Read SEBR SÕNGO, 1998 2SAMWƐL 12 Bible Online

2SAMWƐL 12 - SEBR SÕNGO, 1998 bible

2SAMWƐL 12

¹ [25†] Naaba-Wẽnd tʋma a Natã a Daviid nengẽ, t'a tɩ yãend-a n yeel-a: «Neb a yiibu n da be tẽng a yembre, a ye dakãagre, a yembrã naong soaba.

²Dakãagrã da tara piisi la niis ka tɛka.

³Naong soaba da ka tar fɩ, sã n ka a pe-sɛdga a sẽn da ra. Yẽ meng n da kõt pesga rɩɩbo, t'a bɩt a zakẽ ne a meng kamba. A da rɩta a meng sẽn dɩte, n yũud a wamnẽ, n gãe a sɛɛgẽ. A ra get-a lame bal wala a bi-pugla.

⁴Sãan n wa n sig dakãagrã yiri, la rakãagra pa sak n bao a meng pesgo bɩ a meng naafo n segl dɩɩb n kõ sãana ye. Yɩɩ naonga soab pe-sɛdga la a kʋ n segl sãana.»

⁵Dĩma a Daviid sũur puuga al wʋsgo ne dakãagrã, t'a yeel a Natã: «M wẽen ne Wẽnde tɩ daoã sẽn maan woto wã toga ne kũum.

⁶B reeg rakãagra sẽn pa tar sũura nengẽ piis a naas n dol pe-sɛdgã zĩigẽ.»

⁷A Natã yeela a Daviid: «M naaba, yaa yãmb la nin-kãnga! A Israyɛl Wẽnnaam koɛɛg la woto: ‹Maam n pʋdg f zug kaam, tɩ f yɩ a Israyɛl dĩma; la maam n fãag foom a Sol nugẽ.

⁸Mam kɩtame tɩ fo soog f zu-soaba roogo, la m dɩk f zu-soaba pagba n ning f zakẽ; la m kõo foom a Israyɛl la a Zɩɩda roogo. F sã n yet tɩ paooda, m na le paas sẽn ta rẽ.

⁹La bõe yĩnga marsã, tɩ fo sãbs Soaala-Wẽnd goama, n maan sẽn yaa wẽng bãmb nifẽ. Fo kʋ-la a Uri, Ititga. Fo maana f sẽn na maane tɩ Amonitsa sʋʋg yãk a yõore tɩ fo reeg a pag n maan f paga.

¹⁰Marsã tɛka, sʋʋg kõn le zãag ne f zak ye; tɩ fo nif sãaga maam, tɩ fo yẽeg a Uri, Ititga, n deeg a paga, n maan f rẽnna.

¹¹M koɛɛg la woto: Ade! Mam na kɩtame tɩ yel-beed yi f meng zakẽ n lɛɛg n lʋɩ f zugu. Mam na n deega f meng pagba n kõ f roagda t'a gãand ne-ba. Dẽ yaa bũmb sẽn na n yɩ vẽenega wa wĩndga.

¹²[26†] Fo maana f yɛla ne soosgo, la mam dẽnd na n yɩ-la a Israyɛl zãng nifẽ, wĩndga vẽenemẽ.› »

¹³Dĩma a Daviid leoka a Natã: «M beega Soaala-Wẽnde!» T'a Natã yeel-a: «Soaala-Wẽnd kõ-la y yel-wẽnda sugri. Y ka na n ki ye.

¹⁴La yãmb sẽn beeg Soaala wʋsgo ne y yel-wẽndã, la y kõ bɛɛba bũmb b sẽn na n lʋɩɩs taoor n paoog Soaalã, ad f sẽn dog biig ninga na n kiime.»

¹⁵La a Natã leba a yiri. Bãag n yõk biig ning a Uri pagã sẽn dog n kõ a Daviidã. A yika bã-toogo.

¹⁶La a Daviid pʋʋsa Soaala-Wẽnd biiga yĩnga, la a loe noore, la a sã n da kẽed a roogẽ, yʋngo, a ra gãe tẽnga.

