Read SEBR SÕNGO, 1998 Sɩngrẽ 28 Bible Online

Sɩngrẽ 28 - SEBR SÕNGO, 1998 bible

Sɩngrẽ 28

¹A Izaak boola a Zakoob n le ning a barka la a yeel-a: «Da saag n bao pag Kanaã tẽng ye.

²Yik n kẽng Padã-Aram, f yaab a Betuwɛl nengẽ n tɩ bao biig be n maan f paga, Bao biig f ma-kẽema a Labã kamb sʋka.

³Bɩ Wẽnd pãng soab ning f barka, tɩ f rog la f wek n lebg bu-yalengo.

⁴[91†] Bɩ Wẽnd Pãng soab kõ foom ne f yagensã bark ning a Abraam sẽn paam a soabã, n soog tẽng ning f sẽn na n zĩnd a soab pʋgẽ.»

⁵A Izaak basa a Zakoob t'a loog Padã-Aram tẽnga, a Labã nengẽ. A Labã da yaa Aram tẽng a Betuwɛl biiga la a Rebeka kẽema; a Rebeka yaa Ezayu la a Zakoob ma.

⁶A Izaak sẽn ning a Zakoob barka la a tʋm-a Padã-Aram t'a tɩ bao pag beelẽ, a Ezayu tẽegame t'a Izaak ra kõ-a-la noor kãnga: «Da saag n yi kãadem ne Kanaã bi-pugl ye.»

⁷A Zakoob deega a ba ne a ma noore n kẽng Padã-Aram.

⁸Woto la a Ezayu bãng t'a ba wã ka nong Kanaã rãmb ye.

⁹Yẽ me kẽnga a Ismayɛl buudẽ n tɩ rɩk pag n paase. A yʋʋr la a Maalat; yaa a Ismayɛl bi-pugla la a Ismayɛl ba la a Abraam; a Maalat le yaa a Nebayot tão.

¹⁰A Zakoob yii Beerseba n dɩk Aram tẽng sore.

¹¹Zĩ-sobdo, a waa n yãenda zĩig n gãand be. A yãee kugr n dɩk-a n kʋgl a zugu n gũsi.

¹²[92†] A zãmsame, la ade, raodg n da sel tẽnga n yaool n lug n kul yĩngri, tɩ Wẽnd malɛk rãmb tũud-a n dʋʋd la b sigda.

¹³[93†] A yãee Soaala-Wẽnd tɩ b yɛs a taoore la b goma woto: «Maam la Soaala, f yaab, a Abraam, Wẽnnaam la f ba, a Izaak, Wẽnnaam, fo sẽn gãe tẽng ningã, m dɩkd-a lame n kõt foo ne f yagense.

¹⁴[94†] F yagensa sõor na n yɩɩ wʋsgo, wa tẽng bĩisri; yaang la taoore, goabg la rɩtgo, mooga tõr fãa na n tũu foo ne f kamba maasem, n paam barka.

¹⁵M bee ne foom, f sẽn dabd zĩig ning fãa m na yɩ f gũuda la f na le lɛɛg n wa. M na n pidsa m kãabg fãa la m kõn yi f poorẽ abada!»

¹⁶A Zakoob sẽn neke, a goma ne a meng la a yeelame: «Sɩd sɩda Soaala-Wẽnd bee zĩ-kãnga la m da ka mi ye!»

¹⁷Rabeem yõk-a lame t'a yeele: «Zĩ-kãnga kẽesd-m-la rabeem wʋsgo; a ka bũmb a to, a yaa Soaala-Wẽnd zaka la b Arzãna dignoore.»

¹⁸A Zakoob sãda beoog n dɩk a sẽn kʋgl kugr ningã n yals wa tãn-kugri, n dɩk kaam n daag a zugu.

¹⁹A pʋda zĩ-kãng tɩ Betɛl, Soaala-Wẽnd zaka. Tẽnga yʋʋr yaool n da yaa Luz.

²⁰A Zakoob pʋlmame: «Soaala-Wẽnnaam sã n bee ne maam, n gũud m sorã, n kõt-m dɩɩb m sẽn na n dɩ la b kõt-m fuug sẽn na n yeelge,

²¹m sã n lɛɛg n wa m ba wã zakẽ ne laafi, b na lebg mam Wẽnnaam.

²²La kugrã m sẽn yalsã na lebg Wẽnnaam doogo la m sẽn na n paam bũmb ning fãa yãmb nengẽ, m na kẽ be n yãk yãmb pʋɩɩre: pʋɩɩr a ye piig zugu.»