Read SEBR SÕNGO, 1998 Sɩngrẽ 48 Bible Online

Sɩngrẽ 48 - SEBR SÕNGO, 1998 bible

Sɩngrẽ 48

¹B waa n yeela a Zozɛf: «Y ba wã ka keem ye.» A Zozɛf kẽnga ne a kamb a yiibã: a Manase la a Efrayim.

²B sẽn waa n yeel a Zakoob woto: «Ad-f biig a Zozɛf n wa n na n ges fo»,

³a yeela a Zozɛf: «Wẽnd-Pãng-Soaba lik-m-la Luz, Kanaã tẽnga la b ning-m-la barka.

⁴[129†] B yeela maam: ‹M na kɩt tɩ f rog kamba, n lebg wʋsgo n kẽ tẽns ka tɛka la m kõt-f-la tẽn-kãnga; foom ne f kamba n na n soog-a daar fãa.› »

⁵A Zakoob paasame: «Fo kamb a yiib sẽn dog Ezipt tẽnga dẽ tɩ m nan ka babs foom, bãmb na m yii mam soolem. A Efrayim ne a Manase na n yɩɩ mam kamb wala a Rubẽ la a Simeõ sẽn ya mam kamba.

⁶Kamb niyns sẽn pʋg b bãmbã, bãmb na n yɩɩ fo soolem. B sã n bool-b tɩ b wa reeg b pʋɩɩr buuda sʋka, yɩta b kẽem dãmba maasem yĩnga.

⁷ [130†] F ma a Rasɛl tees n ki sor zugu, m sẽn yi Padã, Kanaã tẽnga, sẽn waa n ket bilf bala tɩ d ta Efrata, la b mum-a-la Efrata sor zugu: Efrata yaa Bɛtelyɛɛm.»

⁸A Israyɛl yãee a Zozɛf kamb a yiibã n soke: «Woto yaa ãnd dãmba?»

⁹T'a Zozɛf leok-a: «Yaa Wẽnd sẽn kõ-m kamb nins Ezipt tẽng ka.» T'a Zakoob na n yeele: «Kolg ne-ba tɩ m ning-b barka.»

¹⁰A sẽn da kʋʋl wʋsg yĩngã, a Israyɛl nina da ka le ne neer ye. A Zozɛf kɩtame tɩ kamba kolg b yaaba t'a na n mobg-ba la a mok-ba.

¹¹A Israyɛl yeela a Zozɛf: «M da pa tẽed tɩ m na le yãend foom, mik Wẽnd maaname tɩ m na n tol n yãend f kamba.»

¹²A Zozɛf veooga kambã n leb poorẽ, n paam n wõgemd n kɩ a neng tẽnga.

¹³A Zozɛf le gãda kambã, a gãda a Efrayim ne a dɩtgo n yals a Zakoob goabga, n gãd a Manase ne a goabga n yals a Zakoob dɩtgo la a kɩtame tɩ b kolge.

¹⁴A Zakoob tẽega a dɩtgo n tik a Efrayim zugu; a Efrayim la yao, n yaool n tẽeg a goabg a Manase zugu, la yẽnda la kãsma. Yɩɩ modgr t'a Israyɛl nus kalemd taaba.

¹⁵A ninga a Zozɛf roog bark woto: «M ba a Abraam la a Izaak sẽn tũ Wẽnd ningã, Wẽnd ninga sẽn yɩ a mam gũuda, m dogem tɛka

¹⁶n paas malɛk ninga sẽn fãaga maam yel-pakr buud fãa pʋgẽ, ning kom-kãensa barka! B yɩ maam la a Abraam la a Izaak yʋʋr tẽegre, b wek balbo n pid tẽnga!»

¹⁷A Zozɛf yãeeme t'a ba rɩka a rɩtgo n tik a Efrayim zugu t'a sũur ka yɩ noog ye. Dẽ la a gãd a ba nug, t'a ra tik a Efrayim la a tik a Manase.

¹⁸A Zozɛf yeelame: «Ka woto ye, m ba, yaa a Manase la kãsma, dɩlla tik a zug ne f rɩtgo.»

¹⁹A ba wã zãgsame n yeele: «M miime, m biiga, m miime. Yẽ me buud na n yɩɩ yalengo, a me na a yɩɩ nin-kãsenga, baasgo a yao wã na n yɩɩg-a lame, a yao wã buuda na n yɩɩ zãma ka tɛka.»

²⁰[131†] Badaare a ning-b-la bark woto: Israyɛl kamb sã n dat n kãab ned noogo, yãmb yʋʋra la a na n pʋd n yeel woto: «Wẽnd puk b nonglma ne foo wala b sẽn puk-a ne a Efrayim la a Manase!» A Efrayim yʋʋrã n deng taoore.

²¹A Zakoob yeela a Zozɛf: «Mam na n kiime la Wẽnd bee ne yãmba la b na n wa lebs-y-la y ba rãmb tẽngẽ.

²²M paasda f pʋɩɩre, woto f na yɩɩg f kẽem-dãmbã. M sẽn paas f pʋɩɩr ningã, yaa m sẽn zab ne sʋʋga la tãpo n deeg Amoritsa nusẽ.»