame tɩ m ta n gese b sã n sɩd maana wala m sẽn wʋmd tɩ b gomdã. Sã n pa boto me, m na bãnge.»

²²Neba dɩka Sodom sore. A Abraam da nan ka zãag ne Soaala ye.

²³A pʋs n kolg-b lame n yeel-ba: «Yãmb na sak n naag nin-wẽng ne nin-sõng n kʋ?

²⁴Daar bɩ nin-sõma pis-nu be tẽnga pʋga, yãmb na wã tẽngã? Y ka na n kõ-a sugri neb pis-nu wã sẽn ket a pʋgẽ wã yĩnga?

²⁵Y yam zãr ne tʋʋmd a woto, y yam zãr ne kʋ nin-sõngo n naag ne nin-wẽnga. Bõe tɩ nin-sõng la nin-wẽng zãab ka na n welg taaba? Y yam zãr ne y fãoog-b taaba. Dũni wã fãa Bʋ-kaooda maanda wãn n bʋ kegre?»

²⁶Soaala-Wẽnd leoka a Abraam: «M sã n yãe Sodom pʋga neb pis-nu sẽn ya nin-tɩrse, m na bas-a taal bãmb yɩnga.»

²⁷A Abraam yeelame: «Ad-y m tɩtaam waooga, mam sẽn ya tãnd la tom bala, maam n dat n le gom ne yãmba.

²⁸Sẽn yet tɩ pis-nu wã, daare neb a nu bal n wat n paooge, a nu wã bal yĩnga, yãmb na sak n wã tẽnga zãnga?» Tɩ Soaala-Wẽnd leoke: «Tẽnga kõn wã, m sã n yãe neb pis-naas la a nu a pʋgẽ ye.»

²⁹A Abraam le paasame: «La sã n ya pis-naas bal n be, y na n maana wãna?» Tɩ Soaala-Wẽnd leoke: «Pis-naasa yĩnga, m kõn wã tẽnga ye.»

³⁰A Abraam le kabsame: «Soaala, m kot-y lame tɩ m sã n le gome bɩ y ra puug y sũur ye; y na n maana bõe, sã n ya pis-tã bal n be?» Soaala leokame: «M sã n yãe neb pis-tã, m kõn maan fɩ.»

³¹M na n kosa m Soaala n le leok gomde: «La sã n ya pisi?» Tɩ Soaala yeele: «Pisi wã yĩnga, m kõn kʋ ye.»

³²A Abraam le paasame: Bɩ Soaala ra puug a sũur ye, tɩ m na n le yiisa gomd a ye bala: «Sã n ya neb piig bala?» Tɩ b leoke: «Piiga yĩnga m kõn wã tẽnga ye.»

³³Soaala sẽn gom n sɛ, b loog n basa a Abraam tɩ yẽ me leb a zakẽ.