Read SEBR SÕNGO, 1998 Sɩngrẽ 3 Bible Online

Sɩngrẽ 3 - SEBR SÕNGO, 1998 bible

Sɩngrẽ 3

¹ [14†] Rũmsa sẽn yi Soaala-Wẽnd nugẽ sʋka, Waaf n da yɩɩd ne sɩlem. Yẽ n yeel pagã: «Sɩd bɩ, Wẽnd n yeel yãmba tɩ tɩɩsa sẽn be zẽeda pʋga, bɩ y da saag-y n dɩ tɩɩg ba a ye biisi?»

²Tɩ paga leoke: «D tõe n dɩɩ zẽeda tɩɩs biisi.

³Yaa tɩɩg ninga sẽn bɛ-a zẽeda tẽnsʋk poorẽ la b yeel tɩ d da saag n dɩ tɩ-kãng biig ye, tɩ d da sak n sɩɩs-a ye, ka rẽ d na ki.»

⁴Waafa leoka pagã: «Pa sɩd ye, kũum kõn ki ye!

⁵Ad-y Wẽnnaam miime bala tɩ y sẽn na n dɩ-a raare, y nin na n pukame tɩ y lebg wa wẽn-bi, n mi neer la wẽnga.»

⁶Paga mikame tɩ tɩɩga biig wẽnda a na yɩ noogo, t'a bee neere, n sakd gesgo, t'a wata ne rɩ n paam bãngre. Dẽ la a fãsg n dɩ la a fãsg n kõ a sɩd sẽn da yɛs ne-a, tɩ yẽ me rɩ.

⁷La b yiiba fãa nin pukame tɩ b bãng tɩ b yaa b zaala n bao kankang vãad n zap-zap n sẽgne.

⁸A Adem ne a paga wʋma Soaala-Wẽnd kẽnda rãamde, zẽeda pʋga. B ra kokda zaabr pemsem. A Adem ne a paga zoe n soonda tɩɩsa sʋka tɩ Soaala-Wẽnd nif ra yãend-b ye.

⁹Soaala-Wẽnd boola a Adem: «F bɛɛ?»

¹⁰T'a yeel: «M wʋma y rãamd zẽeda pʋga, tɩ rabeem yõk-ma, tɩ m zoe n soond, tɩ m yaa m zaala.»

¹¹Dẽ la b leok-a: «Ãnda n togs foom tɩ f yaa f zaala? Woto fo rɩɩ tɩɩg ning mam sẽn da rig foom a rɩɩbã!»

¹²Raoã yeelame: «Ad-y yaa pag ning y sẽn kõ maamã n fãsg tɩɩga biig tɩ m deeg n dɩ!»

¹³[15†] Tɩ Soaala-Wẽnd yeel pagã: «Bõe la f maan [16] woto?» T'a yeele: «Yaa waaf n belg-m tɩ m dɩ.»

¹⁴Soaala-Wẽnd yeela waafã: «Ad-f sẽn maan woto wã, m yãkda f bark we-rũms la yir-dũms sʋka. Fo na n yẽra ne f pʋga la f mog tom n ta f yõor tɛka.

¹⁵ [17†] M na n ninga beem, foo ne paga sʋka, f kamb la paga kamb sʋka. Fo na n dũma paga nao-kãsenkãare la a na bedsa f zugu.»

¹⁶B lɛɛg n yeela pagã: «Fo sã n wa tʋtẽ, f naong na n yɩɩ wʋsg-wʋsgo, yaa toog pʋgẽ la f na n dog f kamba, f na n tʋlga f sɩda ne tʋlsem kãsenga la yẽ n na n dɩ naam la a soog fo.»

¹⁷B yeela raoã: «Fo sẽn kelg f paga koɛɛg n dɩ tɩɩg ning mam sẽn da yet tɩ f ra rɩ wã, bɩ tẽnga da zĩnd bark f yĩng ye. F vɩɩma pʋgẽ, dɩll f yãe toogo n paam n dɩ.

¹⁸ [18†] Tẽnga na n woma gõos la yõens-tabdo f yĩnga la pʋt-mood n na n yɩ f rɩɩbo.

¹⁹F na n kaaga f rĩir tʋʋlgo n paam n dɩ la na n yɩɩ woto n tãag daar ning f sẽn na n leb tẽng tomẽ tɩ f yii tomẽ. Fo yaa tãndo n na n leb tãndẽ.»

²⁰A Adem boola a paga tɩ Awa, yẽ la ninsaal fãa sẽn na n vɩɩnd tẽng zug ma. Boaalẽ wã Awa ne nin-vɩɩg yekda taaba.

²¹Soaala-Wẽnd dɩka gãndo n maan futu n yeelg a Adem ne a pagã,

²²[19†] n yaool n yeel: «Marsã ninsaal lebga wa tõnd nin-yend n mi neer la wẽnga; d da bas-a t'a tẽeg a nug n fãsg vɩɩm tɩɩga biiga n dɩ, n wa ka bãng kũum ye!»

²³B riga a Adem n yiis Eden zẽedẽ la a sẽn yi tẽnga tomẽ, a lebga tẽnga koaada.

²⁴B sẽn yiis a Adem, b yalsa gũudba zẽeda yaang noorẽ. Yaa malɛgs, la b zãada sʋʋs sẽn yãgd bugum, n gũud vɩɩm tɩɩga tɩ ned da ta-a ye.