Read SEBR SÕNGO, 1998 2SAMWƐL 18 Bible Online

2SAMWƐL 18 - SEBR SÕNGO, 1998 bible

2SAMWƐL 18

¹A Daviid gilg n gesa neba sẽn da be ne-a wã, a kõ-b-la nanamse, kẽer soo neb tusri, tɩ kẽer so koabga.

²A welga a tãb-biisã sags a tã, n yãk a ye n kõ a Zoab t'a yɩ b naaba, n kõ a Abisayi a ye, n kõ a Itayi, Gat daoã, a ye.

³La dĩma yeela neba: «Mam dat n tũu yãmb n kẽng zabrã.» Tɩ neba yeele: «Ayo! Yãmb kõn tũ tõnd n kẽng ye! Tɩ b sã n tɩ rigd-d tɩ d zoe, rẽ ka yell ye; la ba b lubd tõnd neba pʋɩ-sʋka, rẽ ket n ka yell ye, la sã n yaa yãmba, ad yãmb zema tõnd neb tus piiga; la sãoome tɩ yãmb kell n pa tẽnga pʋgẽ n yaool n wa sõng-do, d sã n tar sõngr tʋʋmde.»

⁴La dĩma leokame: «Mam na n maana yãmb sẽn tẽed tɩ bũmb ninga la neerã.» La dĩma yalsa tẽnga noor kɩrenga, tɩ neb tong koabg-kaobga, tusr-tusri n yita.

⁵Dĩma kõ-la a Zoab ne a Abisayi la a Itayi noor kãngã: «Mam nonglem yĩnga, bɩ y zoe m biiga a Absalom nimbãanega.» La neba fãa wʋma dĩma sẽn kõ nanamsa fãa noor ninga a Absalom poorẽ.

⁶B yiime, n na n tɩ seg a Israyɛl, la zabrã kaooga Efrayim googẽ wã.

⁷A Daviid neba tõoga a Israyɛl la badaare yɩɩ neb tus pisi n pa zabrẽ. Zabra yɩɩ tẽn-kũum menga.

⁸Zabrã wulumdame n yɛdg zĩig zãnga, la googa rɩɩ neb n yɩɩg sʋʋga.

⁹Zabra zĩigẽ, yaa a Daviid gãndaada la Absalom seg yã. A ra zomba bõn-wɛɛga. Bõn-wɛɛga zoe n tɩ kẽe tɩɩg a ye tẽngre, t'a Absalom zuga tɩ sẽgdg wila t'a yag n luund tɩɩga tẽngre, tɩ bõn-wɛɛga foog a meng n looge.

¹⁰La ned a yembre yãee rẽnda n tɩ togs a Zoab: «Ade! Mam yãee a Absalom sẽn luund tɩɩg a ye tẽngre.»

¹¹La a Zoab leoka sẽn togsa yẽnda kibarã: «Fo yãe-a lame! Bõe n maan tɩ fo ka tão-a n lub zĩig pʋgẽ? Woto mam da na kõẽ foom wanzurf wakɩ koeems piiga n paas sẽbdga.»

¹²La daoa leoka a Zoab: «Ba sã da yaẽ la wanzurf wakɩ-koeems tusri la m zãadẽ m nugẽ menga, m nug kõn tol n sɩɩs dĩma biig ye, tɩ tõnd fãa wʋma noorã dĩma sẽn kõ yãmb ne a Abisayi, la a Itayi. A yeelame: ‹Bɩ ned da maan m biiga, a Absalom, bũmb ye.›

¹³M sã dag n wɩɩb n kʋ-a, b kõn pa n ka togs dĩma ye, y meng na n foosẽ la y nus la y kõn gom kũun yell ye.»

¹⁴T'a Zoab na n kong n yeel-a: «Mam ka na n sãam m vɩʋʋgo n yals ne foom ye!» La a Zoab rɩka ra sɩlems a tã la a tão-la a Absalom sũurã. A ra ket n vɩɩme, n luund tɩɩga tẽngre.

¹⁵Kom-bɩɩb piigã sẽn da tʋkd a Zoab teedo gũbga a Absalom n wẽ-a n baase.

¹⁶A Zoab kɩtame tɩ b peeb baorgo tɩ neba fãa lebg n wa n pa le rig a Israyɛl n kẽng taoor ye. A Zoab n yals zabrã.

¹⁷B sika a Absalom yĩnga n lob bok kãsenga a ye pʋga sẽn da be weoogẽ be, la b wʋka kug n sam n bʋʋg-a. A Israyɛl zoeeme, ned kam fãa leba a roogẽ.

