Read SEBR SÕNGO, 1998 Sɩngrẽ 30 Bible Online

Sɩngrẽ 30 - SEBR SÕNGO, 1998 bible

Sɩngrẽ 30

¹A Rasɛl yãeeme t'a meng ka rogd ye t'a na n zab pʋg-taare ne a Lea, n yeel a Zakoob: «Kõ-m kamba, ka rẽ m na n kiime!»

²Dẽ la a Zakoob sũur puug ne a Rasɛl t'a leok-a: «M yaa Wẽnd-Pãng-Soab la, ka bãmb n mong foom dogma bɩ?»

³T'a yeele: «Ad-m doog-biiga, a Bila, kẽ ne-a t'a rog biig n kõ ma.»

⁴A rɩka a roog-biig n kõ a Zakoob t'a kẽes-a.

⁵A Bila rɩka pʋg n dog biig n kõ a Rasɛl.

⁶T'a Rasɛl yeele: «Soaala-Wẽnd bʋ-la m bʋʋdo, b reega m kosgo n kõ maam biiga.» Yaa rẽ yĩng la a pʋd biiga t'a Dã.

⁷A Bila, a Rasɛl doog-biiga, waa n le rɩka pʋga n dog a Zakoob biig a to.

⁸A Rasɛl yeelame: «M zaba Wẽnd zabr ne m kẽema Lea la maam n tõoge.» La a pʋda biiga t'a Neftali.

⁹A Lea me sẽn yãende t'a pa le paamd dogem, a rɩka a doog biig a Zilpa n kõ a Zakoob.

¹⁰A Zilpa roga a Zakoob biiga,

¹¹t'a Lea yeele: «Wã la Zu-noogo!» La a pʋda biiga tɩ Gad.

¹²A Zilpa, a Lea roog-biiga, le roga biig a to n kõ a Zakoob.

¹³T'a Lea yeele: «Wã la Sũ-noogo tɩ kom-pugli wã fãa na n pẽg-m lame.» Dẽ la a pʋd biiga tɩ Asɛr.

¹⁴Ka-kɛɛr wẽnde, a Rubẽ kẽnga pʋʋgẽ n tɩ tʋ a yẽgen-tɩto. A tɩ paamame n tuk n wa kõ a Lea. A Rasɛl yãeeme n yeel a Lea: «Yãk f biiga yẽgen-tɩɩma n kõ ma!»

¹⁵T'a Lea na n leok: «Fo sẽn deeg m sɩdã n bas-ma pa sek-fo tɩ f baood n na n deeg m biig tɩ-yẽgend n paase?» Dẽ la a Rasɛl yeel-a: «Sã n ya woto, bɩ f kõ-m f biiga tɩ-yẽgna la f tɩ pɩɩg a Zakoob roog yʋngã.»

¹⁶A Zakoob yii pʋʋgẽ n wat ne zĩ-sobdo t'a Lea yi n seg-a n n yeele: «Ad-a Rasɛl deega m biig tɩ-yẽgende la a saka rooga me pɩɩgd tekre.» Yʋng kãnga, b kẽe ne taaba.

¹⁷Wẽnd deega a Lea kosgo t'a rɩk pʋg n dog biiga la rẽ n tõkd a rogem a nu.

¹⁸Dẽ me la a yeel yã: «M dɩka m doog-biig n kõ m sɩda la Wẽnd dola m tekre.» La a pʋda biiga tɩ Isakar.

¹⁹A Lea waa n le rɩka pʋga n dog a biig a yoob soaba.

²⁰A yeelame: «Soaala-Wẽnd kõ-m-la kũun-kãsenga, marsa yẽ m na paam waoogr m sɩda nengẽ tɩ m kõ-a-la kamb a yoobe.» La a pʋda biiga tɩ Zabulõ.

²¹A waa n doga bi-pugla n bool a t'a Dina.

²²Wẽnnaam me tẽega a Rasɛl yelle n kõ a rogem.

²³A sẽn dɩk pʋg n dog a biiga, a yeelame: «Wẽnd yiis-m-la yãnd pʋgẽ.»

²⁴A pʋda biiga yʋʋr tɩ Zozɛf n yetẽ: «Wẽnd na kõ-m a to n paase!»

²⁵A Zozɛf dogem poore, a Zakoob yeela a Labã: «Bas-m tɩ m leb m ba-yiri.

