Read SEBR SÕNGO, 1998 2SAMWƐL 3 Bible Online

2SAMWƐL 3 - SEBR SÕNGO, 1998 bible

2SAMWƐL 3

¹Zabra kaoosa a Daviid ne a Sol rooga sʋka, la a Daviid roogã pãng ra paasdame t'a Sol rooga rẽnd ra woogdẽ.

²A Daviid roga kamb Ebrõ tẽnga: a pipi biiga yʋʋr da boondame tɩ Amnon. A ma la Zizreyɛl pag, a Ayinoam.

³Yẽ yao wã la a Kilab, a ma a Abigayil, Karmɛl Nabal paga; a tãab soaba la a Absalom, a ma la a Maaka, Gesur dĩma, a Talmayi, bi-pugla.

⁴A naas soaba la a Adoniyas, a Agit biiga: a nu soaba la a Sefatiya, a Abital biiga,

⁵a yoob soaba la a Itreyam, a Daviid paga Egla biiga. Kom kãens la a Daviid paam Ebrõ tẽnga.

⁶A Sol ne a Daviid rooga sẽn da waa n ket n zabd taaba, a Abnɛr maana yam n dʋʋs a meng a Sol neba taoore.

⁷A Sol ra tara paga t'a yʋʋr boond t'a Rispa, n yaa a Aya bi-pugla. A Isbaal yeela a Abnɛr: «Ya bõe tɩ fo kolg m ba wã paga?»

⁸A Isbaal goama puuga a Abnɛr sũur wʋsgo t'a yeele, «Mam yaa baag sẽn dɩt a Zɩɩda rãmb nugẽ laa? M ka zãmb f saamba a Sol roog ye, m ka zãmb a saam-biisi, a zo-rãmb ye; m pa bas foom a Daviid nugẽ ye, la f yik n zabda ne maam pag poorẽ, dũnna!

⁹Wẽnd na sik yel-beed a Abnɛr zugu, n sik-a n bãge, mam sã n pa pids Soaala-Wẽnd sẽn kãab a Daviid,

¹⁰[5†] la m yiis naama a Sol roogẽ, n sõng a Daviid t'a rɩ naam Israyɛl la Zɩɩda zãnga, n sɩng Dã n ta Beerseba.»

¹¹A Isbaal pa saag n le paas gomd ye, t'a ra zoeta a Abnɛr.

¹²A Abnɛr meng a toore tʋma neb tɩ b tɩ yeel a Daviid: «Ãn n so tẽn-peelma?» N le paas woto: «Wa yõg zood ne maam tɩ m na sõng tɩ f paam tɩ Israyɛl neba fãa wa kẽ-fo.»

¹³A Daviid leokame: «Be neere! M sakdame n na n yõg zood ne foom. La bũmb a ye bal n be tɩ m na kos foom: f ka na n wa mam taoore, tɩ f ka reng n wa ne a Mikal, a Sol bi-puglã.»

¹⁴[6†] La a Daviid tʋma neb tɩ b tɩ yeel a Sol biiga, a Isbaal: «Kõ-m paga, a Mikal, tɩ m paam-a-la ne Filisti rãmb koabg waoose.»

¹⁵A Isbaal tʋmame tɩ b tɩ reeg-a a sɩda, a Paltiyɛl nengẽ. A Paltiyɛl yaa a Layis biiga.

¹⁶A sɩda yik n yãag-a lame. A pʋg-a-la ne nintãm n ta Bawurim, t'a Abnɛr yeel-a be: «Lebge!» La a Paltiyɛl sakame, a lebgame n kuli.

¹⁷A Abnɛr sɩnga yẽsgo ne a Israyɛl nin-kẽemba n yeel-ba: «Yaa al daar zãra la yãmb dat t'a Daviid yɩ y dĩma.

¹⁸Bɩ y mao tɩ yɩ marsã, tɩ Soaala-Wẽnd ra pĩnd n yeela woto a Daviid poorẽ: ‹Na n tũu ne m yamba, a Daviid, tɩ m fãag m buudu, a Israyɛl, Filisti rãmba la b bɛɛba fãa nugẽ.› »

¹⁹A Abnɛr goama lʋɩ-la a Bẽnzame tʋbrẽ. A taa Ebrõ, n wilg a Daviid, Israyɛl rãmba ne a Bẽnzame sẽn sakd bũmb ninga.

²⁰A Abnɛr taa a Daviid nengẽ Ebrõ ne neb pisi. A Daviid maana a Abnɛr ne a poorẽ dãmba sãando.

²¹B sẽn waa n dɩ n sɛ, a Abnɛr yeela a Daviid: «Ade, m naaba, m tõe n tigma a Israyɛl tõre m dĩma taoore, m tõe tɩ tẽnga neba fãa yõg zoodo ne yãmba tɩ y rɩ naam b fãa zugu wa y sẽn date.» A Daviid kõ-la Abnɛr sore, t'a kul ne laafi.

