Read SEBR SÕNGO, 1998 Sɩngrẽ 42 Bible Online

Sɩngrẽ 42 - SEBR SÕNGO, 1998 bible

Sɩngrẽ 42

¹A Zakoob wʋmame tɩ kood bee Ezipt tẽng n koosdẽ t'a yeel a kamba: «Y sẽn zĩi n get taaba yõod la bʋgo?

²[120†] M wʋmame tɩ kood bee Ezipt tẽng n koosdẽ, kẽng-y be n tɩ ra tɩ d rɩ n paam n põse.»

³A Zozɛf kẽem dãmb piiga kẽnga Ezipt tẽnga n na n da koodo.

⁴A Zakoob pa sak t'a Bẽnzame tũ a kẽem dãmba ye. A Zozɛf ne a Bẽnzame yaa ma-biisi. A Zakoob ra yetame tɩ ka tog tɩ yell wa pak a me ye.

⁵A Israyɛl kamba tũu neb a taab n na n tɩ ra koodã tɩ koma ra bee Kanaã tẽnga.

⁶A Zozɛf da yaa na-kãsenga, da yaa yẽ nengẽ la raadba fãa da wat n daadẽ. Woto a Zozɛf kẽem dãmba sẽn taa a taoore b wõgemdame n waoog-a.

⁷A Zozɛf sẽn yãe a kẽem dãmbã, a bãng-b lame la a maana waa a ka mi-b ye, n tol gomd ne b yãas-yãasa. A sok-b lame: «Yãmb yita yɛ?» B leokame: «Tõnd yii Kanaã tẽng n wa n na n da koodo!»

⁸A Zozɛf bãnga a kẽem dãmbã la bãmb yaool n ka bãng a Zozɛf ye.

⁹[121†] A Zozɛf tẽega a sẽn da zãms b poorẽ, a yeel-b lame: «Yãmb yaa lɩɩsdba, yãmb dat n bãnga zĩig ning tõnd pãnga sẽn paoodẽ, yaa rẽ la y wa ka.»

¹⁰B naaga taab n yeele: «Ayo! Naaba, y yemsa waame bal n na n da koodo.

¹¹D gill fãa yaa ned a ye kamba, la d togsda sɩda, y yemsa ka lɩɩsdb ye.»

¹²T'a yeel-ba: «Ka sɩd ye, yaa tõnd pãng sẽn paood zĩig ning la yãmb baood n na n bãnge.»

¹³B leoka a Zozɛf: «Yãmb yemsã da yaa piig la a yiibu, ba a ye kamba, d tẽng la Kanaã. Yao-zʋʋga paa ne d ba, tõnd nin-yend bal n ka le kete.»

¹⁴A Zozɛf yeel-b lame: «Yaa wala m sẽn zoe n togsã, yãmb yaa lɩɩsdba.

¹⁵Ad sɩbgr ning m sẽn na n sɩbg yã: m wẽen ne Ezipt dĩma, yãmb kõn yi ka tɩ y ka reng n wa ne y yao-zʋʋga ye.

¹⁶Tʋm-y yãmb nin-yende t'a tɩ boaal-a t'a wa la yãmb meng pa roogẽ ka; d na ges y toagsga sã n yaa sɩda bɩ y sã n yagda zirẽ. D sẽn nan ka tar y pʋgã, m ket n wẽenda ne Ezipt dĩma tɩ yãmb yaa lɩɩsdba.»

¹⁷A kẽes-b-la roogo dasem a tãab yĩnga.

¹⁸Da-tãten-daarã, a Zozɛf yeel-b lame: «M zoeta Wẽnde la ad-y sẽn na n maan bũmb ning n pam n põse:

¹⁹sã n ya sɩd la yãmb sẽn togsã bɩ nin-yend pa ka, bi-beesa roogẽ, sẽn kell-ba na leb ne koodã n tɩ fãag y zak rãmba.

²⁰Y yao-zʋʋga na tũ yãmb n wa, woto m na bãng tɩ y togsa sɩda la y kõn ki ye.» Yɩɩ woto la a nams-ba.

