Read SEBR SÕNGO, 1998 Sɩngrẽ 24 Bible Online

Sɩngrẽ 24 - SEBR SÕNGO, 1998 bible

Sɩngrẽ 24

¹A Abraam da kʋʋlame, a yʋʋma da lebga wʋsgo la a da paama Soaala-Wẽnd barka a tʋʋma fãa pʋgẽ.

²Dẽ la a waa n yeel a sõgen-kãsenga: «Dɩk f nug n sɩɩs m gerã,

³la f wẽen ne Wẽnnaam, yĩngr la tẽng Soaala, tɩ f kõn bao pag kaalẽ, Kanaã rãmb sʋka, n kõ a Izaak ye.

⁴Yaa m ba-yir la m buudẽ la f na n kẽng n tɩ bao pag n wa kõ m biig a Izaak.»

⁵Sõgna leokame: «Daare paga wat n yeelame t'a kõn tũ maam n wa ka ye, yãmb biiga sã n tũ maam n leb y ba-yira ka sãoo?»

⁶A Abraam leokame: «Da saag bada n tall m biigã n leb be ye.

⁷Wẽnd la dũni fãa Soaala yiisa maam m ba zakẽ la m yaab rãmb tẽngẽ, la b kãab-m lame tɩ b na kõ-m kamb la yagens kaanẽ. Dẽ yĩnga b na lʋɩɩs b ned f taoore tɩ f tɩ bao pag beenẽ n wa kõ m biigã.

⁸Paga sã n zãgs t'a kõn tũ n wa, taal yi-la f zugu, la bada ne bada-bila, da tall m biigã n kẽng be ye.»

⁹Sõgna sɩɩsa a Abraam gere la a wẽename.

¹⁰Sõgna kẽe a zu-soaba bãgrẽ n yiis yʋgma piiga n paas a zu-soaba arzɛka la a looga Mezopotami, a Nawor tẽnga.

¹¹A sẽn ta a Nawor tẽnga, a yalsa yʋgma wã tẽnga noore, zafare, pagba sẽn wat n yõngd kooma wakato.

¹²A yeelame: «Soaala, m zu-soaba Abraam Wẽnnaam, zĩnd-y ne maam dũnna n wilg-m tɩ y sɩd nonga m zu-soab a Abraam.

¹³Ade, mam yɛsa bulga sɛɛga, la tẽnga kom-pugli na n wa yõnga koom.

¹⁴Dɩlla m sẽn na n yeel bi-pugl ninga: ‹Pʋdg f yʋʋra koom n kõ ma,› t'a yeele: ‹Yũ la f bas tɩ m yũnug y yʋgma,› bɩ bi-kãng yɩ yãmb sẽn segl a soab a Izaak yĩnga, la woto m na bãng yãmb nonglem ne m zu-soaba.»

¹⁵A pa yãe n gom n sɛ, la a Rebeka sẽn wa ne a yʋʋre. A ra yaa a Betuwɛl biiga la a Betuwɛl ma la a Milka, a Milka sɩd la a Nawor, a Nawor ne a Abraam yaa ba-biisi.

¹⁶Bi-pugla neng da yaa neere al wʋsgo; a ra nan yaa pʋg-sɛda. A taa bulgã n pids a yʋʋre n na n looge.

¹⁷Sõgna zoe n taame n yeel-a: «Bas tɩ m yũ f yʋʋra koom.»

¹⁸T'a yeele: «M zu-soaba, yũ-y!» La tao-tao bala a kɩlla a yʋʋrã n kõ-a t'a yũ.

¹⁹A sẽn yũ n sɛ la bi-pugla sẽn yeele: «M na n tooga kooma n kõ y yʋgma tɩ b fãa yũ n tɩge.»

²⁰A budga a yʋʋrã gaolga pʋga n leb bulgẽ wã n tɩ toog la a maana woto tɩ koom wa sek yʋgma wã fãa.

²¹Rakõora ra sĩnda a noor n yɛs n getẽ la a sokd a menga: Soaala-Wẽnd na n manega m sorã bɩ b ka na n manege?

²²Yʋgma wã sẽn yũ n tɩge, dao wã yiisa sãnem kalem-bãng sẽn zɩse n sog bi-pugla yõore la a rɩka kags a yiibu zɩslem me sẽn pa paoode n pid a kamse,

²³la a yeel-a: «M kotame tɩ fo togs maam fo sẽn ya ned ning biiga la f wilg-ma m sã n tõe n yõga gãag-sobendo f ba wã zakẽ?»

