Read SEBR SÕNGO, 1998 2SAMWƐL 2 Bible Online

2SAMWƐL 2 - SEBR SÕNGO, 1998 bible

2SAMWƐL 2

¹Dẽ loogr poore, a Daviid soka Soaala-Wẽnde; a goma woto: «M tõe n kẽng n tɩ zĩnda Zɩɩda soolmẽ bɩ?» Tɩ Soaala-Wẽnd leok a: «Kẽnge!» La a Daviid le sokame: «M na kẽnga tẽn-bʋgo?» Tɩ b leok-a: «Ebrõ!»

²[3†] A Daviid kẽnga be ne a pagb a yiibã: a Ayinoam, Zizreyɛl tẽng biigã la a Abigayil, sẽn yɩ Karmɛl dao, a Nabal, paga.

³A Daviid kɩtame tɩ sẽn da be-b ne-yẽ wã kẽng, ned kam fãa ne a zaka, n tɩ zĩnd Ebrõ ne a tẽn-toose.

⁴[4†] A Zɩɩda neba waa Ebrõ, n pʋdg a Daviid zug naam kaam, t'a yɩ a Zɩɩda dĩma. La b waa n yeela a Daviid: «Yaa Galaad Yabɛs rãmb n solg a Sol yaoogẽ.»

⁵A Daviid tʋma neba tɩ b tɩ yeel Yabɛs-Galaad dãmba: «Wẽnd na ning y barka! Yãmb sẽn puk y pʋ-peelem ne y dĩm a Sol, n bao zĩig n mum-a.

⁶Bɩ Wẽnd kell n pʋg-y daar fãa ne b nonglem! La yãmb sẽn maan sõm ninga ne a Sol, mam me na maan-y neere.

⁷La marsã, bɩ y keng y pɛlga la y maan daoodo. Yãmb zu-soaba a Sol maana yõore, la a Zɩɩda rooga rãmb pʋdga m zug naam kaam, tɩ m led a Sol zĩiga.»

⁸A Nɛr biiga, a Abnɛr, a Sol tãnsoaba, da peega a Sol biiga, a Isbaal la a tall-a lame n kẽng Maanayim.

⁹A kitame t'a lebg dĩm Galaad, Asʋr, Zizreyɛl, Efrayim, Bẽnzame la Israyɛl tõre.

¹⁰A Sol biiga, a Isbaal, yʋʋm da taa pis-naase, a sẽn wa n lebg Israyɛl dĩma; la a rɩɩ naam yʋʋm a yiibu. Yaa a Zɩɩda roog bala n da kẽed a Daviid.

¹¹A Daviid sẽn pa Ebrõ wala a Zɩɩda rĩm, yɩɩ yʋʋm a yopoe la kiis a yoobe.

¹²A Nɛr biiga, a Abnɛr, la a Sol biig, a Isbaal gũudba yii Maanayim n tees Gabaõ.

¹³A Seruya biiga, a Zoab, ne a Daviid gũudba me boba zabre. Yaa Gabaõ ko-baoora sɛɛg la b seg taaba tɩ bãmb dãmb be ko baoora kɩreng a ye, tɩ bãmb dãmb be kɩreng a to.

¹⁴A Abnɛr yeela a Zoab: «Bɩ neba yik n mao taab tõnd taoore!» A Zoab leokame: «B yiki!»

¹⁵B yikame. B sõda a Bẽnzame roogẽ, a Sol biig a Isbaal neba bãmb piig la a yiibu, n sõd a Daviid neba, bãmb piig la a yiibu.

¹⁶Ned kam fãa gãda a zabd-n-taag yubla, la a rɩk a sʋʋga n kõs a lʋgre, tɩ b fãa naag taaba n lʋɩ. Yaa rẽ yĩnga la b sẽn bool zĩ-kãng tɩ sʋʋs pĩisẽ, la a bee Gabaõ.

¹⁷Badaare zab toaag n zĩndi la a Daviid tãb-biisa tõoga a Abnɛr ne a Israyɛl neba.

¹⁸A Seruya kamb a tãaba zĩnda be: a Zoab, a Abisayi la a Asayɛl. A Asayɛl da tʋʋla ne zoeese wala yãka.

¹⁹A Asayɛl wudgame n pʋgd a Abnɛr, la a pa tol n bʋdg goabg bɩ rɩtg ye.

²⁰A Abnɛr wẽnegame n yeele: «Yaa foom bɩ, Asayɛl.» La a leokame: «N-yẽe!»

²¹A Abnɛr yeelame: «Kek goabg bɩ rɩtgo, yõk tãb-bi-pol a ye n deeg a sẽn so fãa.» La Asayɛl pa tʋlg n bas pʋgbo la a pa kek ye.

²²A Abnɛr le yeela a Asayɛl: «Kek la f bas m pʋgbo, ka rẽ m na n wẽ-f lame n lubi. La f sã n lʋɩ, m na le tõog yals f ba-biig a Zoab taoore?»

²³A Asayɛl tõdgame t'a kõn serg ye. Woto wã a Abnɛr kõsa a pʋga ne a kãndã, la kãnda sãag n yi-la a poorẽ t'a lʋɩ n ki zĩig pʋgẽ. Ned ning fãa sẽn da ta a Asayɛl sẽn lʋɩẽ wã da yalsdame.

²⁴A Zoab ne a Abisayi zoe n pʋga a Abnɛr, la wĩndg lʋɩɩs sasa, b taa Gibea-Ama, sẽn be Gia yaanga, Gabaõ we-raooga sor zugu.

²⁵A Bẽnzame kamba sũu taaba, a Abnɛr poorẽ, la b yalsa tãn-bil a ye zugu.

²⁶A Abnɛr zĩnda tãn-bila zug n bool n tees a Zoab n yetẽ: «Sʋʋgã na n kell n tara varg bala? Fo ka mi tɩ sã n ya woto kõn baas neere? Wakat bʋg la f na n yaa n kabs f neba tɩ b vẽ ne saam-biisa zab-taasma?»

²⁷A Zoab leokame: «Ne Naaba-Wẽnd sẽn vɩ wã, ad-fo sã n da pa gomẽ, neba kõn basẽ taab pʋgbo, tɩ beoog raara ka vẽeg ye.»

²⁸A Zoab kɩtame tɩ b peeb tõntõogo, tɩ tãb-biisã fãa yalse. B basa a Israyɛl pʋgbo, tɩ zabra sɛ.

²⁹A Abnɛr ne a neba kẽname n tees Araba, yʋng kãng tõre. B rʋʋga Zʋrdẽ kʋɩlgã; b kaaga Gesur n wa kẽ Maanayim.

³⁰A Zoab basa a Annɛr pʋgbo, n tigim a tãb-biisã fãa. A Daviid tãb-biis piig la a wɛ n ki, n paas a Asayɛl.

³¹La a Daviid neba da kʋ a Bẽnzame la Abnɛr nebã, neb kobs-tã la pisoobe.

³²B talla a Asayɛl n tɩ solg a ba yaoogẽ, Bɛtelyɛɛm. A Zoab ne a neba kẽna yʋnga tõre, la zĩig sẽn waa n yẽegdẽ la b yaool n ta Ebrõ.