Read SEBR SÕNGO, 1998 Sɩngrẽ 31 Bible Online

Sɩngrẽ 31 - SEBR SÕNGO, 1998 bible

Sɩngrẽ 31

¹A Zakoob wʋma a Labã kom-dibli wã tɩ b gomda: «A Zakoob wʋka d ba sẽn da so fãa, a paoonga fãa yita tõnd ba wã nengẽ.»

²A Zakoob sẽn ges a Labã nenga, a mikame tɩ nenga ka zaamẽ neng ye.

³La Soaala-Wẽnd yeela a Zakoob: «Leb f buudẽ, f ba yiri, la m na n zĩnda ne foo.»

⁴A kɩtame tɩ b bool a Lea ne a Rasɛl sẽn da be bãoogẽ

⁵la a yeel-b lame: «M gesa y ba nenga la a ka le ya wa pĩnd ye; m ba rãmba Wẽnnaam yaool n ket n dat-m-la ne neere.

⁶Yãmb miime tɩ yaa ne m sũur fãa la m tʋm y ba tʋʋmde.

⁷Yãmb ba zãmba maam, a sẽn da sede t'a na n yaoo maam bũmb ningã, a teem-a-la naoor piiga. Yaa Soaala-Wẽnd bala n pa sak kegre.

⁸A sã n da yeel fãa: ‹Sẽn lob sabl la pɛɛl na n yɩɩ fo yaoodo,› la rũmsa fãa sẽn dogd kamb sẽn lobd sabl la pɛɛla; a sã n da yeele: ‹Sẽn bẽes fãa n na n yɩ fo rẽnna, la rũmsa fãa sẽn dogd kamb sẽn bẽese.›

⁹Yaa woto la Wẽnd deeg a paoongo n kõ maam.

¹⁰Ade, pe-yãansa sẽn mi n sakd pe-raada wakato, mam zẽka m nenga yĩngri, m zãmsdẽ, la b yãeeme tɩ pe-raada kõbg da loba sabl la pɛɛla bɩ b gʋlgʋlame.

¹¹La Soaala yeela maam: ‹Zakoob!› Tɩ m leoke: ‹Ad-ma!› Tɩ b paase:

¹²‹Zẽk f neng n gese, pe-raada fãa sẽn dʋʋdã, b kõbga loba sabl la pɛɛla la b gʋlgʋlame, la bãng tɩ yaa m sẽn mi a Labã wẽnema sẽn yɩ a soaba ne fooma.

¹³[95†] Mam la Wẽnd ninga sẽn lika foo Betɛl. Yaa mam yĩng la fo sẽn dɩk kaam n daag kugra zugã la f kãab maam f kãabgo. Marsã yik n yi tẽn-kãnga, n leb f ba-yiri.› »

¹⁴A Rasɛl ne a Lea leoka woto: «Bũmb ka le ket d ba zakẽ sẽn na n yɩ tõnd pʋɩɩr ye.

¹⁵D ba wã geta tõnd wala sãamba la sɩda a koosa tõndo; d ligd meng tol n pala a nengẽ.

¹⁶Dɩlla arzɛk ning fãa Wẽnd sẽn yiis d ba nengẽ lebga tõnd ne d kamb soolem; maan Naaba-Wẽnd sẽn yet tɩ f maan bũmb ninga fãa.»

¹⁷A Zakoob yik n baoo yʋgma n zombg a pagb la a kamba.

¹⁸A yiisa a sẽn da so rũms niynsã la a sẽn paam b rãmb Padã-Aram tẽnga; a rɩka a sẽn tar fãa n leb a ba, a Izaak, nengẽ, Kanaã tẽnga.

¹⁹A Labã ra yii n na n tɩ wõrsa a piisa kõbdo, t'a Rasɛl paam dẽ n kẽ n wʋk wẽn-naands niyns a ba sẽn tar n gũud a menga.

²⁰A Zakoob manesma pa wẽneg ned sẽn zoet manesem ye, a maana woto t'a Labã ka bãng tɩ zoees n zoet ye.

²¹A zoe ne a sẽn da tar fãa; a sẽn dʋʋg Efrat, a teesa Galaad tãnga.

²²Sẽn waa n maan da-yɩten-daare, a Labã wʋmame t'a Zakoob zoeeme.

²³Dẽ la a yi ne a yaopa tɩ b na n pʋg a Zakoob la dasem a yopoe poore, b paam-a-la Galaad tãnga.

²⁴Yʋng a ye, Soaala-Wẽnd lika Aram dao, a Labã, a zãmsdẽ la b yeel-a lame: «Da saag n yeel a Zakoob tɩ bũmb ye.»

²⁵A Labã paama a Zakoob Galaad tãnga zugu, be la a ra wẽe a sika. A Labã me wẽ-la a sik be.

²⁶A Labã yeela a Zakoob: «Bõe yĩng la f tudg-ma, n zoe ne m kamba, wala f wẽ tãpo n paam-ba?

²⁷Bõe yĩng la fo tudg maam n soos n zoe; m sã n da bãngẽ m na yãagẽ foo ne sũ-noogo, ne yɩɩla, ne gãngão-gilsi la pɛndga.

²⁸Fo ka bas tɩ m mobg m kom-dibli la m kom-pugli wã ye. Sɩda, fo maana wala gãeenga.

