Read SEBR SÕNGO, 1998 2SAMWƐL 10 Bible Online

2SAMWƐL 10 - SEBR SÕNGO, 1998 bible

2SAMWƐL 10

¹Dẽ poore, Amonitsa naaba kiime t'a biiga, a Anun, led a zĩigẽ n dɩt naam.

²A Daviid yeelame: «Mam na n lebsa a Naas biiga a Anun yel-sõm niyns a ba sẽn maan maama.» A Daviid tʋma sõgen-kamba tɩ b tɩ pʋʋs a ba wã kʋʋre. A Daviid sõgen-kamba sẽn ta Amonitsa tẽngẽ,

³Amonitsa na-biis yeela b zu-soaba, a Anun: «Yãmb tẽedame tɩ yaa a sẽn dat y saamba waoogre la a Daviid sẽn tʋm tɩ b wa pʋʋs a kʋʋra bɩ? Pa sẽn na n yɩ bala n tõog n bãng d tẽngã, n bãng a pãnga sẽn be zĩig ninga, n wa lub-a, ka rẽ la a Daviid tʋm a sõgen-kamba sɩda?»

⁴T'a Anun na n yõg a Daviid sõgen-kamba n kɩt tɩ b wõrs b toeemsã bogre la b wõrs b futã n zems b kɩgba, n yaool n kõ-b sor tɩ b kuli.

⁵A Daviid sẽn wʋm yellã a tʋma neb tɩ b seg-ba, tɩ bala yãnde n da tar nebã; dĩma kɩtame tɩ b yeel-ba: «Pa-y Zeriko al tɩ y toeemsa wa yi sõma tɩ y yaool n wa.»

⁶Amonitsã mikame tɩ b sẽn maan woto wã b rɩɩ beem ne a Daviid. Woto wã b tʋma neba sẽn na n tɩ yao Aramsã ligdi tɩ b wa sõng-ba. Bɛt-Reob la Soba Aramsã yɩɩ tãb-biis tus pisi, n paas Maaka dĩma tãb-biis tusri. Tob dĩma yɩɩ tus piig la a yi la yẽ wa ne.

⁷A Daviid wʋma rẽ n yiis a Zoab ne tãb-biis niyns sẽn ya-b zabra gãndaado.

⁸Amonitsa yiime n tong zabre tẽnga noore. Sã n ya Soba, Reob, Tob la Maaka Aramsã, bãmb ra yɛdga toore n pid pʋ-weesã.

⁹A Zoab mikame t'a taoore la a poorẽ yaa bɛɛba, t'a na n tũus Israyɛl rap meng-menga n tong-b Aramsa taoore.

¹⁰Yaa a yao, a Abisayi la a kõ tãb-biisa sẽn kellã tɩ bãmb me tong Amonitsa taoore.

¹¹A yeel-a lame: «F sã n yãe tɩ Aramsa na n tõog-ma bɩ f zoe n wa sõng-ma. Sã n ya foo la Amonitsa tõogda, m na zoe n wa sõng-fo.

¹²Keng f sũuri tɩ d zab ne raoodo, d buuda la Wẽnd tẽnsa yĩnga. La Soaala maan b sẽn date.»

¹³A Zoab ne a neba sɩnga zabre ne Aramsã, la Aramsa zoeeme.

¹⁴Amonitsa sẽn yãe tɩ Aramsa zoeeme, bãmb me wẽnemda b nao a Abisayi taoore n zoe n kẽ tẽnga pʋga. A Zoab sẽn yi a zabrã ne Amonitsã, a lɛɛg n wa Zerizalɛɛm.

¹⁵Aramsa yãeeme t'a Israyɛl n tõog bãmba tɩ b na n tigs b nebã.

¹⁶A Adadezɛr tʋma neba tɩ b tɩ yiis kʋɩlga rʋʋnd dãmb fãa tɩ b bob zabre. B waa Elam; a Adadezɛr tãnsoab a Sobak n da be b taoore.

¹⁷A Daviid wʋmame, a me tigim Israyɛl zãnga tɩ b rʋʋg Zʋrdẽ n ta Elam. Aramsa tongame n tak zabr ne a Daviid.

¹⁸Aramsa le konga pãng n zoe a Israyɛl taoore. A Daviid kʋʋ wiidi kobs-yopoe sẽn sog bilim-bilm la wed-dʋʋdb tus pis-naase. B tol n pogla tãnsoab a Sobak menga, la a waa n konga pãng be.

¹⁹Nanams niyns sẽn da kẽed a Adadezɛr yãeeme t'a Israyɛl n tõoge tɩ b gom laafi goam ne a Israyɛl, n sulg b mense. Dẽ tɛka Aramsa maana rabeem ne Amonitsa sõngre.