Read SEBR SÕNGO, 1998 Sɩngrẽ 21 Bible Online

Sɩngrẽ 21 - SEBR SÕNGO, 1998 bible

Sɩngrẽ 21

¹Soaala-Wẽnd tẽega b sẽn da pʋlem a Sara bũmb ninga, la b pidsa b pʋlemde.

²[69†] Pʋg-yãanga, a Sara, rɩka pʋga la a roga biig Wẽnd sẽn yals wakat niingã, n kõ nin-kẽem a Abraam.

³A Abraam pʋda biig ning a Sara sẽn dogã t'a Izaak, a Laadwɛɛnda.

⁴[70†] Dasem a nii daare, a Abraam kẽesa a biiga bãongo wa Soaala-Wẽnd sẽn da kõ-a noore.

⁵A Izaak dogma wakato t'a Abraam tara yʋʋm koabga.

⁶A Sara goma woto: «Wẽnd waa ne laado, ned ninga fãa sẽn na n wʋma kibarã na n pusga laado.»

⁷A le yeelame yɛsa: «Ãnda n na n saagẽ n yeel t'a Sara na le yẽsem biiga, mik m kʋʋlem pʋgẽ m doga biiga.»

⁸Biiga bɩɩme n tol n sigi. Biiga sẽn bas a ma bĩisr daare, a ba maana kibs kãsenga.

⁹Daar a ye, a Sara yãenda a biig, a Izaak, t'a reemd ne a Ismayɛl, Ezipt poaka, a Agar, biigã.

¹⁰A tɩ yeela a Abraam: «Dig yem-poaka ne a biigã tɩ pa segd tɩ yem-poak biig wa naag m biig, a Izaak, n welg a ba raboog ye.»

¹¹[71†] Paga leokre, a Ismayɛl poorẽ, pa yɩ a Abraam noog ye.

¹²[72†] Soaala-Wẽnd yeela a Abraam: «Da sãam f sũuri, yem-poaka ne a biiga poorẽ ye, ade, a Sara sẽn na n kos-f bũmb ning fãa, bɩ f maan boto, tɩ m na n tũ-la a Izaak maasem n kõ-f buudu tɩ f yʋʋra ra menem ye.

¹³La yem-poaka biig sẽn ya fo buudã, m na kɩt tɩ yẽnda me yɩ bu-kãsenga.»

¹⁴A Abraam tõda beoogo n bao buri la ko-waooga n kõ a Agar. A Agar zombga biiga gʋbla, t'a Abraam na n yiis-ba. A Agar sẽn yi, a tɩ sɩnga saab Beerseba zĩ-pɛɛlẽ.

¹⁵Kooma waa n sɛɛme t'a bao tɩɩg a ye maasem n bas a biiga be.

¹⁶A loogame n tɩ bao zĩig n gãande. Biiga ne a ma da zãra ne taaba wala pĩim sẽn tõe n tão n ta zĩig ninga. A da yeta a sũurẽ: Woto m kõn yãend m biiga kũum ye; a yaool n da wẽnega a neng n tees be la a tar yãbre la wiisgu.

¹⁷Soaala-Wẽnd me wʋma biiga kɛlenga; dẽ la b tʋm ned yĩngri t'a sig n bool a Agar: «Agar, bõe la f maanda, bas rabeem, Soaala wʋma f biiga koɛɛga.

¹⁸Yik n tɩ rɩk-a n sagl f naoẽ, m na n kɩtame t'a buud yɩ bu-kãsenga.»

¹⁹Soaala-Wẽnd puka a nina la a yãee bãk ne koom t'a kẽng n tɩ toog n pids a waooga n kõ a biiga t'a yũ.

²⁰Soaala-Wẽnd zĩnda ne biigã, a paa weoogẽ n lebg tãoosa.

²¹A paa Parã weoogo. A ma tɩ bao Ezipt tẽng biig n kõ-a t'a maan a paga.

²² [73†] Wakat kãnga, a Abimelɛk ne a tãnsoaba Pikol waa n yeela a Abraam: «Ade, Soaala bee fo poorẽ wakat fãa.

²³Dɩlla wẽen ne f Wẽnde tɩ f kõ maan-m bũmb ye, maam ne m kambã la m yagensã, wẽen tɩ f na n zoe m nimbãanega, wala mam sẽn zoe f nimbãanega, n deeg-f sãand ka. D zooda ra sãam ye.»

²⁴T'a Abraam yeele: «M wẽendame.»

²⁵Zabr n waa n baas n yik a Abraam ne a Abimelɛk sʋka, t'a Abimelɛk neb n wa n dig a Abraam rakõapa n deeg b bulg a ye.

²⁶Woto la a Abimelɛk leok yã: «Mam ka mi ned ninga sẽn tʋm tʋʋmda ye; fo zɩ n gom ne m ye, sã n ka rũnna, koɛɛg nan ka lʋɩ m tʋbrẽ ye.»

²⁷A Abraam bao piisi la niis n kõ a Abimelɛk la b lebga zoodo.

²⁸A Abraam sʋka pe-yãans a yopoe n loe kɛɛnga.

²⁹T'a Abimelɛk na n sok-a: «Fo sʋka pe-yãans a yopoe wã n n na n maan bõe?»

³⁰T'a Abraam yeele: «M kotame tɩ f reeg piisã tɩ rẽ yɩ kaseto tɩ yaa maam n sɩd tuk bulgã.»

³¹Ad-y yaa rẽ yĩng la b bool zĩ-kãnga tɩ Beerseba, wẽeneg bulga, b yiiba fãa sẽn wẽena yĩnga.

³²Zooda sẽn yõg Beerseba n sɛ, a Abimelɛk ne a tãnsoab a Pikol yii n leba Filisti rãmba soolmẽ.

³³A Abraam sela tɩɩg Beerseba la tɩ-kãng tẽngr la a waoog Soaala, ka-sɩng-ka-sɛɛb Wẽnde.

³⁴A Abraam kaoosa wʋsg Filisti rãmba soolmẽ.