Read SEBR SÕNGO, 1998 2SAMWƐL 16 Bible Online

2SAMWƐL 16 - SEBR SÕNGO, 1998 bible

2SAMWƐL 16

¹ [28†] A Daviid sẽn wa n loog tãnga zug tẽnsʋk bilfu, a Mefibaal dakõor a Siba wa n seg-b-la ne bõeens a yiibu, sẽn zɩlg bur kobs-yi, sib koeems gĩin koabga, zĩ-lik paalg tɩɩs bi-moaama n paas lɩng sẽn pid ne rãam.

²Dĩma soka a Siba: «Fo rat n maana bõe?» T'a Siba leoke: «Dĩma zak rãmba n na n zomb bõeensã, burã ne tɩɩsa biis na n yɩɩ kom-bõonega rɩɩbo, la rãama na yɩ-la b bõn-yũudla, b sã n wa yɛ we-raoogẽ wã!»

³[29†] La dĩma sokame: «Fo zu-soaba a Sol biiga bee yɛɛlẽ?» La a Siba leoka dĩma: «A paa Zerizalɛɛm, t'a tagsame: ‹Rũnnã Israyɛl na n lebs-m la m ba naam.› »

⁴Dẽ la dĩma yeel a Siba: «A Mefibaal sẽn tar bũmb ning fãa, rũnna tɛka yaa foom n so.» T'a Siba fõgneg a neng tẽnga n yeele: «Y barka, m naaba, y yama sẽn kẽ-m yĩnga!»

⁵A Daviid waa n ta Bawurim. La ade, daoa a yembre n yi be, a ra yaa a Sol buudu la a boondame t'a Simeyi, a ba yʋʋr la Gera. A ra yita tẽngã la a kãabd kãab wẽnse,

⁶la a wʋkd kug n lobd a Daviid ne a poorẽ dãmba. Neba fãa, gãndaada fãa yaool n da be-la a Daviid goabg la rɩtgo.

⁷A Simeyi da kãabda dĩma woto: «Aya! Kẽng n menem! Kẽng n menem! Nin-wẽng menga la zɩ-yũuda!

⁸N-faa! Soaala-Wẽnd lɛɛg n sudg f zugu, a Sol rooga fãa zɩɩm, f sẽn daage n paam n gʋsg a naama n deege. La gese, Wẽnd le reega f naama n ning f biiga, a Absalom, nugẽ. Ad fo sẽn lebg nin-yaalga, la foom n bao, tɩ fo yũu neb zɩɩm.»

⁹A Abisayi, a Seruya biigã, yeela dĩma: «Bõe n maan tɩ baagã, ba-kɩɩngã, wa tʋʋd m naaba la m zu-soaba? M naaba, y kabre! Bas-y-m tɩ m kẽng n tɩ rok a zugu!»

¹⁰Tɩ dĩma yeel-a: «Maana a wãn tɩ m weoog kẽed foom, Seruya biiga? A sã n tʋʋd maam, Naaba-Wẽnd sã n yeel-a: ‹Kẽng n tɩ kãab a Daviid beedo,› ãnna n be noor n sokd-a: ‹Bõe yĩng la a maand woto?› »

¹¹Dĩma le yeela a Abisayi ne a poorẽ dãmbã: «Mam meng bi-roak sẽn tʋlg n dok m yõore, tõnd na le gom dao kãnga sẽn yaa a Bẽnzame sakẽ neda? Bɩ y bas-a t'a kãab beedo, Soaala-Wẽnd sã n yeel-a t'a kãab beedo.

¹²Daare Naaba-Wẽnd na n gesa m sũ-toogã n maan-m neer n lebs dũnna tʋʋra zĩigẽ.»

¹³A Daviid ne a neba kell n tuda b sore. La a Simeyi da kẽnda tãnga pennẽ n yegd a Daviid; a ra kẽndame la a kãabd dĩma la a lobd-a kuga la a wʋkd tom n fẽed-a.

¹⁴Dĩma ne zãma wã taa tẽng a ye; la b vʋʋsa be.

¹⁵A Absalom ne a zãma wa, a Israyɛl neba, dag n kẽe Zerizalɛɛm, la a Ayitofɛl da bee ne a Absalom.

¹⁶A Usayi, a Daviid zoa wã, sẽn ta a Absalom nengẽ a yeel-a lame: «Wẽnd na kaoos dĩma! Wẽnd na kaoos dĩma!»

¹⁷T'a Absalom yeel a Usayi: «Nonglem ninga fo sẽn tar f zoa wã yĩng la woto bɩ? Bõe yĩng la fo ka tũ f zoa?» T'a Usayi leok a Absalom:

¹⁸«M sẽn pa tũ-a wã, yaa m sẽn dat n pa ne ned ninga Soaala-Wẽnd la Israyɛl sẽn yãk a soab wa b dĩma. Woto wã yaa ne foom la m na n pa.

¹⁹Pʋs n bãng tɩ mam sẽn kẽed fooma ka zaalem ye. Fo ka m zoa wã biig laa? Wala m sẽn pʋg f ba wã n ta rũnna wã, ya foom marsã la m na n pʋge.»

²⁰A Absalom yeela a Ayitofɛl: «Maan-y yẽsgo ne taaba n gese d na n maana wãna?»

²¹A Ayitofɛl yeela a Absalom: «Kẽ-y ne y ba sẽn bas pagb niyns tɩ b gũ zakã, la woto, a Israyɛl zãng fãa na bãnge tɩ y kɩtame, tɩ y ba wã pa tõe n pa rɩ beem ne y ye, la y na keng sẽn be-b yãmb poorẽ wã fãa sũuri.»

²²[30†] B tilga pɛɛl roogo a Absalom yĩnga, bɛonga zugu, t'a Absalom gãand ne a ba pagba, a Israyɛl zãng fãa nifẽ.

²³Wakat kãnga, a Ayitofɛl sẽn da sagend sagls niynsã fãa, b da reegd-b lame, wala sagls sẽn yi Soaala-Wẽnd nengẽ. A Ayitofɛl saglsa fãa da tara pãnga a Daviid wala a Absalom yĩnga.