Read SEBR SÕNGO, 1998 Sɩngrẽ 49 Bible Online

Sɩngrẽ 49 - SEBR SÕNGO, 1998 bible

Sɩngrẽ 49

¹A Zakoob boola a kamba fãa n yeel-ba: «Tigim-y taab tɩ m wilg-y yɛl niyns sẽn wate.

²Zakoob kamba, kolg-y n kelge, n kelg y ba koɛɛga!

³Rubẽ, foom la m bi-kẽenga, m doga foom m sẽn waa n ya bi-bɩɩga, n wɩɩd ne pãnga. Foom n pid ne gãndalsem, foo n pid ne gãbe.

⁴F zoeta ne pãnga wa kʋɩl-kẽeng koom, la fo kõn soog kãseng ye, tɩ fo beega f ba n dʋʋ a gãaga n dẽgem-a.

⁵A Simeõ ne a Levi, sɩd yaa ma-biisi; bãmb nengẽ, yell fãa welgda ne pãng la sʋʋga,

⁶m yam kõn yals ne b sẽn sed bũmb ning ye, b yẽsgo zĩigẽ m kõn zĩnd sʋk ye; tɩ b yika b sũuri n kood ninsaalba, n yik ne pʋ-toogo n pãs lols gĩini.

⁷Wẽnd loog ne b sũ-puurã t'a yõsga nugu la b sũ-kãbrã t'a ka be taar ye. M na n pʋɩ-b-la a Zakoob buud sak woo saka, mam na n sẽeg-b-la a Israyɛl vẽenemẽ.

⁸Zɩɩda, foo la f ba-biis na n pẽge f nug na wẽoog f bɛɛba yubla, f ba-biis na wõgemd f taoore.

⁹ [132†] Zɩɩda fo yaa Gɩgemd bila. M biiga kẽnga zabre n lɛɛg n watẽ, A põda a rũmdi, n gãand wa bõnyẽega, wala bõnyẽ-yãanga, ãnda n na n pĩng-a t'a yiki?

¹⁰Naam dasaar kõn serg a Zɩɩda sɛɛgẽ ye. Naam dasaar kõn yi a toaagẽ ye, al n tol n ta a zu-soaba waoongo; n ta tẽnsa sẽn tog n deeg a soab noora waoongo.

¹¹Bugsuntung la a loet a bõn-bila, tɩ-womdg will la a loet a bõn-yaanga biiga. A pekda a fuug sib rãamẽ, a sogemda a fu-bila sib zɩɩmẽ.

¹²A nin mooga ne sib rãam, a yẽna pelga ne bĩisim.

¹³A Zabulõ zĩi mogr noore n so koom-kogendã sẽn tedgã, n yɛdga a toaag n tat Sidõ.

¹⁴A Isakar yaa bõn-daoog sẽn be gãbe; lals a yiib n me n gũbg a roogo.

¹⁵A mikame t'a gãag noom-a. A mikame tɩ tẽng bʋgsa, a zõondame t'a po-raoog reeg zɩɩbo, t'a na n tʋm yem-daad tʋʋma.

¹⁶A Dã na n dɩɩ naam a buudẽ a na n ges-a-la wa sẽn tog ne a Israyɛl saka.

¹⁷A na n yɩɩ wa waaf sẽn dɩg sor zugu, wa põeer sẽn dɩg so-bukẽ, yẽ n na kɛ weefa karga, tɩ wed-dʋʋda na n bidg n lʋɩɩ zãmbɛɛla.

¹⁸Yãmb sõngr la m teeg yã, Soaala-Wẽnde!

¹⁹Sã n yaa a Gad, fãadb n waa n fã-a tɩ yẽ me yik n digdẽ n na n deeg a teedo.

²⁰A Asɛr sũur noom ne a rɩ-kaam t'a rõosd a miisd dĩm dãmb yĩnga.

²¹A Neftali yaa yĩsr sẽn gõod weoog a yam, n dogd a kom neeba.

²²A Zozɛf yaa lʋlle, [133] Lʋll sẽn be koom noore; b sã n kẽesa yãgrẽ la a sẽn gãndgde n yi.

²³B bao-la a noore, n maan zabr ne-a. Tãb-biis n yik n tak zabr ne-a,

²⁴la a tãpa pa fãag a nugẽ a sẽn waa n ligind a bɛɛba ye, A Zakoob Wẽnnaam nug n tʋm dẽnna, a Israyɛl Gũuda, a Pĩiga, a Israyɛl Lillã n tõog rẽnna.

²⁵Bɩ f saam-dãmba Wẽnnaam, bɩ f Soaala, wa sõng fo! Bɩ bark tũ Wẽnnaam-Pãng-Soaba nug n sigi! B ning yĩngr saaga barka, n ning vɩʋʋga sẽn yɛdg tẽnga barka, n ning roagseng barka, n ning bĩisr barka.

²⁶F kood paam bark b puudẽ la b biisẽ; biisa pelg ne tãms sẽn kʋʋl b gãagẽ, sẽn kõn sirg abada! Barka sig a Zozɛf zugu, tɩ Wẽnd welga yẽ toore!

²⁷A Bẽnzame yaa digd-n-yĩidga, yibeoogo a wãbda a sẽn bri, zaabre a pʋɩta a te zɛɛdem.»

²⁸Israyɛl buud sags piig la a yi wã sɩngr la woto. Yaa woto me la b ba gom yã, a sẽn waa n ningd barka. Ned kam fãa reega bark ninga a sẽn tog ne a soaba.

²⁹A Zakoob yaool n kõ a kamba noor kãnga: «Mam na n tɩ saka m saam-dãmba; y na n mum-m-la tãng bokẽ la boka bee Ititga a Efrõ pʋ-wɛɛgẽ;

³⁰[134†] yaa Mambre sɛɛgẽ, Kanaã tẽngẽ. A Abraam da raa pʋʋgã ne a ligdi, Ititga a Efrõ nengẽ.

³¹[135†] Yaa be la b mum a Abraam ne a Sara, be la b mum a Izaak ne a paga, a Rebeka, la yaa be la m mum a Lea.

³²Yaa pʋʋga ne tãn-bokã la a Ɛt kamba da koos yã.»

³³[136†] A Zakoob sẽn togs a koeesa fãa n sɛ, a kolemda a nao a gãagẽ la a kiime la a saka a saam-dãmba.