Read SEBR SÕNGO, 1998 2SAMWƐL 13 Bible Online

2SAMWƐL 13 - SEBR SÕNGO, 1998 bible

2SAMWƐL 13

¹Ad yɛl-niyns sẽn pʋge. A Daviid biig a Absalom da tara tão, ba a ye, ma a ye. Bi-pugla da yaa neere, n boond t'a Tamar. A Daviid biig a to, a Amnon, da nonga a Tamar.

²La a Amnon sũur da pa gãe ye. A tol n wa lʋɩɩ bãaga, a ba bi-poaka a Tamar yẽnẽ yĩnga. Bi-pugla ra nan pa kẽ kãadem ye. A Amnon da pa ne sɩlem baaf ning a sẽn na n sɩlem tɩ b zems taab ye.

³A Amnon da tara a zoa a ye sẽn boond t'a Zonadab, a Daviid ba-biig, a Simea biiga, la a Zonadab da yaa sɩlem soaba.

⁴A waa n soka a Amnon: «Bõe n be tɩ dĩma biig neng ka lebd a zĩigẽ beoog sẽn vẽeg fãa? Fo ka na n togs maam?» A Amnon leok-a lame: «Yaa a Absalom tão, a Tamar, poorẽ, m nong-a lame.»

⁵A Zonadab yeel-a lame: «Kẽ n gãand n maan wa f ka laafi ye. F ba sã n wa ges fo, bɩ f yeel-a: ‹Bɩ y kõ a Tamar sore, t'a wa kõ-m dɩɩb tɩ m dɩ. A wa segle dɩɩbã mam nifẽ, tɩ m yãe la m deeg a nugẽ n dɩ.› »

⁶La Amnon gãandame n maan wa a pa keem ye tɩ dĩma wa ges-a, t'a yeel-ba: «M kotame tɩ m tão, a Tamar, wa rõos miisd a yi m nifẽ tɩ m deeg a nugẽ n dɩ.»

⁷A Daviid tʋmame tɩ b kẽ na-zakẽ n yeel a Tamar: «Kẽng f tão, a Amnon, yiri n tɩ segl rɩɩbo n kõ a.»

⁸A Tamar kẽnga a tão, a Amnon, yiri, n tɩ mik t'a gãe t'a rɩk zom sẽn nage, n wẽ, n dõos miisd a yiibu a Amnon nifẽ.

⁹A yiisa miisda laagẽ, a taoore, la Amnon zãgsa rɩɩbo, n yeele: «Neba fãa yi ka!» La neba fãa yi-la a roogẽ.

¹⁰T'a Amnon yaool n yeel a Tamar: «Bɩ f tall rɩɩbã n ta m gãaga roogẽ tɩ m deegd-a f nugẽ n dɩtẽ.» A Tamar rɩka miisdã a sẽn dõosã n wa kɩs a tão a Amnon, a gãag roogẽ.

¹¹A Tamar sẽn tud a nug t'a reeg n dɩ, a Amnon yõk-a lame n yetẽ: «M tão, wa gãand ne maam!» A Tamar leokame:

¹²«Ayo, m ba-biiga! Da maan-m pãng ye tɩ yaa bũmb sẽn kis Israyɛl. Da maan wɩɩbd ye!

¹³Mam na n deega yãnd a woto n kẽ ye? La yãmb na n lebga nin-yaalg Israyɛl pʋgẽ. Marsã m kotame tɩ y gom ne dĩma, tɩ b kõn gɩdg d kãadem ye.»

¹⁴La a Amnon zãgsame t'a kõn kelg ye; a maana a Tamar pãnga, n gãand ne-a.

¹⁵La rẽ poore, a kisg-a lame, al t'a beema yɩɩd a sẽn da nong-a ne nonglem ningã. A yeel-a lame: «Yɩk n menem!»

¹⁶T'a Tamar leoke: «Bɩ y ra rig-m marsã, n paas wẽng ning y sẽn zoe n maana ye.» A Amnon pa sak n kelg a Tamar ye;

¹⁷a boola a sõgne n yeele: «Zãag bi-pugla ne maam ka! Yiis-a yɩnga la f lebs n pag kʋɩlengã a poorẽ!»

¹⁸Tɩ sõgna sɩd yiis-a n lɛɛg n pag kʋɩlengã. A Tamar da yeelga fuug, sẽn tar nus wogdo tɩ dĩma kom-pugli da yeelgda fu-kãng buudu b sã n nan ka mi raoa. A Amnon sõgna yiis a Tamar n lebs n pag kʋɩlengã a poorẽ.

¹⁹A Tamar yugla a zug tompɛglem, n kẽeg a fuug n dɩk a nug n tik a zugu, n kuiisẽ la a yãbda.

