Read SEBR SÕNGO, 1998 Sɩngrẽ 23 Bible Online

Sɩngrẽ 23 - SEBR SÕNGO, 1998 bible

Sɩngrẽ 23

¹A Sara pʋlemd zãng yɩɩ yʋʋm koabg la pisi la a yopoe.

²A maana kaalem Kiriyat-Arba, yaa Ebrõ, Kanaã tẽn-peelmẽ. A Abraam waa be, n yãb a Sara kʋʋre.

³A Abraam yalsa kũuma zug n yeel a Ɛt kamba:

⁴[79†] «Mam siga yãmb wala bu-zẽnd neda la sãana, m kota yaad zĩiga n mum m kũuma.»

⁵A Ɛt kamba leok-a lame:

⁶«Kelg-y neere, d zu-soaba, ad yãmb yaa wala dĩma Wẽnd sẽn kõ tõndo, dɩlla yãmb tõe n muma y kũuma tõnd yaadẽ, ned ka be n tõe n gɩdg-y tɩ y ra mum y kũuma tõnd yaadẽ ye.»

⁷A Abraam yikame n sulg a zug a Ɛt kamba taoore,

⁸n yeel-ba: «Yãmb sã n dat tɩ m mum m kũuma, kelg-y-m neere la y yõk a Soar biig, a Efrõ, sɛɛg n kõ-ma.

⁹Kos-y t'a kõ-m Makpela tãn-bokã sẽn yaa a soolem la sẽn be a pʋʋga satmẽ. A kõ-a maam tɩ m na yao a sẽn saag-a tɛka, la m paam n soog-a zãnga n maan yaad zĩiga.»

¹⁰A Efrõ da bee a Ɛt kamba sʋka la a meng leoka a Abraam, t'a Ɛt kamba ne tẽnga rãmb zĩi n kelgdẽ:

¹¹«M zu-soaba, kõn yɩ boto ye, la kelg-y m gomda neere, m na n kõ-y-la pʋʋgã ne tãn-bokã, m buuda kamb taoore; yik-y n tɩ mum y kũuma.»

¹²A Abraam me yikame n sulg a neng tẽnga, bãmb taoore.

¹³Ad-a sẽn yeel a Efrõ la sẽn da gũbg-b yẽnda wã: «M kotame tɩ yãmb me kelg ma: yaa ligd la m na n kɩse, m kotame tɩ f reege tɩ m tõog n mum m kũuma.»

¹⁴A Efrõ leokame:

¹⁵«M zu-soaba kelge, zĩigã y sẽn datã, sõta wakɩ koeems kobs-naase n deege, la rẽ me zema bõe maam ne yãmb tẽnsʋka? Sẽn ya woto wã, tɩ mum y kũuma bala.»

¹⁶Ne rẽ fãa a Abraam baas n sõda ligdã wala a Efrõ sẽn wilgã n kõ-a, a Ɛt kamba taoore, la yɩɩ wakɩ koeems kobs-naase wala lɛɛbdba sẽn tar n leebdẽ.

¹⁷Yɩɩ woto la Abraam paam n sooge a Efrõ pʋʋgã sẽn be Makpela n tot Mambre, pʋʋga la tãn-bokã, pʋʋga la tɩɩsã sẽn be a pʋgẽ.

¹⁸B lebga a Abraam soolem, t'a Ɛt kamba la sẽn kẽed b tẽnga fãa mi tiiri.

¹⁹Woto me la a Abraam tõog n mum a Sara Makpela tãng bokẽ, Makpela tota ne Mambre, tɩ kẽer boond tɩ Ebrõ la yaa Kanaã rãmb tẽn-peelmẽ.

²⁰Yɩɩ woto yɛsa, la pʋʋga ne tãn-bokã yi a Ɛt kamb nugẽ n lebg a Abraam soolem la yaad zĩiga.