Read SEBR SÕNGO, 1998 Sɩngrẽ 37 Bible Online

Sɩngrẽ 37 - SEBR SÕNGO, 1998 bible

Sɩngrẽ 37

¹A Zakoob ba wã sẽn zĩnd tẽng ning Kanaã, beenẽ la yẽ me ti a yiri.

²Wã marsã yaa a Zakoob doog kibare. A Zozɛf yʋʋm sẽn waa n ta piig la a yopoe, a da naagda a kẽem-dãmb n kɩɩmd rũmsi. A ra ket n yaa yãaga; a Bila la a Zilpa kamba la a rogd-n-taase; a Bila ne a Zilpa yaa a ba pagba. A sã n mii n wʋm tɩ b gomd wẽng a kẽem dãmba poorẽ, a wat n togsa a ba.

³A Israyɛl da nonga a Zozɛf n yɩɩd a kamb a taabã, a da yaa a kʋʋlem biiga; a kɩtame tɩ b sẽ na-biig fuug n kõ-a.

⁴A kẽem dãmba sẽn yãe t'a ba wã nong-a-la wʋsgo n yɩɩd bãmbã, b tuga beem ne-a, tɩ ya mo-beed bala n dag n be b noorẽ.

⁵A Zozɛf zãmsame n yi n togs a kẽem dãmbã, tɩ b na n maneg n kisg-a.

⁶A yeelame: «Kelg-y m sẽn zãmse:

⁷Tõnd dag n bee pʋʋgẽ n kalsd koodo; mam kalga yikame n yaas yĩngri tɩ yãmb dẽnna na n gũbg-a n wõgemd a taoore.»

⁸Dẽ la a kẽem dãmba leok-a: «Sãnd f ka rat n wa yɩ tõnd dĩma bɩ d soaala!» Zãmsdã la goama kɩtame tɩ b sũ-kiira la b beema yãng n paas.

⁹A Zozɛf le paama zãmsd a to, t'a le wilg a kẽem dãmba: «M le zãmsame la m yãee wĩntoog la kiuug la ãds piig la a ye tɩ b wõg mam taoore.»

¹⁰A togsa a ba la a kẽem dãmbã la ba wã zab-a lame: «Ad fo zãmsdã kɛɛma, maam ne f ma la f kẽem-dãmbã na n wa wõgemda fo taoor la?»

¹¹[110†] Rẽ paasa a kẽem dãmba sũ-kiiri. A ba wã yẽ da sĩnda a noore n bilgd yɛlã a sũurẽ.

¹²A Zozɛf kẽem dãmba kẽnga Sikɛm n na n tɩ gũ b ba rũms bõonese.

¹³A Israyɛl yeela a Zozɛf: «Fo kẽem dãmba bee Sikɛm bãoogo, wa tɩ m tʋm-f b nengẽ.» T'a yeele: «M na kẽng!»

¹⁴T'a ba wã yeel-a: «Bʋʋg-f kẽem dãmbã n ges b keta laafi la f ges rũmsa me keta laafi n wa togs-ma.» La a Zozɛf yii Ebrõ n ta Sikɛm.

¹⁵Ned n seg-a bãoogẽ t'a kẽnd la a sok-a lame: «Biiga, bõe la f baooda?»

¹⁶T'a leoke: «M baooda m kẽem dãmba la wilg maam b sẽn be zĩig ninga n kɩɩmd rũmsã!»

¹⁷Tɩ raoã yeele: «B yikame la m da wʋmdame tɩ b goamda: d kẽng Dotã.» A Zozɛf gẽesa a kẽem dãmba la a tɩ yãend-b-la Dotã.

¹⁸A Zozɛf kẽem dãmba yãend-a lame t'a nan ket yɩɩg n watẽ tɩ b sed ne taab n na n kʋ-a.

¹⁹B ra yeta taaba: «Ad zãmsda naab sẽn wate!

²⁰Wa-y tɩ d kʋ-a n lob bul kɩdgẽ la d yeel tɩ rũng n yõk-a n wãbe la woto d na bãng a zãmsdã sẽn na kẽ zĩig ninga!»

²¹A Rubẽ wʋmame la a fãag-a-la b nusẽ n yeel-b tɩ b wa tɩ b ra kʋ-a ye.

²²A Rubẽ yeelame: «Wa-y tɩ d da kʋ-a ye, d da sɩɩs-a ne d nug ye, d bas a bul-kɩdgẽ bala, weoogẽ ka.» A da ratame n soos n yiis-a n tɩ lebs a ba.

²³Woto a Zozɛf sẽn ta b sʋka, tao-tao bal tɩ b yeega a fu-yorgo t'a ra yera na-biig fuugu.

²⁴B gãd-a lame n lob bul-kɩdgẽ; bulga da yaa vɩʋʋgo, koom da ka be a pʋgẽ ye,

²⁵n yaool n leb b zĩigẽ n na n tɩ rɩ. B sẽn doog b nenga, b yãee Ismayɛl toandba sẽn yi Galaad n kuiisẽ. B yʋgma wã ra zɩta tɩdare, tɩ-kaam sẽn na n ning kũum tɩ ra sãam ye, la sẽn tar yũ-noogo. B ra teesda Ezipt tẽnga.

²⁶A Zɩɩda yeela a ba-biisi: «Yõod bʋg la d na n paam, d sã n kʋ d yao wã la d bus a zɩɩma?

²⁷Wa-y tɩ d koos-a ne Ismayɛlitsã la d da kʋ-a ye tɩ ya d yao, d fãa yaa zɩɩm a ye.» A sẽn gom woto, b kelg-a lame.

²⁸ [111†] Madiã toandba taame tɩ b yiis a Zozɛf bulgẽ wã n soos n koos a wakɩ koeems pisi ne bãmba tɩ b tall-a n loog Ezipt tẽnga.

²⁹A Rubẽ leba bulgẽ wã n mik t'a Zozɛf ka le ket be ye t'a na n kẽes a fut,

³⁰la a lɛɛg n wa yeel a ba-biisi: «Ad-y biiga ka le ket ye, la m na n kẽe yɛ?»

³¹Dẽ la b rɩk a Zozɛf fuugã n kodg boɛɛg a ye, n bilim fuuga zɩɩmẽ.

³²B toolame tɩ b tɩ kɩs fu-yorgã b ba la b yeel-a: «Wã bala la tõnd sẽn yãende, ges-y sãnd ka y biiga fuugã?»

³³A Zakoob gesame n yeele: «Yaa m biiga fu-yorgo, bõn-nind n wãb a Zozɛf n zerem-a wa rũnga.»

³⁴A Zakoob kẽega a fuug n bao sũ-pa-noang fuugu n yeelge la a yãba a Zozɛf n kaoose.

³⁵A kom-dibli la a kom-pugli waame n na n bels-a-la a zãgsa belsgo n yetẽ: «Bas-y-ma tɩ m sig bʋg-tẽng ne nintãm n paam m biiga.» La a kell n yõka yãbre.

³⁶Madianitsa koosa a Zozɛf. B koos-a-la ne Ezipt tẽng rao a ye, a Potifar. Da yaa nin-kãsenga Ezipt naaba zakẽ la zaka rãmb dɩlgr ra paka yẽnda.