²²Mik a Zoab ne a Daviid tãb-biisa ra tɩ zabame la b fã n lebg n watẽ; b ra paama rɩɩb sõma. Dẽ t'a Abnɛr ra ka le ket a Daviid nengẽ, Ebrõ tẽng ye, tɩ bala a Daviid ra kõ-a-la sore t'a kuli, t'a sɩd da kul ne laafi.

²³La a Zoab ne a tãb-biisa fãa sẽn wa n ta yiri, b togs-b la woto: «A Nɛr biiga, a Abnɛr, yõsg n waa dĩma nengẽ, la b bas-a lame t'a leb n kuli ne laafi.»

²⁴Rẽ la a Zoab kẽ dĩma nengẽ n yeele: «Yaa bõe la yãmb yõdg n maan ka? A Abnɛr waa yãmb nengẽ, yaa bõe tɩ yãmb bas-a t'a looge?

²⁵Yãmb mi-la a Nɛr biiga, a Abnɛr, bɩ? A ratame bala n tudg yãmba. A waame bala n na n bãng y sẽn gõod zĩis niynsi, n bãng y sẽn maand fãa.»

²⁶A Zoab yi-la a Daviid nengẽ n tʋm neb tɩ pʋg a Abnɛr. B tɩ paam-a-la Sira ko-baoora sẽnẽ la b le tall-a lame n wa t'a Daviid zɩ tiiri.

²⁷A Abnɛr sẽn ta Ebrõ, a Zoab peeg-a lame n kẽ tẽnga pʋga, n bool-a kɛɛnga, wala a tara koɛɛg n na n walem-a, mik a sɩlmame n paam-a n kõs a pʋga t'a ki. Woto me la a rok a sũur ne a Abnɛr, t'a ra kʋ-la a saam-biig a Asayɛl.

²⁸A Daviid wa n bãnga yellã, la a yeelame: «Beoogo, ra-yɩta, bɩ Soaala-Wẽnd da ning m meng la m soolma taale a Nɛr biiga, a Abnɛr, zɩɩma daagr poorẽ ye.

²⁹Taalã roga a Zoab la a zaka rãmb fãa zugu. Bɩ a Zoab rooga rãmb bẽ mende la wãoodo! B ra tõog n kẽn b nao a yiiba zug ye, la zabr sʋʋg sẽn base, bɩ tẽn-kũum loog ne!»

³⁰A Zoab ne a yao a Abisayi kʋ-la a Abnɛr tɩ yẽ n da yiis b yao, a Asayɛl, yõore, Gabaõ zabrẽ.

³¹A Daviid yeela a Zoab ne tãb-biisã sẽn da yãagd-a wã: «Kẽes-y y futu, la y yeelg sũ-pa-noang futu, tɩ d yãb a Abnɛr kʋʋre.» B tʋka kũuma pãndare t'a Daviid pʋgd poorẽ.

³²B muma a Abnɛr Ebrõ. Dĩma sɩnga kũmkũma a Abnɛr yaoogã zug tɩ zãma wã fãa kiigd nintãm.

³³Dĩma yãba a Abnɛr woto: «A Abnɛr ra tog n kii wa nin-yaalg woto sɩda?

³⁴F nus ra pa loe, f kars ra pa sog ne bãeense, f lʋɩ wa ned sẽn lʋɩ yel-wẽn-maandb nusẽ!» Tɩ zãma wã fãa nintãm na n sodg n paase.

³⁵Neba waa n kosa a Daviid t'a rɩ tɩ wĩndg nan pa lʋɩ ye, la a Daviid wẽena woto: «Wẽnd na sik yel-beedo m zugu la b le sik-a n bãge, m sã n ning bur m noorẽ, bɩ bũmblem buug a to tɩ wĩndga nan pa kẽ!»

³⁶Zãma wã wʋmame la b mikame tɩ rẽ yaa sõmbo, tɩ bala dĩma sẽn da maand fãa neba ra pẽgdame.

³⁷Badaare, zãma wã fãa ne Israyɛl tõre bãngame t'a Nɛr biiga a Abnɛr sẽn ki wã da ka dĩma yell ba bilfu.

³⁸Dĩma yeela a tãnsoaben-dãmba: «Y ka mi tɩ Israyɛl na-biiga, tɩ Israyɛl nin-kãseng n ka rũnna laa?

³⁹Sã n ya ne maam, m pãng paooda rũnna ne b sẽn taag m naam kaama; a Seruya kom-kãensã sũur kegmame tɩ looge. La Soaala-Wẽnd na lebs wẽnem soab a wẽnem.»