Read SEBR SÕNGO, 1998 Sɩngrẽ 35 Bible Online

Sɩngrẽ 35 - SEBR SÕNGO, 1998 bible

Sɩngrẽ 35

¹ [102†] Wẽnnaam yeela a Zakoob «Yik n dʋ Betɛl n tɩ zĩnd be; beenẽ f na n mee maan-kugr n kõ Wẽnnaam ning sẽn lika foo f sẽn waa n zoet n na n põs f kẽem a Ezayu.»

²A Zakoob yeela a zak rãmba: «Menes-y tẽn-kug la tɩta fãa sẽn be y nengẽ, pek-y y mense la y teed y futu.

³Yik-y tɩ d dʋ Betɛl. M na n tɩ mee maan-kugri n kõ Naaba-Wẽnd tɩ b reega m kosgo, m pɛta wakato, la b sõnga maam tɩ m sor loke.»

⁴B rɩka bũmb ning fãa b sẽn dõoge n tar n tẽegd b wẽn-naandsa yelle la b tʋb-londa fãa n kɩs a Zakoob t'a tuk bok tɩɩg tẽngr, Sikɛm, n bus-b be.

⁵B yikame n looge. Naaba-Wẽnd kẽesa tẽns niyns fãa sẽn pẽ-b be wã rabeem. Woto b pa pʋg a Zakoob ne a neba ye.

⁶A Zakoob taa Luz, Kanaã tẽnga, be yẽnẽ la Betɛl, a taa ne a neba fãa.

⁷A mee maan-kugri n pʋd zĩ-kãng tɩ Betɛl, tɩ Wẽnnaam da zoe n lik-a-la be, a sẽn waa n zoet n na n põs a kẽema.

⁸A Rebeka ma-wubdga, a Debora, kii be tɩ b mum-a Betɛl tɩ-bedr wa kʋk tẽngre, la b pʋda tɩ-kãng tɩ nintãm kʋka.

⁹Wẽnnaam lika a Zakoob Padã-Aram sor zugu, la b ning-a-la barka.

¹⁰[103†] Wẽnnaam yeel-a lame: «Fo yʋʋr la a Zakoob la b kõn le bool-f boto ye, na n yɩɩ Israyɛl, la Israyɛl n sɩd lebg a yʋʋre.»

¹¹Wẽnnaam le paasame: «Maam la Wẽnd-Pãng-Soaba. Rog la f weke. Ad bu-kẽengo, dĩm dãmb buudu, na n yi-la f pennẽ.

¹²[104†] Tẽng ning m sẽn kõ a Abraam la a Izaak, m kõt-a-la foom me, la fo loogr poore, m kõt-a-la f kamba.»

¹³B sẽn gom woto b leba yĩngri n zãag ne segba zĩigã.

¹⁴La Wẽnd sẽn gom ne-a zĩig ningã, a Zakoob lugla kugri, n dɩk kaam n daag a zugu.

¹⁵[105†] La a Zakoob pʋda Wẽnd sẽn lik a zĩig ningã tɩ Betɛl.

¹⁶B yika Betɛl; da keta bilf bal tɩ b ta Efrata la a Rasɛl sɩng n na n kũma rogem la rogma ka yɩ naana ye.

¹⁷Rogma sẽn da ya toogã, pʋg-roagsa yeel-a lame: «Da maan dabeem tɩ yaa bi-ribl la f paam yã.»

¹⁸A Rasɛl mikame t'a pãng sɛɛme t'a na n ki t'a pʋd biigã tɩ Ben-Oni, Kʋrɩta, la biiga ba zãgsame n pʋd-a a Bẽnzame, tom-pag biiga.

¹⁹A Rasɛl kiime la b mum-a-la Efrata sor zugu, yaa Bɛtelyɛɛm la be.

²⁰A Zakoob sela kugri yaoga zugu la kug kãng keta ne rũnna.

²¹A Israyɛl yii be n tɩ yals Migdal-Edɛr poore.

²²[106†] Yaa beenẽ la a Rubẽ yõg a Bila, a ba paga, la a ba wã bãngame la a sũur pa yɩ noog ye. A Zakoob kamba yɩɩ piig la a yiibu.

²³Ad-a Lea kamba: a Rubẽ, yẽ la a Zakoob bi-kẽenga; a Simeõ, a Levi, a Zɩɩda, a Isakar, a Zabulõ.

²⁴Ad-a Rasɛl kamba: a Zozɛf ne a Bẽnzame.

²⁵Ad-a Rasɛl doog-biig a Bila kamba: a Dã, a Neftali.

²⁶Ad-a Lea doog-biig a Zilpa kamba: a Gad, a Asɛr. Woto la a Zakoob kamba sẽn dog Padã-Aram tẽnga.

²⁷ [107†] A Zakoob taa a ba a Izaak zakẽ, yaa Mambre, Kiriyat-Arba, b boond-a lame yɛs tɩ Ebrõ, yaa be la Abraam la a Izaak kaoos yã.

²⁸A Izaak pʋlemd zãng yɩɩ yʋʋm koabg la pis-nii,

²⁹a paam n kʋʋla wʋsgo n yaool n ki, n yaool n sak a saam-dãmba, t'a kamb a Ezayu la a Zakoob na n solg-a.