Read SEBR SÕNGO, 1998 Sɩngrẽ 34 Bible Online

Sɩngrẽ 34 - SEBR SÕNGO, 1998 bible

Sɩngrẽ 34

¹A Lea bi-pugl a Dina yiime n na n tɩ sõs ne tẽnga kom-pugli.

²Ivitga Amor biig, a Sikɛm, tẽnga na-bi-kẽenga, yãenda a Dina n yõg-a ne pãnga.

³A yam da kẽe a Zakoob bi-puglã, a Dina; a da nonga bi-pugla wʋsgo, bi-pugla ra taa a yam zãnga.

⁴A Sikɛm yeela a ba, a Amor: «Kos biigã n kõ-ma tɩ m maan m paga!»

⁵A Zakoob yaool n da bãngame t'a bi-pugl a Dina ra sãamame la a rũm-kɩɩmba sẽn da ket weoogã, a sĩnda a noor n tãag b waoongo.

⁶A Sikɛm ba, a Amor, waa a Zakoob nengẽ ne a koɛɛga.

⁷A Zakoob kamba wẽneg n yii bãoogẽ n wa la b wʋma yellã tɩ b sũur puug wʋsgo; b wʋmame t'a Sikɛm tʋma wẽnga n sãam a Zakoob bi-pugla la b fãa yeelame tɩ rẽ ka segd ye.

⁸A Amor leoka woto: «Mam biig a Sikɛm yãee yãmb bi-pugla t'a yam kẽe-a wʋsgo. Bɩ y rɩk-a n kõ-a t'a maan a paga.

⁹D yõg zoodo ne taaba tɩ yãmb kõ tõnd y kamba tɩ tõnd me kõ yãmb d rẽnna.

¹⁰Y na n paa ne tõndo, d tẽnga na n lebga y soolem, y na tõog n kẽ a weta fãa, y na tõog n ti y roto.»

¹¹A Sikɛm yeela biiga ba la a kẽem dãmba: «Maan-y yardo tɩ m na kõ-y y sẽn na n kos bũmb ning fãa.

¹²Saag-y maam yaoodo sẽn ya kãsenga tɩ m na yao fãa gilli la y kõ maam y bi-pugla tɩ m maan m paga.»

¹³A Amor biig a Sikɛm sẽn da sãam a Dina yĩngã, a Zakoob kamba leok-a-la ne zãmbo:

¹⁴«Tõnd sẽn ka tõe n maan la woto: n dɩk d tão n kõ dao sẽn ka kẽ bãongo; tõnd nengẽ a yaa yãnd wʋsgo.

¹⁵Yãmb sã n dat tɩ d sake bɩ yãmb me lebg wa tõndo, bɩ yãmb me sak n kẽes y rapa bãongo.

¹⁶Rẽ poor marsã tõnd na rɩk d kom-pugli wã n kõ yãmba tɩ yãmb me rɩk y rẽnd n kõ tõndo, woto d na pa ne yãmba n lebg buud a ye.

¹⁷La yãmb sã n pa kelg d sẽn leokd-y bũmb ning bãonga poorẽ, tõnd na n looga ne d biiga.»

¹⁸B goama ta-la a Amor la a Sikɛm yam.

¹⁹Bi-ribla pa kaoos n maan b sẽn kos a bũmb ninga ye t'a yama da kẽe a Zakoob bi-pugla zãnga. La bãng-y tɩ buuda fãa da ne-la a Sikɛm wala b nin-kãsenga.

²⁰A Amor ne a biiga Sikɛm tigma buuda, tẽnga noore, la b yeel-b lame:

²¹«Ad-y nin-bãmba raab yaa sõngo; bɩ d tẽng lebg b tẽnga, tɩ b tõe n gõ d wetẽ wala b sẽn date, tɩ b rɩk b kamb n kõ tõndo, tɩ tõnd me rɩk d kamb n kõ bãmba.

²²Ad-y b yaool n pa na n sak n zĩnd ne tõndo tɩ d lebg buud a yembre, tõnd rapa fãa sã n ka kẽ bãongo wala bãmb ye.

²³N paas me, tõnd sã n sake, b rũmsã, b paoongã fãa na n lebga tõnd dẽnna la b na n paa ne tõndo.»

²⁴Tẽnga kẽedba fãa kelga a Amor la a Sikɛm neere, la rapa fãa gill sak n kẽe bãongo.

²⁵Sẽn maan dasem a tã tɩ Sikɛm dãmb ket n zĩ ne toogo la a Zakoob kamb a yiibu, a Dina kẽem dãmba, a Simeõ ne a Levi, sẽn yi ne b sʋʋse n tɩ kẽ tẽngã; dabeem buug da ka tar-b ye; b kʋʋ tẽnga rapa fãa gilli.

²⁶B kʋ-la a Amor ne a Sikɛm la b yiisa a Dina a Sikɛm zakẽ n tall-a n looge.

²⁷B baasa sẽn da pogl-bã la b zɛɛ tẽngã, b tão wã sẽn sãama yĩnga.

²⁸B zɛ-la b rũmsi, bɛd la bõonego, b bõeense, b rũmsa fãa, sẽn pa-b yir wala sẽn da be-b bãoogẽ.

²⁹B looga ne b arzɛka fãa, ne b kom-bõonego, ne b pagba, ne sẽn da be rota pʋs fãa.

³⁰A Zakoob yeela a Simeõ ne a Levi: «Yãmb kẽes-m-la yellẽ, y maaname tɩ Kanaã rãmb la Perizitse na n kisg tõndo. Mam neba paooda, b na n sũu tãpo n zab ne maam, n tõog-ma, n wã maam ne m roog zãnga.»

³¹Tɩ b leoke: «Da segdame tɩ b rɩk tõnd tão wã n maan b pʋg-yoodr bi?»