²⁴Tɩ biiga leok: «M yaa a Betuwɛl biiga; a Betuwɛl yaa a Milka biiga la a Milka sɩd la a Nawor.»

²⁵A le paasame: «Mood la yamd bee wʋsgo la zĩig sẽn na n yõg gãag-sobend ka tõe n kong ye.»

²⁶Rakõora sulga a neng n pʋʋs Soaala-Wẽnde,

²⁷n yetẽ: «M zu-soaba, a Abraam Wẽnnaam, paam barka; b pa solg b zood la b nonglem ne m zu-soaba ye. B talla maam tɩrga n tɩ kẽes m zu-soaba ba-biig zakẽ.»

²⁸Bi-pugla wudg n leba yiri, a sẽn ta zakẽ a togsa a ma fãa.

²⁹A ra tara kẽema sẽn boond tɩ Labã la a Labã zoe tao-tao n tees bulga sẽnẽ n na n tɩ seg a Abraam dakõorã.

³⁰A sẽn yãe kalem-bãngã la kagsã, a sẽn tẽeg a tão wã sẽn togs tɩ rao wã goma woto la woto, a tɩ seg-a-la ne a yʋgma, bulga sɛɛga.

³¹A yeel-a lame: «Waa-y yã, Soaala-Wẽnd sẽn ning a soab barka. Bõe tɩ yãmb yɛs yɩnga? M pɩɩga m zaka la m segla zĩig yʋgma wã yĩnga.»

³²Rao wã ta-la a Labã zakẽ, a looda yʋgma n bao yamd la rɩɩb n kõ-ba, n bao koom n kõ dakõorã ne a tũud-n-taas tɩ b waas b nao.

³³B waa n tẽgna rɩɩb a taoore t'a yet t'a kõn dɩ t'a ka reng n togs a sẽn tar n na n togsa ye. Dẽ la a Labã yeel-a: «Gome!»

³⁴T'a na n yeele «Mam yaa a Abraam dakõore.

³⁵Soaala-Wẽnd ninga m zu-soaba barka la a lebga arzɛk kãseng soaba, a tara rũms wʋsgo, bɛd la bõonego, a tara wanzurf la sãnem, yem-daado la yem-pogse, yʋgma la bõeense.

³⁶M zu-soaba sẽn waa n kʋʋle, a pag a Sara doga biiga la a ratame tɩ bi-kãng soog a paoong fãa.

³⁷M zu-soaba kɩtame tɩ m wẽene tɩ m kõn bao pag Kanaã kom-pugli wã sʋk n kõ a biiga ye;

³⁸a tol n paasame: ‹Yell na pak-fo, f sã n ka leb m buudẽ, m saam-dãmba tẽngẽ, n bao pag n kõ m biigã!›

³⁹Wakat kãnga, m yeelame: ‹Daare paga ka na n sak n tũu n wa ye,›

⁴⁰t'a leok ma: ‹Wẽnd ninga m sẽn kẽn a soab taoor n ta rũnna wã na lʋɩɩs a ned f taoore, a na tall foom n taas f sorã, la ya m ba zakẽ biiga la f na n tall n wa kõ a Izaak.

⁴¹Taal sẽn na n yi f zug daare, yaa f sẽn na n ta mam buudẽ. Le yaa f sẽn na n ta buudẽ wã tɩ buuda zãgse.›

⁴²M sẽn ta bulga sɛɛg dũnna, m pʋʋsa m sũurẽ: ‹M Soaala, m zu-soaba Abraam Wẽnnaam, m kotame tɩ y wilg ma, m sora sã n zemsame,

⁴³m na n yalsa bulga sɛɛga, la sõng-y tɩ biig ning sẽn na n wa yõng koom tɩ m yeel-a: Kõ maam f yʋʋra koom bilf tɩ m yũ,

⁴⁴t'a leoke: Yũ-y la y bas tɩ m bao koom n kõ y yʋgma wã, sõng-y tɩ bi-kãng yɩ pag ning yamb sẽn tũusi n na n kõ m zu-soaba biiga.›

⁴⁵M pa yãe n pʋʋs n sɛ la a Rebeka sẽn yi ne yʋʋre, a waa bulgẽ wã n toog koom tɩ m yeel-a: ‹Sã n ta f yam, m kot-f-la koom n yũ.›

⁴⁶Tao-tao bala, a sika a yʋʋrã n yeel-ma: ‹Yũ-y la y bas tɩ m toog koom n kõ y yʋgma.› Mam yũume la m rũmsa me paamame n yũ.