¹⁷Dĩma kug-zĩidba modg-a lame t'a yiki, la a zãgsame, a pa naag bãmb n dɩ bũmb ye.

¹⁸Sẽn maan dasem a yopoe biiga kiime. A Daviid sõgen-kamba da zoeta rabeem n pa rat n wilg-a tɩ biiga maana yõor ye. B ra gomda woto: «Biigã sẽn da wa n ket n vɩ wã b goma ne bãmba la b pa reeg ye. D na maana wãna n yeele: ‹Biiga kiime!› Dĩma ka na n tʋm beedo?»

¹⁹La a Daviid yãeeme t'a sõgen-kamba da bʋkda b koɛɛg n gomd ne taaba, woto a bãngame tɩ biiga konga pãnga. A soka sõgen-kambã: «Biiga maana yõor laa?» Tɩ b leok: «N-ye! M naaba!»

²⁰A Daviid yikame n so koom, n zɛ a meng yũ-noog kaam, n tek futu, n yaool n yi n kẽng wẽnd doogẽ n tɩ wõgemde. A sẽn lebg n wa yiri, a kosame tɩ b wa ne rɩɩbo la a rɩɩme.

²¹Tɩ sõgen-kamba sok-a: «Yãmb sẽn maanda võor yaa bõe? Biigã sẽn da waa n ket n vɩ, yãmb da tõdgda rɩɩbo n tar yãbre; la marsã biiga sẽn maan yõore, yãmb yik n dɩtame.»

²²A Daviid leok-b lame: «Biiga sẽn da waa n ket ne yõorã, mam da loeta m noore la m kiigd nintãm n tagsd m sũurẽ: ‹Daare Soaala-Wẽnd na zoe m nimbãanega tɩ biiga tɩlge.›

²³La marsã biiga sẽn maan yõore, mam na n le zãgsa dɩɩb bõe yĩnga? Mam tõe t'a le vʋʋg bɩ? Yaa maam n na wa babs yẽ, la ka yẽnda n na n lɛɛg n wa mam nengẽ ye.»

²⁴A Daviid belsa a paga, a Batseba, la b kẽe ne taaba. La a Batseba waa n doga biiga, t'a Daviid pʋda yʋʋr a Salomo. Soaala-Wẽnd yam kẽe biigã la b tũnuga a Natã maasem n wilg a Daviid.

²⁵Nonglem kãng yĩng me la a Natã pʋd a yʋʋra woto: Yedidiya, Wẽnd Noanga.

²⁶A Zoab zaba ne Raba, Amonitsa na-tẽnga, n tõog-a.

²⁷A Zoab tʋma neb tɩ b tɩ yeel a Daviid: «Mam zaba ne Raba; m tol n deega b ko-yũudma sẽn be sak ningã.

²⁸Marsã, bɩ y tigim tãb-biisã, n wa reeg sẽn kellã n soog zãnga, ka rẽ yaa maam n na n lub tẽngã la m na n pʋd-a-la m meng yʋʋre.»

²⁹A Daviid tigma tãb-biisã fãa n kẽng Raba, n tɩ wẽ tẽnga n tõog-a.

³⁰A fõka b wẽnda Milkom zugẽ, sãnem pugl sẽn da ta nin-tɩɩg a ye zɩɩbo. Kug neer sẽn saas a toore n pɩnda la b da rɩk n tablg-a. A Daviid tall-a lame n tɩ maneg a meng pugla. Pʋs n yɩɩ teed wʋsgo la sẽn tar yõodo la a tall n looge.

³¹La sã n ya ne tẽnga nebã, a Daviid tall-b lame n wa Zerizalɛɛm. B zãmsa raad wãabo, kug peesgo, tãn-koɛɛm wẽebo. A ra maanda woto Amonitsa tẽnsẽ. A Daviid ne a tãb-biisã lɛɛg n waa Zerizalɛɛm.