Read SEBR SÕNGO, 1998 Sɩngrẽ 50 Bible Online

Sɩngrẽ 50 - SEBR SÕNGO, 1998 bible

Sɩngrẽ 50

¹A Zozɛf dĩ-la a ba, n tar-a mogsgo la yãbre.

²A Zozɛf kõo sẽn tɩpdba noore tɩ b segl a Zakoob yĩnga la b waa ne b kaam.

³Seglga kaoosa dasem pis-naase, yaa boto la b ra maanda. Ezipt rãmb yãba a Zakoob kʋʋr dasem pisopoe.

⁴La kʋʋra sẽn waa n yãb n sɛ, a Zozɛf goma woto ne na-yira dãmba: «Yãmb sã n dat n maan-m neere, m kotame tɩ y taas dĩma m kõe-kãnga:

⁵[137†] ‹A sẽn waa n na n ki, m ba kɩtame tɩ m wẽene tɩ yaa Kanaã tẽnga, yaoog ning a sẽn da segla pʋga, la m na n mum-a.› Sẽn ya woto wã, m kota sor n tɩ mum m ba beenẽ la m lɛɛg n wa.»

⁶Dĩma leokame: «Kẽng-y n tɩ mum-a be wala a sẽn kɩt tɩ y kãabe.»

⁷A Zozɛf looga a ba wã mumbu la na-yir dãmba ne b poorẽ dãmba, Ezipt kombɛɛmba fãa tũume.

⁸A Zozɛf yira rãmb fãa, a kẽem dãmba, a ba wã zaka fãa, yãag-a lame. Kom-bõoneg la rũmsa bal n pa Gosen.

⁹A Zozɛf kẽe bilim-bilm pʋga. Sẽn maan-b wa yẽnda me yɩɩ wʋsgo. Sɩd yɩɩ nedgo.

¹⁰B sẽn ta zɛɛg sẽn boond tɩ Gõaag zɛɛgẽ, Zʋrdẽ kʋɩlg rʋʋnde, b le kelma kʋʋre la b yãba dasem a yopoe.

¹¹Kanaã tẽng rãmb wʋma kʋʋra rãamd Atad sɛɛgẽ, la b yeelame: «Woto yaa Ezipt rãmb kʋʋr meng-menga!» La b pʋda zĩ-kãng Abɛl-Misrayim, Ezipt rãmb kʋʋre; yaa Zʋrdẽ rʋʋnd la be.

¹²A Zakoob kamba maana a kʋʋr wala a sẽn da kõ-b noore.

¹³[138†] B tall-a lame n kẽng Kanaã tẽnga n tɩ mum-a Makpela tãnga bokẽ, a be Ititga a Efrõ pʋ-wɛɛgẽ la yaa pʋ-kãng la a Abraam da ra yaad yĩnga, Mambre sɛɛgẽ.

¹⁴A Zozɛf sẽn mum a ba, a lɛɛg n waa Ezipt tẽnga ne a ba-biisa fãa la sẽn yãag-b yẽnda wã fãa.

¹⁵A Zakoob kũuma poore, a Zozɛf kẽem dãmba yeela taaba: «Sãnd marsã a Zozɛf ka na n tug beem n dol wẽng ning d sẽn maan-a wã?»

¹⁶B tʋmame tɩ b yeel a Zozɛf: «Yãmb ba sẽn waa n na ki a yeel-d-la woto:

¹⁷‹Tɩ yeel-y yã a Zozɛf: Maan yardo, kõ f kẽem dãmbã b yel-wẽndã la b beegra sugri.› Yĩm b sẽn maan-f bũmb ning fãa, tɩ b tũuda Wẽnd ning sẽn yɩ f yaab rãmb Wẽnde.» A Zozɛf sẽn wʋm b goama, a yãbame.

¹⁸A kẽem dãmba kolgame n wõgemd a taoore n yeel-a: «Tõnd yaa fo yem-daado!»

¹⁹T'a Zozɛf na n yeel-ba: «Bas-y rabeem tɩ Wẽnd la Bʋ-kaooda la m kõn deeg b zĩiga n kao y bʋʋd ye.

²⁰Yãmb sẽn da tʋlg maam ne wẽng ningã, Wẽnd kɩtame tɩ neer yi a pʋgẽ wala d fãa sẽn ne rũnna; yaa bu-yaleng n tũ rẽnna n paam fãagre.

²¹Dɩlla bas-y rabeem, m na ges yãmb ne y zak rãmb yelle.» A Zozɛf maasa b sũur ne gom-nood kãensa.

²²Yɩɩ woto la a Zozɛf ne buuda zãng pa Ezipt tẽnga. A Zozɛf kaoosa yʋʋm koabg la piig tẽng zugu.

²³A Efrayim yagensa doga a nifẽ, a paam n deega a naoẽ, a Makir kambã, a Manase yagense.

²⁴A Zozɛf yeelame: «M na n loogame, la daar a ye, Wẽnnaam na n wa ges-y lame, la b na n yiis-y-la tẽn-kãnga n lebs y tẽng ning b sẽn kãab y yaab rãmba, a Abraam, a Izaak la a Zakoob.»

²⁵[139†] A Zozɛf kɩtame t'a ba-biisa wẽene: «Ezipt yiib wakato y kõn loog n bas m kõaba ka ye.»

²⁶A Zozɛf ki-la a yʋʋm koabg la piiga. B segla a mumbu ne kaam sẽn tar yũ-noogo, n sagl-a a kug koglgẽ, n mum-a.