Read SEBR SÕNGO, 1998 2SAMWƐL 6 Bible Online

2SAMWƐL 6 - SEBR SÕNGO, 1998 bible

2SAMWƐL 6

¹Dẽ loogr poore, dĩma a Daviid tigma a Israyɛl nanams bɛdã la a nin-kẽemba fãa, na ta neb tus pis-tã.

²[12†] A Daviid ne neb niyns fãa sẽn da be ne-a wã teesa Zɩɩda-Baala n na n tɩ tall zooda kasetã n wa; yaa yẽ linga zugu, la Tãnsoaba-Wẽnde da sigda, malɛgs a yiiba pɩgsa maasmẽ.

³[13†] B rogla koglga bilim-bilm paalg zugu; b tɩ rɩk-a-la a Abinadab yiri. A Uza ne a Ayio, a Abinadab kamba, n da tat bilim-bilm paalgã.

⁴B yiis-a koglgã a Abinadab yiri, tãnga zugu, la a Ayio n da kẽnd taoore.

⁵A Daviid ne a Israyɛl roog rãmba fãa da reemda koglga taoore ne yʋʋm teed buud fãa: duudsi, koala, pendse, gãngãado, kɛma.

⁶B waa n ta-la a Nakõ zɛɛgẽ wã, t'a Uza tẽega a nugu, n na n kok koglgã tɩ niiga ra maaname t'a kɩlle.

⁷La Naaba-Wẽnd sũur puuga ne a Uza; la b wẽ-a-la zĩ-kãng bala, a kongr yĩnga. A Uza kii be, koglga sɛɛga.

⁸A Daviid yɛɛsame tɩ yɩɩ wa lalg la b wurg yã t'a Uza sãd n yi. Ne rũnna zĩ-kãng ket n boondame tɩ Uza lalg bɛɛga.

⁹Badaare, a Daviid zoe Soaala-Wẽnd rabeem; a yeelame: «Kuga walsa koglg yɩta a wãna n kẽ mam yiri?»

¹⁰Woto, a Daviid pa sak n bĩng zood kasetã a yiri, a na-tẽng pʋgẽ ye. A tall-a lame, n tɩ bas a Obɛd-Edom, Gat daoa, yiri.

¹¹[14†] Koglgã paa a Obɛd-Edom, Gat daoã, yir na maan kiis a tã. La Soaala-Wẽnd ninga a Obɛd-Edom ne a zak fãa barka.

¹²B waa n yeela a Daviid: «Naaba-Wẽnd ninga a Obɛd-Edom ne a zak la a sẽn tar fãa barka, kuga walsa koglg yĩnga.» Woto, a Daviid kẽngame n tɩ kɩt tɩ b rɩk-a a Obɛd-Edom yiri, n tall-a n wa ne kɩdengo, a Daviid na-tẽngẽ.

¹³La koglga tʋkdba sẽn maan nao yakem a yoobe a Daviid kʋʋ loalga ne nag-bil noabdg maoongo.

¹⁴Dĩma a Daviid da saooda ne a pãng tɛka, Soaala taoore, a ra yera maan-kʋʋdba fu-bil-pɛɛlgã.

¹⁵A Daviid ne a Israyɛl kamba fãa waa ne koglgã n kaasdẽ la b peebd bardo.

¹⁶Kuga walsa koglg sẽn ya Wẽnd zood kasetã sẽn waa n kẽed a Daviid na-tẽnga, a Sol bi-puglã, a Mikal, lɩka võorẽ n getẽ: la a yãee dĩma a Daviid sẽn yɩgd la a wẽnegd Soaala-Wẽnd taoore; la a sãbs-a-la a sũurẽ.

¹⁷B kẽesa koglgã, n dɩgl-a a zĩigẽ, pɛɛl roogẽ, a Daviid sẽn kɩt tɩ b ti a yĩnga. A Daviid kʋʋ, Soaala-Wẽnd taoore, yũ-noog la laafi kosg maando.

¹⁸Maanda sẽn kʋ n sɛ, a ninga neba barka Tãnsoaba-Wẽnd yʋʋr yĩnga.

¹⁹A kɩtame tɩ b pʋɩ, a Israyɛl zãma wã fãa, dapa la pagba, rɩɩbo; ned kam fãa reega bur gilga, la miisd sẽn dõos ne bugsuntung la tɩɩs a taab bi-koeemse, tɩ b fãa yaool n kuli.

²⁰ [15†] Dẽ poore, a Daviid kulame n na n tɩ ning a zak rãmb barka, t'a Mikal, a Sol biigã yii n seg-a n yeele: «Ad-y Israyɛl dĩma paama waoogr dũnna koe! A pidga a futu n sao bɩlgemd la bala, a yems yem-pogs taoore, wa talga!»

²¹A Daviid leoka a Mikal: «M saoo Soaala-Wẽnd taoore, bãmb sẽn nong maam n yɩɩg f ba, la f ba roog gilli, n tũus maam, tɩ m yɩ b buud, a Israyɛl naaba.

²²M da nongẽ lame n yɩẽ nin yaalga n yɩɩd woto, la m sulgẽ m menga, m meng nifẽ n paase, la ad-m kõn kong waoogre fo sẽn gomd yem-pogs niynsa taoore ye.»

²³Woto wã, a Mikal, a Sol bi-puglã, ka le rog biig ye.