²⁰La a kẽem, a Absalom, seg-a lame n sok-a: «Sãnd f ba-biig a Amnon ka zĩnd ne foom? Marsã, m tão sõngo, bɩ f sĩnd tɩ ya f ba-biiga, la ra ning yell kãnga f sũurẽ ye.» La badaar tɛka, a Tamar pa-la a ye, a tão, a Absalom, yiri.

²¹Dĩm a Daviid dɩɩ yellã n tɩge la a sũur yika wʋsgo. A yaool n ka yeel a Amnon tɩ bũmb ye. Ra yaa a bi-kẽenga, la a ra nong-a-la wusgo.

²²Dẽ tɛka a Absalom pa le gom ne a Amnon ye la a kisg-a lame, a sẽn maan a tão, a Tamar, pãng yĩnga.

²³Sẽn maan yʋʋm a yi, rẽ loogre poore, a Absalom waa n pʋʋsa neb tɩ b wa wõrs a piis kõbdo, Baal-Asor tẽnga, Efrayim yegende. A boola dĩma kamb fãa.

²⁴A Absalom tɩ yeela dĩma: «Ade, yãmb sõgna pʋʋsame tɩ b wõrs a piis kõbdo n kõ-a; la m kotame tɩ dĩma ne a poorẽ dãmb sak n wa a sõgna yiri.»

²⁵Tɩ dĩma yeel a Absalom: «Ayoo! M biiga, d fãa pa na n wa ye, tɩ na yɩɩ zɩɩb f yĩnga.» A Absalom pẽdga dĩma; la dĩma pa sak n kẽng ye. Dĩma ning-a-la bark bala.

²⁶A Absalom yeelame: «Sã n ya woto, bɩ y kõ sore, t'a Amnon tũ tõndo.» Tɩ dĩma leoke: «A na tũu bõe yĩnga? A na n kẽnga f yiri n tɩ maan bõe?»

²⁷La a Absalom pẽdgr yĩnga, dĩma sakame t'a Amnon ne a kamb a taaba tũ-a n kẽnge.

²⁸A Absalom da kõ-la a sõgen-kamba noor kãnga: «Bɩ y gũus neere, yãmb sã n wa mik t'a Amnon yũu rãam t'a sũur yaa noogo, tɩ mam yeel yãmba: ‹Aya! Bɩ y wẽ a Amnon.› Wakat kãng bɩ y kʋ-a! Da maan-y dabeem ye! Ka maam n kõt yãmb noora laa? Keng-y pɛlga la y maan sũ-keelem!»

²⁹A Absalom sõgen-kamba maana ne a Amnon wala a Absalom sẽn yeel bãmbã. La dẽ poore, dĩma kom-dibli wã yikame, tɩ ned kam fãa zomb a bõn-wɛɛg tɩ b zoe.

³⁰La b sẽn da waa n ket sor zugu, koɛɛg n taa a Daviid t'a Absalom kʋʋ dĩma kom-dibli wã fãa, tɩ ba a ye pa kell ye.

³¹La dĩma yik n kẽesa a futu, n gãand tẽnga, t'a kug-zĩidba fãa sẽn da be-b be me kẽes b futu.

³²A Zonadab, a Daviid kẽema, a Sama, biiga, leoka koɛɛga; a yeela dĩma:

³³«M naaba, bɩ y ra saag n tags tɩ b kʋʋ y kom-dibli wã fãa ye. Ad-y yaa a Amnon bal a ye n ki. A Amnon sẽn sãam a tão wã tɛka, a Absalom da gãda a sũurẽ la a noor ra tol n gomdame t'a na tʋm dẽ. M naaba! Bɩ y ra sãam y sũur n tagsdẽ tɩ na-biisa fãa kiime ye, tɩ yaa a Amnon bal n ki.»

³⁴A Absalom zoeese. Bi-bɩɩg ninga sẽn da gũud dĩma zaka noorã nak n gesame, la a yãee neb kʋʋng tɩ b tũud Oronayim sor n watẽ, tãnga pennẽ. Gũuda yeela dĩma: «M nee neb ka tɛk sẽn yit Oronayim tãnga pennẽ n watẽ!»

³⁵T'a Zonadab yeel dĩma, «Ad dĩma kamb sẽn wate, yaa wala y sõgen sẽn yeel yãmba bala.»

³⁶A sẽn da ket n gomda, dĩma kamb taame. B zẽka b koees n kelem tɩ dĩma ne a na-yir dãmba me ning nintãm n yãb n yãbe.

³⁷La rẽ t'a Absalom da zoeeme la a ra kẽnga Gesur dĩma, a Amiyud biig, a Talmayi, mengẽ. A Daviid da yãbda a biiga a Amnon kʋʋr daar fãa.

³⁸A Absalom da zoeeme n kẽng Gesur la a paa be yʋʋm a tã.

³⁹Dĩm a Daviid waa n basa a zaba ne a Absalom. A sũura waa n maaga ne a biiga Absalom, sẽn da kʋ a yao, a Amnon.