²¹B ra yeta taaba: Sɩda, yaa tõnd sẽn maan d yao wã bũmb ninga n leb tõndo, tõnd yãee sũ-sãang ning sẽn da be a sũurẽ a sẽn waa n yet tɩ d maan-a sugri tɩ tõnd pa kelgã, yaa rẽ la tõnd me zĩ rũnna ne yɩɩre.

²²[122†] T'a Rubẽ yeel-ba: «M da ka yeel-y tɩ d da saag n maan d yao wã bũmb tɩ y zãgse, ad-b sẽn sokd tõnd a zɩɩm dũnna!»

²³B da ka mi t'a Zozɛf wʋmda b moora ye, woto no-rɛɛs n da be sʋk n deesd b goama n taasdẽ.

²⁴A Zozɛf zãaga ne a kẽem dãmbã n tɩ yãbe la a lɛɛg n wa b sʋka n le gom ne-ba. A yõka a Simeõ n loe wĩir bãmb fãa nifẽ.

²⁵A Zozɛf kõo noor tɩ b pids a kẽem dãmba yondo ne koodo n yaool n lebs ned kam fãa ligd n sui la b kõ-b sor zug dɩɩbo la b maana waa a sẽn wilgi.

²⁶B rɩka b koodã n zɩlg b bõeense la b loogame.

²⁷B sẽn ta b sikẽ, yʋngo, tɩ bãmb nin-yend lok a yolgo n na n yãk kood n kõ a bõanga, a yãee ligd a yolga pʋga.

²⁸T'a na n yeel a ba-biisã: «B lebsa maam m ligdi, b sui-a-la m yolgẽ wã.» B pɛleng yɩka wʋsgo tɩ b get taaba la b rigda la b yetẽ: «Yaa bõe la Wẽnd maan tõnd woto?»

²⁹B ta-la b ba-yiri, Kanaã tẽnga la b togsa b ba bũmb ning fãa sẽn maane.

³⁰B yeelame: «Tẽnga dĩma maana mo-beed ne tõndo, a mamsa tõnd ne lɩɩsdba.

³¹Tɩ tõnd yeel: ‹Tõnd yaa neb sẽn togsd sɩda, tõnd ka lɩɩsdb ye.

³²Tõnd yaa piig la a yiibu, ba a ye kamba; a ye n ka be la yao-zʋʋga paa yiri, Kanaã tẽnga, ne d ba.›

³³Sẽn dɩta naam tẽnga pʋgẽ da ratame n bãng tõnd sã n togsda sɩda la a yeelame: ‹Bas-y yãmb nin-yend ka n kul ne kood n tɩ kõ y yir dãmba tɩ b tara a tʋʋmde;

³⁴la lɛɛg n wa-y ne yãmb yao-zʋʋgã tɩ m na bãng tɩ y ka lɩɩsdb ye la y togsa sɩda; dẽ poor marsã m na lebs y nedã la y na tõog n da y sẽn dat bũmb ninga fãa tẽnga pʋgẽ.› »

³⁵B zuka b yondo la b yãeeme tɩ ned kam fãa ligd da bee pʋgẽ, tɩ rabeem na n yõk-ba, bãmb ne b ba, a Zakoob

³⁶B ba a Zakoob yeel-b lame: «M kamb a yiib n ka ye, a Zozɛf ka ye, a Simeõ me ka ye, tɩ yãmb le rat a Bẽnzame n paase, yaa mam zug la yɛla fãa lʋɩta, dẽ fãa yaa mam zu-beedo!»

³⁷Dẽ la a Rubẽ leok a ba: «F na kʋ m kamb a yiibã, m sã n ka lɛɛg n wa ne a Bẽnzame, gũnug maam a Bẽnzame tɩ m na tall-a n wa lebs-fo.»

³⁸A Zakoob baas n yeelame: «Mam biiga kõn tũ yãmb ye. A kẽema kiime n bas yẽnda a ye, y sã n dɩk y sorã tɩ yell tek n pak-a, ad-y m kʋʋlma la sũ-sãang kãsenga na n kʋ-m lame.»