Read SEBR SÕNGO, 1998 Sɩngrẽ 9 Bible Online

Sɩngrẽ 9 - SEBR SÕNGO, 1998 bible

Sɩngrẽ 9

¹ [34†] Wẽnd ninga a Nowe ne a kamba barka n yeel-ba: «Dog-y la y wek n pid tẽnga.

²Bɩ rũmsa buud fãa rig rabeem y taoore: yĩngr luiili la tẽng bõn-yood fãa, mogr zĩm fãa. M dɩka b fãa n sagl y nugẽ.

³Bũmb ning fãa sẽn vɩ la a kẽnd tẽng zugu na n lebga yãmb dɩɩbo; m kõt-b-la yãmb wala m sẽn kõ-y vã-maasã.

⁴[35†] Y sẽn pa tõe n dɩ bala yaa nemd sẽn ket ne zɩɩm, [36] ne vɩɩm.

⁵Ninsaal zɩɩm pa raagde tɩ m pa sok ye. M na sok rũnga, m na sok ninsaal fãa sẽn daag zɩɩm. Ninsaal yõor sã n yãke, m na soke.

⁶[37†] Ned ninga fãa sẽn daaga ninsaal zɩɩm bɩ b raag yẽ me zɩɩm. Ninsaal yaa naande sẽn tar Wẽnnaam wẽnego.

⁷ [38†] Dog-y la y wek n pid tẽnga. Lebg-y wʋsgo n pid-a n saage.»

⁸Dẽ poore Wẽnnaam goma ne a Nowe la a kamba woto:

⁹«M yõgda zood ne yãmb la y yagens sẽn na n dog y poorẽ,

¹⁰ne bõn-vɩɩli wã fãa sẽn be-b ne yãmba: luiili, rũmsi, we-rũmsi, sẽn naag b yãmb n yi koglga pʋg fãa, tẽnga rũms fãa.

¹¹M yõgda zood ne yãmba. Sa-kẽeng kõn le ni n kʋ bõn-vɩɩl ba a ye, sa-kẽeng kõn le ni n wã dũni zãng ye.»

¹²Wẽnnaam le paasame: «Ad makr sẽn ka na n tol n le viig, makr tɩ zood n be sʋka, maam ne yãmb la bõn-vɩɩli wã fãa sẽn be ne yãmba sʋka;

¹³m ningda saag-gomtɩʋʋg yĩngri t'a yɩ tõnd zooda makre, maam ne tẽnga zooda makre.

¹⁴M sã n wa tigim sawatã tɩ b na n ni, saag-gomtɩʋʋg na puki,

¹⁵la m na tẽeg zoodã m sẽn yõg ne yãmb la bõn-vɩɩl buud fãa, la kooma kõn le yɩ ko-kẽeng n yãk yõor abada.

¹⁶Saag-gomtɩʋʋga sã n puk yĩngri, m na yãend-a la m na tẽeg zood ning maam a Wẽnd sẽn yõg ne bõn-vɩɩl fãa sẽn be tẽng zugu.»

¹⁷Wẽnnaam le yeela a Nowe: «M zood ne sẽn vɩ-a tẽng zug fãa makr la saag-gomtɩʋʋgã.»

¹⁸A Nowe kamb sẽn naag b yẽnda n yi koglga pʋg yɩ-la a Sɛm, a Kam la Zafɛt. A Kam la a Kanaã ba.

¹⁹Bãmb b tãabã n yɩ a Nowe kamba la yaa bãmb n wek zulum wekre n pid moogo.

²⁰A Nowe n yɩ pipi n sɩng tẽnga koobo. A waa n sela bugsuntungu.

²¹A waa n yũu bugsuntunga rãama n lʋɩ, n gãe a zaal a roogẽ.

²²Kanaã rãmb yaab a Kam kẽe n mika a ba a zaala t'a yi n wilg a ba-biisã.

²³A Sɛm ne a Zafɛt rɩka a Nowe fu-yorgã n palg b bãko n tar po-tula n wa lud b ba; b sẽn kẽn po-tulã b pa yãend b ba sẽn yaa a zaal ye.

²⁴A Nowe sẽn neke, a bãnga a kamba yao zʋʋga sẽn maane.

²⁵A yeelame: «Wẽnd na yãk a Kanaã barka, Wẽnd na kɩt t'a lebg sõgne a kẽema la a yao wã sõgen-kamba sõgne.»

²⁶A le paasame: «Soaala, a Sɛm Wẽnda paam pẽgre! Wẽnd na kɩt t'a Kanaã yɩ a sõgne!

²⁷Wẽnd na kɩt t'a Zafɛt ne a Sɛm zems taaba, Wẽnd na kɩt t'a Kanaã yɩ a Zafɛt yem-daogo!»

²⁸Ko-kẽenga poore, a Nowe vɩɩnda yʋʋm kobs-tã la pis-nu.

²⁹A Nowe yʋʋma zãng yɩɩ kobs-wɛ la pis-nu t'a yaool n ki.