Read SEBR SÕNGO, 1998 Sɩngrẽ 26 Bible Online

Sɩngrẽ 26 - SEBR SÕNGO, 1998 bible

Sɩngrẽ 26

¹Kom n waa n lʋɩ tẽngã, la rẽ n tõkd a yiib soaba, t'a ye me n zoe n zĩnd pĩnda, a Abraam wakato. A Izaak yi n kẽnga Gerar, Filisti dĩm, a Abimelɛk, nengẽ.

²Soaala lika a Izaak n yeel-a: «Da ta Ezipt tẽng ye, tek n pa tẽng ning m sẽn na n wilg-fo.

³Pa tẽn-kãng pʋgẽ tɩ m na n zĩnda ne foo la f na n paama m barka, m na n dɩka tẽngã n kõ foo ne f buudu. M na n pidsa m pʋlengo, pʋleng ning sẽn pʋlem a Abraam, fo ba-roakã.

⁴[83†] M na kɩt tɩ f yagensã sõor yɩ wala yĩngr ãdse, m na n kõ-b-la tẽns zembala la dũni wã zãng na n tũu bãmb maasem n paam barka.

⁵M na n maan-f-la woto t'a Abraam yɩɩ sakda, a reega m goam la m sẽn yals fãa, a maana m sẽn yeel-a t'a maan.»

⁶Yɩɩ gomd kãng yĩnga la a Izaak pa Gerar.

⁷ [84†] Tẽnga rãmb waa n leok-a-la a paga poorẽ tɩ yẽ yeele: «Yaa m tão.» A zoe rabeem t'a sã n yeele: «Yaa m paga,» b na n kʋ-a lame. A Rebeka ra yaa neer wʋsgo.

⁸A Izaak sẽn kẽ Gerar n maan dasem a wãna la a Abimelɛk sẽn ges a roog võorẽ n yãend a Izaak ne a Rebeka tɩ b sõsd ne taaba.

⁹A Abimelɛk kɩtame tɩ b bool a Izaak la a yeel-a lame: «M tara kaseto tɩ paga yaa fo paga! Fo yɩɩ wãn n leoke: ‹Yaa m tão?› » A Izaak yeelame: «Ade, mam da tagsame tɩ b tõe n kʋ-m lame, paga poorẽ.»

¹⁰A Abimelɛk le sok-a lame: «Yaa bõe la f maan woto? Kellẽ la bilfu tɩ tẽnga nin-yend yõgẽ f pagã n tak yell kãseng d fãa zugu.»

¹¹A Abimelɛk kõ-la a soolma rãmb no-kãnga: «Ned ninga fãa sẽn sɩɩsa nin-kãnga ne a paga, bɩ b kʋ-a!»

¹²A Izaak bʋda a pʋʋgo la a sẽn paam kood yʋʋm kãng yɩɩga a sẽn paam yʋʋm a taaba naoor koabga. Wẽnnaam bark sɩd sig-a lame.

¹³A arzɛka paasame n paase, t'a wa lebg rakãagre. A waa n lʋɩ-la a taaba fãa taoore. A yʋʋr waa n yiime.

¹⁴A waa n paama rũms ka tɛka, bɛd la bõonego la sõgen-kamb wʋsgo. Dẽ la Filisti rãmb waa n yik n maand sũ-kiir ne-a.

¹⁵Buls niyns a Abraam dakõap sẽn tu a Abraam wakatẽ, Filisti rãmb da lɛɛg n yẽd-b-la ne tãndo.

¹⁶A Abimelɛk yeela a Izaak: «Yi d tẽngẽ tɩ marsã fo pãng yɩɩda tõndo!»

¹⁷A Izaak sak n yiime n tɩ ti a zak Gerar bãoogẽ.

¹⁸A Izaak kɩtame tɩ b yẽeg buls niyns sẽn da tu a ba wakatẽ tɩ Filisti rãmba lɛɛg n yẽdã. Bulg fãa le reega yʋʋr ninga a Abraam sẽn da kõ-a.

¹⁹A Izaak rakõapa waa n tɩ tuka zĩig a ye n paam koom sẽn bun n pa sɛtẽ ye.

²⁰La Gerar dũm-kɩɩmba yika zabr ne a Izaak rakõapa n yet tɩ bulga yaa bãmb bulga. A Izaak pʋda bul-kãng yʋʋr tɩ Esɛk, tɩ zabr n zĩnd a poorẽ.

²¹B le tuka bulg a to tɩ rẽ me le yɩ zabre t'a pʋd-a tɩ Sitna.

²²B zãaga zĩig n tuk bulg a to la zabr pa zĩnd a poorẽ ye t'a pʋd-a tɩ Reobot, n yetẽ: «Marsã Wẽnd kõ-d-la ween-vɩʋʋgo tɩ d paoong tõog n paase.»

²³A waa n yii be n dig Beerseba.

²⁴Ba raar yʋngo, Soaala-Wẽnd lik-a lame n yeel-a: «Maam la f ba, a Abraam, Wẽnnaam. Da maan dabeem baa bilfu tɩ m bee ne foom. M na n ninga foo barka, m na n kɩtame tɩ f buud lebg wʋsgo, a Abraam maasem yĩnga.»

²⁵Zĩ-kãnga, a Izaak mee maan-kugri n waoog Soaala-Wẽnd, a tii roog be t'a rakõapa tuk bulga.

²⁶ [85†] A Abimelɛk yii Gerar n wa ges a Izaak; a zoa Awuzat n paas a tãnsoaba Pikol tũ-a lame n wa.

²⁷A Izaak yeel-b lame: «Y wata m nengẽ bõe yĩnga, yãmb ka kisg maam n dig maam n yiis y tẽngẽ bɩ?»

²⁸Tɩ b leoke: «Tõnd bãnga neer marsã tɩ Soaala-Wẽnd bee ne foom tɩ d yet tɩ f wa tɩ d yõg zoodo.

²⁹Wẽen tɩ f kõn maan-d bũmb ye, tɩ tõnd ka zab ne foom ye, d maan-f-la neere, d bas-f lame tɩ f yi ne laafi la ade, rũnna, fo lebga ned sẽn tar Soaala-Wẽnd barka.»

³⁰A Izaak segla rɩɩbo la sɩda, b rɩ yã, b yũ yã.

³¹B vẽega beoog n yõg zood ne taaba t'a Izaak bas-b tɩ b kuli, la b sɩd looga ne laafi.

³²Yaool n yɩɩ baraare la a Izaak rakõapa waa n togs b sẽn da tuud bulg a ye kibare: b pooga koom.

³³Dẽ la b pʋd bulgã tɩ Sibea, wẽenego, la yaa rẽ la b ket n boond tẽnga rũnna [86] tɩ Beerseba, wẽeneg bulga.

³⁴A Ezayu yʋʋm sẽn waa n ta pis-naase, a kẽe kãadem ne pagb a yiibu: a ye la a Yewudit, Ititga Beeri biiga, a to: a Baasmat, Ititga Elon biiga.

³⁵A Izaak ne a Rebeka yãee naong wʋsgo pʋg-kãens poorẽ.