²⁶Kõ-m m pagba tɩ yaa bãmb yĩng la m tʋm f tʋʋma. Kõ-m kamba tɩ m looge, fo sẽ n ka ne m sẽn maan fãa f yɩnga?»

²⁷A Labã leok-a lame: «Tõnd sẽn lebg zooda bɩ f kelg-ma. M bagra wilg-m lame tɩ yaa fo yĩng la m paam Soaala-Wẽnd barka.

²⁸Dẽ yĩnga wilg maam m sẽn tog n yao-f to-to bala tɩ m na yao.»

²⁹A Zakoob yeelame: «Fo mi m tʋʋmna sẽn yɩ a soaba la f paoongã sẽn paas seem ninga.

³⁰F paoonga da paooda, la ad-a sẽn paas wʋsg-wʋsgo, la Soaala-Wẽnd tũu mam maasem n ning f barka. Marsã ka segd tɩ ma me tʋm m meng yĩng sɩda?»

³¹A Labã yeelame: «Bõe la f rat tɩ m yao-fo?» T'a Zakoob leok: «Ka bũmb la f na n yao ye, fo sã n maan wala m sẽn datã, m na le sak n gũ la m legl f piisã.

³²Rũnna, m na n kẽ-la f rũms bõonega sʋka la m na n yiisa pe-bil fãa kõbg sẽn ya sablga bɩ sẽn lob sabl la pɛɛla. M na n yiisa piisa sʋka pe-yãang fãa sẽn ya sablga, bʋ-yãang fãa kõbg sẽn ya sablga bɩ sẽn lob sabl la pɛɛla, la rẽ n na n yɩ m soolem.

³³F sã n wa beoogo n na n ges m sẽn so wã, n yãend bʋʋg kõbg sẽn ka sablga bɩ sẽn ka lob sabl la pɛɛla, n yãend pe-yãang sẽn ka sablga, dẽ na puk m zãmbo, la ges rẽ wala wagdem.»

³⁴T'a Labã yeele: «M saka boto, maan wa fo sẽn togsã.»

³⁵Badaare, a Labã welga toore boɛɛg fãa kõbg sẽn ya sablga, bɩ sẽn lob sabl la pɛɛla, bʋ-yãang fãa sẽn ya sablga bɩ sẽn lob sabl la pɛɛla, a welga a sẽn tõog n yõke, n paas pe-yãang fãa sẽn ya sablga, la a rɩk-b lame n gũnug a kamba.

³⁶B yaool n looga taoore la b zãaga ne a Zakoob sẽn ta da-yɩten-daar kẽnde. A Zakoob yii ne a Labã rũmsã sẽn kellã n na tɩ gũ-ba.

³⁷A Zakoob gesame n kɛɛg wa yɩlga, noabga, la gãak ribli, n bẽeg paoka bilfu n gilgi, tɩ b raada tõndẽ, sabla, sabl la pɛɛla.

³⁸A Zakoob rɩk-b lame n gãneg gaolga pʋga, rũmsa sẽn wat n yũud zĩig ningã. Kooma yũub wakato la rũms yãamsa da baood boeesa zĩiga.

³⁹Yaa kooma yũub wakato la rũmsa da rʋʋda, la ribli wã sẽn dɩg b taoor tɩ b getẽ la b rʋʋd taabã, rũms yãansa me da rogda kamb ne kõbg sẽn sobe, sẽn lob sabl la pɛɛla.

⁴⁰Sã n ya ne pe-raadã, a Zakoob welg-b-la toore la a rig-b lame n tees a Labã rũms niyns sẽn sobe, bɩ sẽn lob sabl la pɛɛla, n tees rũms niyns sẽn sakd dogem a Labã bãgrẽ wã, la woto a paama a toorẽ dũms sẽn welg ne a Labã dẽnna.

⁴¹Dabaar a to me: sã n ya rũm-sõma n dʋʋde, a sagenda dasaba gaolgẽ wã tɩ rũmsa ne-ba.

⁴²Sã n ya rũm budumse n dʋʋde, a pa sagend daada ye; woto me rũm sõma wã ra yaa yẽ soolem tɩ rũms budumsã yaa a Labã rẽnna.

⁴³A Zakoob waa n lebga dakãagre n tar rũms zembala, n tar yem-daado la yem-pogse, yʋgma la bõeense.