Read SEBR SÕNGO, 1998 Sɩngrẽ 25 Bible Online

Sɩngrẽ 25 - SEBR SÕNGO, 1998 bible

Sɩngrẽ 25

¹A Abraam le rɩka pag a to sẽn boond tɩ Ketura.

²Yẽ kamba la woto: a Zĩmrã, a Yoksã, a Medã, a Madiã, a Yisbak la a Suwa.

³A Yoksã n dog a Seba la a Dedã; A Dedã kamb la Asuritse, Letuzitse la Lewumimitse.

⁴A Madiã kamba: a Eyifa, a Efɛr, a Anok, a Abida, a Elda; b zãng fãa yaa a Ketura kamba.

⁵A Abraam rɩka a paoongã n kõ a Izaak.

⁶Sã n ya pagb a taaba kamba, a Abraam yãee kũuni n kõ-ba. A ka bas-b tɩ b lagem ne a Izaak ye, a zãag-b lame, b teesa yaanga.

⁷A Abraam yʋʋma yɩɩ koabg la pisopoe la a nu

⁸t'a yaool n maan kaalem. A tɩga raar la yʋʋma, a kʋʋlem yɩ-a-la noogo. A waa n tɩ saka a saam-dãmba.

⁹A kamba, a Izaak ne a Ismayɛl tɩ mum-a-la Makpela tãnga bokẽ, Ititga a Soar biig, a Efrõ, pʋʋgẽ, Mambre taoore.

¹⁰[80†] Pʋʋga yaa pʋʋg ning a Abraam sẽn da a Ɛt kamba nengẽ; yaa be la b mum a Abraam ne a Sara.

¹¹A Abraam kũuma poore, a Izaak kell n paama Soaala-Wẽnd barka; a ti-la a zak Layi-Royi bulga sɛɛga.

¹²A Ismayɛl doog la woto: a ba yaa a Abraam, t'a ma yaa a Agar, Ezipt tẽng paga, a Sara doog-biiga.

¹³A Ismayɛl kamba ne a buuda sagsa yʋy la woto: pipi soaba la a Nebayot, a yiib soaba, a Kedar; dẽ poore, a Adbeyɛl, a Mibsam,

¹⁴a Misma, a Duma, a Masa,

¹⁵a Adad, a Tema, a Yetur, a Nafis la a Kedma.

¹⁶Woto la a Ismayɛl kamba. Ned kam fãa ne a yʋʋre. Ned kam fãa ra tara a weoog la a sik n kẽedẽ. Buuda kãsem-dãmb da yaa piig la a yiibu.

¹⁷A Ismayɛl yʋʋm yɩɩ koabg la pis-tã la a yopoe t'a yaool n ki. A sẽn ki, b mum-a-la ne a saam-dãmba.

¹⁸Yẽnda buud n da kẽed Avila weoogo n tãag Sur sẽn be Ezipt yaanga, f sã n dabd Asiri. A soolma da tota a yaopa soolem. B ra ya yagse la b moora ra ka zemsd taab ye.

¹⁹A Izaak kibar la woto: a Abraam n dog a Izaak.

²⁰A Izaak yʋʋm da ta pis-naase a sẽn waa n na n peeg a Rebeka. A Rebeka ba la a Betuwɛl, ya Padã-Aram neda; a Rebeka kẽem la a Labã, Aram tẽnga.

²¹A Izaak pʋʋsa Soaala-Wẽnd n kos sõngre, a paga yĩnga, t'a da ka rogd ye. Soaala-Wẽnd deega a kosgo la a Rebeka rɩka pʋga.

²²A Rebeka waa n mikame tɩ kamb n maood a pʋgẽ, t'a kelem: «Sã n ya woto, m sẽn dɩk pʋga yõod la bʋgo?» A yikame n tɩ gom ne Soaala-Wẽnde.

²³[81†] Tɩ b yeel-a: «Ad yaa buud sags a yiib n be f pʋgẽ, kamb a yiib la f na n doge la b na n welga taaba, biig a ye n na n tõog a to, kãsma n na n lebg yao wã sõgne.»

²⁴A Rogma sẽn waa n ta, a Rebeka bãngame tɩ na n yɩɩ kinkirsi.

²⁵Sẽn yi-a pipi soaba da yaa moɛɛga la yĩn-kõabneng soaba; b pʋda yẽ tɩ Ezayu.

²⁶A to wã n pʋgl dogem la a nuga ra gãda a Ezayu nao-kãsenkãare; b boola yẽ t'a Zakoob. B rogma wakat t'a Izaak yʋʋm yaa pisoobe.

²⁷Kamba waa n bɩɩme t'a Ezayu lebg tãoosa la we-gõaada; a Zakoob yẽ da zĩ-la a zĩ-yɛnga n pa zãagd ne yir ye.

²⁸A Izaak ra nong a Ezayu tɩ we-nemda ra tata a yam; a Rebeka yẽ ra nonga a Zakoob.

²⁹Daar a ye, a Zakoob rʋga a rɩɩbo; a Ezayu yii weoogẽ n wa ne yaamse la a yeela a Zakoob:

³⁰«Kom n tar maam, yãk f rɩɩba sẽn moog ne rʋkã n kõ-ma.» Dẽ me la b pʋd a yʋʋr tɩ Edom.

³¹A Zakoob yeelame: «Bɩ f reng n koos f kãsenga ne maam.»

³²T'a Ezayu yeele: «M kiidame tɩ m kãsengã paas m bõe?»

³³[82†] A Zakoob yeelame: «Bɩ f reng n wẽen!» La a wẽename n koos a kãsengo.

³⁴A Zakoob yaoola marsã n kõ-a buri la bɛnga; a rɩɩme la a yũ, la a yik n looge. A Ezayu pa pẽg a kãsengo wala a zema bũmb ye.