Read SEBR SÕNGO, 1998 Sɩngrẽ 45 Bible Online

Sɩngrẽ 45 - SEBR SÕNGO, 1998 bible

Sɩngrẽ 45

¹ [123†] A Zozɛf ka tõog n le yõk a meng a neba taoor ye, a yeelame: «Y fãa yi yɩnga!» Sɩda, a Zozɛf sẽn waa n na n vẽneg a meng a ba-biisã, sãan ba a ye ka zĩnd sʋk ye.

²A Zozɛf da yãbdame tɩ yita, tɩ Ezipt rãmb tol n wʋme, t'a yãbra kibar tol n ta Ezipt dĩma menga.

³A Zozɛf yeela a kẽem dãmba: «Maam la a Zozɛf. M ba wã ket n vɩɩme?» La a ba-biisã ka tõog n leok ye tɩ b pɛleng yɩkame.

⁴T'a Zozɛf yeel-ba: «Kolg-y!» La b kolgame, t'a paase: «Maam la a Zozɛf, y yao ninga y sẽn koos ne Ezipt rãmbã.

⁵Marsã, da sãam-y y sũur ye, da ges-y yãmb sẽn koos maama wa wẽng tɩ loog ye, tɩ yaa yãmb fãagr yĩnga la Wẽnd kɩt tɩ m deng yãmb taoor ka.

⁶Yaa yʋʋm a yi rõanna la kom lʋɩ tẽngã la yʋʋm na n kell m maana a nu tɩ koob pa na n ko ye, tɩ tigsgu pa na n tigs ye.

⁷Wẽnnaam tʋm-m-la yãmb taoore, sẽn na n yɩlẽ tɩ d buuda kɩ yẽgende la wʋsg paam n põse.

⁸Dɩlla ka yãmb n tʋm maam ka ye, yaa Wẽnnaam, la b kɩtame tɩ m lebg nin-kãsenga, dĩma zakẽ, la m get Ezipt tẽng fãa yelle.

⁹Leb-y y ba nengẽ tao-tao la y yeel-a: ‹F biiga Zozɛf koɛɛg la woto: Wẽnd kõo maam naam Ezipt tẽnga, wa m nengẽ tao-tao.

¹⁰M na n kẽes-f-la Gosen tẽnga la f na n zĩnda be foo ne f kamba, la f yagense, la f rũmsi, la f sẽn so fãa.

¹¹[124†] Beene m na sõng-y ne rɩɩbo, m na sõng tɩ foo ne f zaka la f sẽn so fãa da wʋm far ye. Koma na n kell n kaoosa yʋʋm a nu.› »

¹²A Zozɛf paasame: «Yãmb meng nin neeme la m yao a Bẽnzame nee ne a nin tɩ yaa mam meng m toore n gomd ne-yã.

¹³Tɩ togs-y m ba t'a bãng naam ning m sẽn dɩt Ezipt tẽnga, la y sẽn yãe bũmb ning fãa. Sõng-y tɩ m ba wã wa tao.»

¹⁴A wudg n mobga a Bẽnzame la a tar yãbre; a Bẽnzame me mobg-a lame la a yãbame.

¹⁵A mobga a kẽem dãmba fãa ne nintãm la b waa n zĩndame n sõse.

¹⁶Dĩma me wʋmame t'a Zozɛf kẽem-dãmbã n wa, la rẽ yɩ-la a sũ-noogo, yẽ ne a poorẽ dãmba.

¹⁷A goma ne a Zozɛf woto: «Yeel f kẽem-dãmbã: ‹Zɩlg-y bõeensã n leb Kanaã

¹⁸n peeg y ba la buuda zãng n wa ka, m na bao zĩ-sõng Ezipt tẽng n kõ yã tɩ tẽnga sɩɩlma n na n yɩ y rɩɩbo.›

¹⁹La foom, Zozɛf, kõ b no-kãnga: ‹Zɩ-y bilim-bilm ka, n tɩ sagl y pagba, y kamba la y ba, n wa.›

²⁰Yãmb sẽn na n bas bũmb ning fãa Kanaã da ges-y rẽ wa bõne koe; sẽn ya neer la sõng fãa Ezipt tẽnga, na n yɩɩ yãmb soolem.»

²¹Ad-a Zakoob kamba sẽn maane: a Zozɛf bao bilim-bilm n kõ-ba wala dĩma meng sẽn wilgã. A kõ-b-la sor dɩɩb me.

²²A kõo ned kam fãa kibs fuugu. Sã n yaa a Bẽnzame, yẽ reega wakɩ koeems kobs-tã la kibs fut a nu.

²³A kɩtame tɩ b bao Ezipt te-sõma n zɩlg bõeens piiga la bõn-yãans piig sẽn na n tʋk koodo la buri la bãmb ne b ba wã sor zug rɩɩbo.

²⁴A basa a kẽem dãmbã tɩ b looge la a yeel-b-la woto: «Sor zugu, da wẽ-y no-koɛɛm ye!»

²⁵B yii Ezipt tẽnga n lɛɛg n wa Kanaã, b ba, a Zakoob, nengẽ.

²⁶B yeel-a lame: «A Zozɛf ket n vɩɩme, pʋs n yaa yẽ n so Ezipt tẽnga.» A sũur pa kiuus ye, t'a pa tẽ b goama ye.

²⁷B sẽn wa n togs a Zozɛf sẽn yeel bũmb ninga fãa, a sẽn waa n yãe bilim-bilm a Zozɛf sẽn toole, yẽnda rɩkr yĩngã, raood le waame.

²⁸T'a yeele: «A Zozɛf sã n ket vɩ, rẽ seka maam, m na kẽng n tɩ yãend-a ne m nifu la m yaool n ki!»