⁴⁷Tɩ m na n sok bi-puglã: ‹Fo ya ãnda biiga?› T'a yet t'a yaa a Betuwɛl biiga la a Betuwɛl yaa a Nawor pag a Milka biiga. M yiisa sãnem kalem-bãnga n sog a yõore la m n ninga kagse a kamsẽ.

⁴⁸M sẽn yĩgimdi, m waooga Soaala, m zu-soaba Abraam Wẽnnaam tɩ b kɩtame tɩ m sor yɩ sõngo, tɩ m paam pag sẽn ya m zu-soaba yagenga.

⁴⁹La marsã yãmb sã n dat n maan m zu-soaba neere bɩ y togs-ma. Y sã n ka rat me bɩ y togs-ma tɩ m bãng m sẽn lebdẽ, goabg bɩ rɩtgo.»

⁵⁰A Labã ne a Betuwɛl yeelame: «Woto bee ne Soaala-Wẽnde, tõnd yẽ ka tar sẽn na leok tɩ n-yẽe bɩ ayoo!

⁵¹Ad-a Rebeka sẽn yẽs f taoore, peeg-a tɩ y kuli t'a tɩ lebg f zu-soaba bi-paga, wala Soaala sẽn date.»

⁵²A Abraam dakõorã sẽn wʋm b leokrã a wõgemda Soaal Wẽnd taoore.

⁵³A yiisa sãnem la wanzurf teedo n paas futu n kõ a Rebeka, a bao kũun sõma n kõ a ma la a kẽema.

⁵⁴Zaka rãmb me kõo sõgna ne a tũud-n-taasa rɩɩb tɩ b rɩ n yaool n kẽ gãaga. B sẽn vẽeg beoogo, dakõora yeelame: «M kotame n leb m zu-soaba nengẽ.»

⁵⁵T'a Rebeka ma la a tão yeele: «Bas-y bi-pugla t'a kell n yaas dasem a yiibu bɩ dasem piig t'a na yaool n kuli.»

⁵⁶Dẽ la dakõora leok yã: «Da tadg-y-m ka ye, Soaala togl-m-la so-sõngo, bas-y tɩ m leb m zu-soaba nengẽ.»

⁵⁷Tɩ b leok-a: «Sã n ya woto d na n boola bi-puglã n bãng a raabo.»

⁵⁸B boola a Rebeka n sok-a: «Fo rat n tũ n loogame?» T'a leoke: «N-yẽe!»

⁵⁹La b basa a Rebeka ne a ma-wubdga, tɩ b loog ne a Abraam dakõorã la a tũud-n-taasã.

⁶⁰B kãaba a Rebeka kãab noodo: «D tão sõngo, Wẽnd na kɩt tɩ f wek n lebg bu-yalengo, Wẽnd na kõ f yagensã b bɛɛba na-tẽng tɩ b sooge.»

⁶¹A Rebeka ne a yem-pogsã zomba yʋgma n pʋg a Abraam dakõorã; a Rebeka tũ-a lame n looge.

⁶²A Izaak da yii Layi-Royi bãka sẽn beẽ wã n wa Negɛb zĩ-peen-daagẽ.

⁶³Zĩig sẽn maage, a Izaak yiime n na n pemse la a sẽn zẽk a nenga, a yãee yʋgma sẽn wate.

⁶⁴A Rebeka me sẽn doog a nenga, a yãee a Izaak la a yɩk n tiimda tẽnga.

⁶⁵A soka dakõorã: «M ba bõe n segd tõnd weoogẽ ka?» Tɩ rakõora yeele: «Yaa mam zu-soabã.» A sẽn wʋm woto a bao peende n lud a nenga.

⁶⁶Rakõora togsa a Izaak bũmb ning fãa sẽn maane.

⁶⁷A Izaak talla a Rebeka n kẽes a roogẽ; a reeg-a lame n maan a paga la b ra nonga taaba; yaa woto la a Izaak sũur maag bilfu t'a ra ket n yãbda a ma kaalem.