Read SEBR SÕNGO, 1998 Sɩngrẽ 43 Bible Online

Sɩngrẽ 43 - SEBR SÕNGO, 1998 bible

Sɩngrẽ 43

¹Koma da ket n zabda ne tẽnga rãmba.

²B sẽn yi Ezipt n wa ne kood ninga sɛɛme la b ba yeel-b lame: «Leb-y n tɩ ra kood n wa!»

³A Zɩɩda leokame: «Dao wã wilga tõnd neere t'a kõn le sak tɩ d wa a taoore, d yao-zʋʋga sã n ka be ne tõnd ye.

⁴Fo sã n sak t'a tũ, bãng tɩ tõnd na leb Ezipt tẽng n tɩ ra koodo.

⁵F sã n ka na n sak t'a tũ, tõnd me kõn leb ye; raoã togsame: ‹M ka rat n le yãend-y m taoore tɩ y yao wã ka be ne y ye.› »

⁶A Zakoob yeelame: «La ãnda n yeel tɩ y wɩbg-ma n tãag n togs raoã tɩ y yao-zʋʋg a ye n kete?»

⁷Tɩ b leoke: «Yaa a sẽn sok tõnd d buuda poorẽ: ‹Y ba ket n vɩɩme, y tara yao a to?› Yaa rẽ yĩng la tõnd me togs yã; ãnna n da tõe n bãng t'a na yeele: ‹Wa-y ne y yao wa?› »

⁸A Zɩɩda yeela a Israyɛl: «Bas tɩ m loog ne biigã, d yik n dɩk sor n paam n põse, tõnd ne d sẽn get b rãmb yelle.

⁹A Bẽnzame yell doga m zugu, m sã n ka lɛɛg n wa ne-a, bɩ f sok-ma, m sã n ka lɛɛg n wa ne-a tɩ f yãend-a ne f nifu, bɩ m dɩ rẽ taal m vɩɩma fãa pʋgẽ.

¹⁰Tõnd sã n da ka ka kaoosẽ yiibu, marsa sekẽ la d ta la d lɛɛg n waẽ.»

¹¹La kamba ba, a Israyɛl, yeelame: «Kẽnda sẽn ya tɩlɛ wã, bɩ y maan woto: bao-y tẽnga bõn-sõma buud fãa n zɩ n tɩ kõ raoã; kaam sẽn tar n sõod nenga, seem buud toor-toore la sɩɩdo.

¹²Zɩ-y ligd y kordẽ la y rɩk pĩnd ligdã n paase tɩ daare yɩɩ tudgri.

¹³Deeg-y y yao wã la yik-y n leb raoã nengẽ.

¹⁴La Wẽnd-Pãng-Soaba na kɩt t'a maan y yardo la a bas-y tɩ y lɛɛg n wa ne y yao, a Bẽnzame; m sã n na n dɩ m kamba bõne bɩ m dɩ.»

¹⁵B sɩd yii ne b kũuna, ne b bõeensã, ne b ligdã, n tɩ sig Ezipt tẽnga la b ta-la a Zozɛf taoore.

¹⁶A Zozɛf sẽn yãe a kẽem dãmba ne a Bẽnzame, a yeela a sõgen kãsenga: «Tall-y-ba n kẽ zakẽ; kʋ-y rũng n segl, tɩ wĩntoogã b na n dɩɩ ne maam.»

¹⁷Sõgna maana wala a Zozɛf sẽn yeele n tall-ba n kẽes zakẽ.

¹⁸B sẽn waa n tar-b n dabdã, dabeem yõk-b lame; la b ra yeta taaba: Ad-y yaa ligdã sẽn pa tõnd yonnẽ wã yĩnga la b tar tõnd n dabd a Zozɛf yiri, b na n kãaga tõnd n kẽes yembdo la b reeg d bõeense.

¹⁹B sẽn kolg zaka noore b yeela a Zozɛf sõgen kãsengã:

²⁰«Y kabre, d zu-soaba! Tõnd zoe n waa ka vugri n da koodo.

²¹Tõnd sẽn lɛɛg n kuisẽ, d sẽn ta d sik zĩigẽ, n pak d yondo, ned kam fãa yãeeme tɩ ligda keta a zĩigẽ tɩ tõnd le tar-a n watẽ.

²²D waa ne ligd me n na n le ra koodo tɩ sɩda tõnd ka bãng sẽn ya ned ning n lebs ligda yonnẽ wã ye.»

²³Sõgen-kãsenga leok-b lame: «Gãneg-y y yam, da maan-y rabeem ye tɩ yãmb Wẽnd la y ba Wẽnd n ning arzɛk y yonnẽ, sã n ya maam, m da reega m ligdi.» A kẽe n waa ne a Simeõ.

²⁴Sõgna tɩ kẽes-b-la a Zozɛf zakẽ n tall koom n wa tɩ b waas b nao, n tall yamd n wa tɩ b kõ b bõeense.

²⁵B yiisa b kũuna n dɩgl n gũud a Zozɛf waoongo, wĩnto-sʋka, tɩ b waa n bãngame tɩ b na n dɩɩ ne yẽnda.

²⁶A Zozɛf waa yiri tɩ b yiis b kũuna n kõ-a la b wõgemda tẽng n waoog-a.

²⁷A reega b pʋʋsem neere la a sok-b lame: «La nin-kẽema, yãmb sẽn gom mam a soab yellã, a ket n vɩɩme?»

²⁸Tɩ b leoke: «Tõnd ba, yãmb yamba, bee ne laafi, a ket n vɩɩme.» La b le yĩgimdame, b le wõgemdame.

²⁹A Zozɛf zẽka a nin n yãe a yao, a Bẽnzame, a ma biiga, la a sokame: «Woto la yãmb yao-zʋʋga bɩ, yaa yẽ yell la y sẽn da leok maama bɩ?» Dẽ poore a yeela a Bẽnzame: «Wẽnd na sõng fo, m biiga!»

³⁰A Zozɛf zoe n yiime, a sẽn yãee a Bẽnzame t'a sũur rigimd t'a nin kalsd nintãm, a kẽ-la a roogẽ, la be, a yãbame.

³¹A peka a neng n lɛɛg n yi la a tõoga a meng n yeele: «Wa-y ne rɩɩba.»

³²B waa ne a Zozɛf rẽnd toore la Ezipt rãmba rẽnd me toore tɩ Ezipt rãmb ka sakd n dɩ ne Ebre rãmb ye, dẽ yaa b kisgu.

³³A Zakoob kamba ra zĩ-la a Zozɛf taoore la a Zozɛf ra zĩndig-b-la kãseng-kãsengo, n sɩng kẽema n ta yao-zʋʋgã la rẽ yɛɛs-b lame.

³⁴A Zozɛf kɩtame tɩ b yãk rɩɩb yẽ meng laagẽ n kõ-ba la a Bẽnzame pʋɩɩrã yɩɩga a taab naoor a nu. B naaga a Zozɛf n yũ la lebga laa-n-kaase.