¹⁸A Absalom, ra wa n kɩtame tɩ b pees la b sel kugr kãseng naaba bãoogẽ. A ra tagsa woto a sũurẽ: «Mam pa tar biig sẽn na n tall m yʋʋra t'a ra menem ye.» Yaa rẽ me yĩnga la a pʋd kugrã a meng yʋʋre. B ket n boonda kugra rũnna t'a Absalom kugri.

¹⁹A Sadok biiga, a Ayimaas yeelame: «Bas-y tɩ m wudg n tɩ togs dĩma kibar noogã tɩ Naaba-Wẽnd kõ-b-la bʋʋm n fãag-ba b bɛɛb nusẽ.»

²⁰La a Zoab yeel-a lame: «Dũnna ka kibar noog la f na n paam n tɩ kõ dĩma ye. Na n yɩɩ nin-daare. Dũnna kibara ka noom ye tɩ dĩma biig kiime.»

²¹A Zoab boola Kusitga n tʋm-a: «Zoe n kẽng n tɩ togs dĩma f sẽn yãende.» Kusitga wõgemda a Zoab taoore n yik n tar zoeese.

²²A Sadok biiga, a Ayimaas, gomame n paase n yeel a Zoab: «Sẽn na yɩ bɩ yɩ, mam me rat n zoe n pʋga Kusitgã.» A Zoab yeelame: «M biiga, yaa bõe la f na n zoe n tɩ togse tɩ kibar noog sẽn na n wa ne f rolb yaool n ka beẽ?»

²³T'a leoke: «Sẽn na yɩ bɩ yɩ! M na n zoeeme.» T'a Zoab yeel-a: «Bɩ f zoe!» T'a Ayimaas sɩng zoeese, n dɩk Zʋrdẽ bãooga sore, la a looga Kusitgã.

²⁴Wakat kãnga tɩ dĩm a Daviid da zĩi tẽnga noor kʋɩlens a yiiba sʋka. Yell sẽn ka lingd tãb-biig ninga rʋʋ bɛonga zugu n tees n gese. La ade! A yãenda rao sẽn da zoet a yembre, la a zẽka a koɛɛg n togs dĩma t'a bãng tiiri.

²⁵La dĩma yeel-a lame: «A sã yaa a yembre, rẽnd a tara kibar noogo, n na n togse.» La raoa sẽn wa n kolgdẽ,

²⁶gũusda yãee ned a to sẽn da zoete, la a le zẽka a koɛɛg n togse: «Ad-y ned a to n le zoet n watẽ!» La a Daviid yeelame: «Yẽnda me yaa kibar noog soaba.»

²⁷La yɛla gũusdã yeelame: «M mii pipi soaba a zoeesẽ wã bala, a zoeta wa a Ayimaas, a Sadok biigã.» Tɩ dĩma yeele: «Yaa nin-sõngo, yaa kibar noogo menga n wat ne-a ka.»

²⁸A Ayimaas sẽn ta, a zẽka a koɛɛg n yeel dĩma: «Ayoo! Yell ka ye!» La a wõgemdame n pʋʋs naaba, n yaool n yeel: «Soaala-Wẽnnaam, paam pẽgre! Tɩ bãmb kɩtame tɩ b yõg neb niyns sẽn zẽk b nug n na n wẽ naaba, m zu-soabã.»

²⁹La dĩma sokame: «La m biiga, a Absalom, bee laafi bɩ?» T'a Ayimaas yeele: «M yãeeme tɩ neba sɩng n sogsd taab goabg la rɩtgo la wakat kãng la a Zoab tʋm dĩma sõgen a ye n paas maam, y yamba, la m ka paam n bãng sẽn ya bũmb ning taki ye.»

³⁰La dĩma yeelame: «Bɩ f serg bilfu n wa yals ka.» A Ayimaas sɩd sergame n bas vɩʋʋgo.

³¹La Kusitga taame n yeele: «M naaba la m zu-soaba, kelg-y kibar noogo: Soaala-Wẽnd kõo yãmb bʋʋm, n fãag yãmb, n yiis-y sẽn da zabd-b ne yãmba nusẽ.»

³²Tɩ dĩma soke: «La m biiga Absalom bee laafi?» La daoã yeelame: «Wẽnd na kɩt tɩ m naab la m zu-soaba bɛɛba fãa dɩ bõne wa bi-kãnga, la yɩ boto me ne sẽn kis b yãmba la b rat yãmb ne wẽngã!»