²⁹M da tõe n tʋm-f-la wẽnga, la yʋngẽ, f ba wã Wẽnnaama yeel-m lame: ‹Gũus n da yeel a Zakoob tɩ bũmb ye.›

³⁰La ade, f ba wã nonglem yĩnga fo zoet n lebda f ba-yiri, bõe yĩng marsã tɩ f zuud m sẽn tar n gũud m menga?»

³¹A Zakoob leoka a Labã: «Ad yaa rabeem n yõk-ma, m tagsame tɩ f na n deega f kamba.

³²Sã n kella teed niyns fo sẽn tar n gũud f menga, ad fo sẽn yãend-b a soab nengẽ kõn pa ne yõor ye. M yet-f-la d saam-biisa taoore, kẽe n bao sẽn ya f rẽnna la f rɩk-a n looge.» A Zakoob dag n ka bãng tɩ yaa a Rasɛl n da zu-b ye.

³³A Labã kẽe a Zakoob sẽokẽ n paas a Lea la a roog-kamba rẽnnẽ, n bao sõma la a pa yãend fɩ. A yii be n tɩ vɛɛs a Rasɛl dẽnna.

³⁴Mik a Rasɛl da rɩk-b lame n solg yʋgemda gaar tẽngre n yaool n dʋ n zaoẽ; a Labã vɛɛsa a dooga zãnga la a pa yãend fɩ.

³⁵A Rasɛl yeela a ba: «Bɩ m ba da puug a sũuri a sẽn wa m taoor tɩ m ket n zĩi wã ye, ad-y yaa m yĩinsã n pa noom dũnna.» A Labã bao a sẽn tar n gũud a mengã la a pa yãend-b ye.

³⁶A Zakoob puuga a sũuri tɩ yẽ ne a Labã lebg zabre: «M kongr la bʋgo, m beegre la bʋgo tɩ f yik n pʋgd-m woto?

³⁷Fo sẽn zũndg mam teedã, bõe la f yãend sẽn wẽnd f yir bũmbu. F sẽn yãe bũmb ninga fãa yiis-a ka, m yaopa la fo yaopa taoore, tɩ b kao tõnd d yiiba bʋʋdo!

³⁸Yaa yʋʋm pisi rõanna la m be f zakẽ, f piis la f bʋʋs paama rogem, m ka wãb f bãgr pe-raoog ba a ye.

³⁹Gigma sẽn yõg b rãmbã tɩ m ka tall-ba n wa wilg fooma ka maam n kong n bao n lebs-f wɛ? Yaa yʋngo, yaa wĩntoog la wagdba waa n yõg f rũmsã, fo kɩtame tɩ m yao fãa.

⁴⁰M namsa tʋʋlg wĩntoogo, n nams waood yʋngo, m zɩ n tɩg gõeem ye.

⁴¹Yaa yʋʋm pisi la m be f zakẽ. M tʋma yʋʋm piig la a naase n paam f kamba yiibã; m kɩɩma f rũms yʋʋm a yoobe la f teema m yaood naoor piiga.

⁴²Wẽnd-Pãng-Soaba, m ba Izaak la m yaaba Abraam Wẽnnaamã sã n da da ka zĩnnẽ ne maam m kõn yiẽ f zakẽ wã ne bũmb ye. La Wẽnnaam gesa m yaamse, m yãooga tʋʋma, n kao bʋʋd yʋngẽ nand bala.»

⁴³A Labã leoka a Zakoob woto: «Kom-pugli wã yaa mam kom-pugli, f kamba yaa mam kamba, rũmsa yaa mam rũmsi, fo sẽn ne wã fãa yaa maam n so la m na deega kom-pugli wã ne b kambã n maan bõe?

⁴⁴Dɩlla wa tɩ d yõg zoodo, wa tɩ d yals zooda kaseto.»

⁴⁵A Zakoob dɩka kugr n sele,

⁴⁶n yeel a nebã: «Wa-y ne kuga!» B wʋka kug n sam zĩ-yɛnga la b rʋʋ kuga zug n dɩ.

⁴⁷A Labã pʋdã zĩ-kãng: Yegar-Saaduta, kaset kug saongo, t'a Zakoob pʋd-a Galeed, gũus-to zĩiga.

⁴⁸A Labã yeelame: «Bɩ rũnna tɛka kug-saongã yɩ kaseto maam ne foo tẽnsʋka.» Yaa rẽ yĩng la zĩiga pʋd tɩ Galeed

⁴⁹la Mispa: t'a le paas: «D sã n wa ka le ne taaba, bi Wẽnd nif kell teeg-do.

⁵⁰Fo sã n ka zã m kamba ne waoogre, fo sã n dɩk pagb a taab n paas bãmba, ba tõnd sã n zãr ne taab me, Wẽnd neeme.»

⁵¹A Labã le paasame: «Ges kuga saongã sẽn lob tõnd d yiiba tẽnsʋka la kugra sẽn selã.

⁵²Ad kugra sẽn selã, ad kugra saong yaa toaaga. M wẽendame tɩ m kõn yõsg-ba n dig fo sẽneg ye la fo me wẽendame tɩ f kõn yõsg-ba n dig mam sẽneg tɩ yel-beed ka maan ye.

⁵³La Wẽnd na kɩt tɩ d yaab rãmba Wẽnnaam, a Abraam la a Nawor Wẽnnaam yɩ d bʋʋda.» La a Zakoob wẽena ne a ba, a Izaak Wẽnde, Wẽnd ning sẽn kẽesda rabeema.

⁵⁴A Zakoob kʋʋ maoong tãnga zugu la a boola a neba tɩ b wa rɩ. B rɩɩme la b gãanda tãnga zugu.