Read SEBR SÕNGO, 1998 Sɩngrẽ 41 Bible Online

Sɩngrẽ 41 - SEBR SÕNGO, 1998 bible

Sɩngrẽ 41

¹Sẽn maam yʋʋm a yi, dĩma me zãmsame: a ra yɛsa Nil kʋɩlga noore.

²A yãee nag-yãans a yopoe sẽn yi kʋɩlgẽ wã n wãbd yamdo, b ra nobame n ya yɩlma.

³Nag-yãans a yopoe le yii kʋɩlgẽ wã; b waglmame n ka le tar neerem ye la b wa n yegla pipi rãmbã.

⁴La sẽn wagl-bã, n ka tar neerma wãba a yopoe wã sẽn nob n ya yɩlma. La dĩma wẽneg n nekame.

⁵A waa n le gũsame, n le zãmse: kaf a ye n da ning zut a yopoe; a ye fãa yaa bedre, n pɛ neere.

⁶La bãmb poore, zut a yopoe a taaba, war sẽn wãke la sẽn ya bõonese, n tão n yi.

⁷Ka-zut niyns sẽn ya b bõonesã dɩɩ sẽn sĩd bã, n ya bɛdã. Dĩma sẽn neke, a bãngame tɩ yɩɩ zãmsdo.

⁸ [115†] Beoog sẽn vẽege, Ezipt dĩma yama da gõodame. Dẽ la a kɩt tɩ b bool Ezipt sɛb mitbã la yam zulung rãmba fãa, n togs a zãmsgã la ned ba a ye ka tõog n wilg a võor ye.

⁹Dẽ la sẽn kɩta dĩma rãama yik n yeele: «M data rũnna n wilg m kongre.

¹⁰Wakat n waa n zĩndi tɩ dĩma sũur puug ne maam la rɩɩba kɩta la a kɩtame tɩ b pag tõnd d yiiba roogo.

¹¹Yʋng a ye, tõnd naaga taab n zãms zãmsdo; zãmsda da wẽnda taaba tɩ b võor yaool n ya toore.

¹²Ro-gũuda naab da tara yem-daoogo sẽn naag tõnd doogẽ la sẽn ya Ebrayitga; tõnd wilg-a-la d zãmsdo la a tõog n bilga b võore, a wilga ned kam fãa yell sẽn na n yɩ-la.

¹³Sɩd yɩɩ wala a sẽn da togsã, mam leba m pĩnd zĩigẽ la b luula m tũud-n-taagã.»

¹⁴Ezipt dĩma kɩtame tɩ b bool a Zozɛf; tao-tao bal tɩ b yiis-a-la roogo. A põnga a zug, n teem futu, n wa yals dĩma taoore.

¹⁵Tɩ dĩma na n yeel a Zozɛf: «M zãmsa m zãmsdo la ned ba a ye ka tõog n wilg a võor ye. M yaool n wʋmame tɩ zãmsd sẽn lʋɩ f tʋbrẽ bal la f sẽn wa ne a võore.»

¹⁶A Zozɛf yeela dĩma: «Da teeg-y maam ye, teeg-y Naaba-Wẽnd tɩ bãmb n tõe n leok tɩ yõod zĩndi.»

¹⁷Dĩma yeela a Zozɛf: «M zãmsda pʋgẽ, m da yɛsa Nil kʋɩlg noore,

¹⁸la nag-yãans a yopoe sẽn nobe, n ya yɩlma n yi kʋɩlgã n wãbd yamdo.

¹⁹La nag-yãans a yopoe sẽn waglme n ka le tar neerem ba bilfu, n yi n yegl pipi rãmbã, la Ezipt tẽng zɩ n yãe niis sẽn waglme n pa sakd gesgo wala nag-kãens ye.

²⁰Sẽn wagl-bã, n ka tar neerma, wãba a yopoe wã sẽn da nobe n ya yɩlma.

²¹B sẽn vel-b n sɛ, ka yɩɩ wa b vela bũmb ye, b pa tedg ba bilfu; mam wẽneg n nekame.

²²M waa n le zãmsame, n yãe kaaf a ye sẽn ning zut a yopoe t'a ye fãa ya bedre, n pɛ neere,

²³la zut a yopoe a taab, war sẽn wãke la sẽn pa bõonese, tão n yii bãmb sɛɛgẽ,

²⁴la sẽn ya-b bõonesã rɩɩ sẽn ya-b bẽdã la neebã. M togsa m zãmsdã mitbã la yam zulung rãmbã, la ned ba a ye pa tõog n wilg maam b võor nand ye.»

²⁵A Zozɛf yeela Ezipt dĩma: «Yãmb zãmsdã yaa zãms yɛnga, Wẽnd wilga dĩma bũmb ning sẽn na n yɩ beoogo.

²⁶Nag-yãans a yopoe sẽn ya yɩlma makda yʋʋm a yopoe; la ka-zut a yopoe sẽn pɛ neerã me makda yʋʋm a yopoe; zãmsga yaa zãms yɛnga.

²⁷Nag-yãans a yopoe sẽn waglme n ka sakd gesgã sẽn pʋgã makda yʋʋm a yopoe, tɩ ka-zut a yopoe wara sẽn wãkã la sẽn pa bõonesã, bãmb me yaa yʋʋm a yopoe. Dɩlla yʋʋm a yopoe kom n na n zĩndi.

²⁸Yaa wala m sẽn yeelã, Wẽnd wilga dĩma bũmb ning sẽn na n yɩ beoogo.

²⁹Yʋʋm a yopoe n wate tɩ Ezipt tẽng na n gal ne bũmb fãa.

³⁰Yʋʋm a yopoe n na n pʋge la na n yɩɩ kom, bũmb ka na n le zĩndi, koma na n zaba tẽnga gilli.

³¹Koma sẽn na n pʋgã, la a na n zab wʋsgã na n kɩtame tɩ b yĩm tɩ Ezipt yɩɩ tɩgr tẽnga.

³²Zãmsda sẽn yɩ a yiibã wilgdame tɩ Wẽnd nengẽ bũmba fãa yals n sɛɛme la wakat yaoome.

³³Sẽn ket marsã, yaa dĩma bao ned sẽn tar yam la sɩlem t'a ges Ezipt yelle.

³⁴Bɩ dĩma bao neb n zĩndig tẽng fãa pʋgẽ tɩ yʋʋm a yopoe wã pʋgẽ, bɩ ned kam fãa rok a kood yõod a nu soaba n tall n wa bãmb nengẽ.

³⁵Yʋʋm a yopoe tɩgra pʋgẽ, b sõng n me bao tẽng fãa la b pids-b ne kood n bĩngi.

³⁶Woto, koma yʋʋm a yopoe wã pʋgẽ, b na paam n dɩ n põse.»

³⁷Goama ta-la dĩma ne a poorẽ dãmba yam.

³⁸Dĩma pʋs n yeel-b lame: «Yɛɛnẽ la d na n yãe Naaba-Wẽnd sẽn pids ninsaal ne yam wala nin-kãnga?»

³⁹Dẽ la a yeel a Zozɛf: «Wẽnd sẽn sõng foo tɩ f mi woto wã fãa, tõnd ka le ne ned a to sẽn tar yam la sɩlem wa foo ye.

⁴⁰[116†] Dɩlla foom la m na n lʋɩɩs taoore, na n yɩɩ tɩlɛ ne tẽnga rãmb tɩ b tũ fo sẽn yeela fãa. Bũmb ninga sẽn na n welg maam ne foom na n yɩɩ naama zaoor bala.»

⁴¹Dĩma le paasame: «Yɩ Ezipt tẽng soaala.»

⁴²[117†] A pidga a nug-bĩng n pid a Zozɛf, n bao fu neeba n yelg-a, n bao sãnem yãndo n pid a yubla.

⁴³A zombg-a-la a meng bilim-bilm a yiib soaba tɩ ned be a taoore n moonẽ: «Yĩgimd-y yã!» Yaa woto la a Zozɛf lebg Ezipt tẽng fãa soaala, ne Ezipt dĩma raabo.

⁴⁴Dĩma yeela a Zozɛf: «Maam la dĩma menga, la sã n ka foom n kõ noore ned ka tõe n le zẽk a nug-bil meng Ezipt tẽng ye.»

⁴⁵A teema a Zozɛf yʋʋr la ne Ezipt rãmb goama a lebga Safnat-Panea, tɩ Wẽnd n so vɩɩm. A kõ-a-la paga sẽn boond tɩ Asmat; a Asmat yaa On maan-kʋʋd, a Potifera biiga. A Zozɛf yiime n kaag Ezipt tẽnga.

⁴⁶B sẽn waa n tall a Zozɛf n wa Ezipt dĩma taoore t'a yʋʋm yaa pis-tã. A Zozɛf basa dĩma zaka n sɩng Ezipt tẽng gilgri.

⁴⁷Tẽnga sɩd woma ne a sũur fãa yʋʋm a yopoe wã pʋgẽ.

⁴⁸La yʋʋm a yopoe wã sẽn yɩ tɩgr yʋʋma, a kɩtame tɩ b tigs koodo; wetẽ dãmba koodã da watame n tigsd tẽn-bɛdẽ.

⁴⁹A Zozɛf tigsa kood zembala, wa bĩisr sẽn be mogr noore, tɩ gɛɛndb bas taale ne b geelse, la sɩda, kooda da ka tõe n mag ye.

⁵⁰Koma sẽn waa n nan ka lʋɩ tẽngã, a Zozɛf paama kamb a yiibu ne a Asmat, On maan-kʋʋd, a Potifera, bi-puglã.

⁵¹A Zozɛf pʋda a bi-kẽengã tɩ Manase, tɩ Wẽnd kɩtame t'a yĩm a naong la a buudu.

⁵²A boola a to wã, a Efrayim, tɩ Wẽnd kɩtame t'a rog kamb a yembd tẽngẽ.

⁵³Yʋʋm a yopoe tɩgrã wala Ezipt dãmb sẽn zɩ n yãend a taarã waa n loogame,

⁵⁴[118†] tɩ yʋʋm a yopoe kom wala a Zozɛf sẽn da wilgã, ledg a zĩiga. Tẽnga zãgsa wombo, ne rẽ fãa, rɩɩb ka tol n kong Ezipt tẽng ye.

⁵⁵[119†] Wara lʋɩɩme tɩ Ezipt rãmb bʋʋg dĩma n yãbd n kot rɩɩbo la a da yet-b lame: «Kẽng-y fãa a Zozɛf nengẽ, la a sẽn yet tɩ y maan bũmb ninga bɩ y maan.»

⁵⁶Yaool n da yaa dũni wã zãnga la koma lʋɩ yã; a Zozɛf kɩtame tɩ b pags bao wã tɩ Ezipt rãmb paam kood n da. Koma waa n lebga toog Ezipt tẽnga.

⁵⁷Dũni wã tõr da wata Ezipt tẽng n daad kood a Zozɛf nengẽ. Bãng-y tɩ koma da saaga dũni wã zãnga.