Read SEBR SÕNGO, 1998 1DĨM DÃMBA 13 Bible Online

1DĨM DÃMBA 13 - SEBR SÕNGO, 1998 bible

1DĨM DÃMBA 13

¹Wẽnd yeela b ned a ye t'a yi Zɩɩda n wa Betɛl, dẽ t'a Zeroboam da yõoda maandã, maan-kugra zugu.

²[54†] A kãaba maan-kugra kãab beedo n yeele: «Maan-kugri, maan-kugri, Wẽnd koɛɛga la woto: Biig n na n dog a Daviid buudẽ n boond tɩ Zoziyas, la fo zug la a na n kʋ maan-kʋʋdba sẽn tʋmd tãmsa zutã, f zugẽ b na n yõog ninsaalb kõaba.»

³Bãngda paasa woto: «Maan-kugra na n tãsa mugnum, tɩ rũm-kaama tompɛglma sẽn dɩg a zuga dʋʋge la woto y na bãng tɩ Soaala n gome.»

⁴Dĩma sẽn wʋm Wẽnd neda sẽn yeel Betɛl maan-kugra poorẽ, a tẽega a nug n tees bãngdã n yeele: «Yõk-y bãndã!» La a nuga kell n kʋɩɩme, n pa tõe n le gõd ye.

⁵Maan-kugra pusgame, tɩ rũm-kaama tompɛglma sẽn da be a zuga rʋʋge, wala Soaala-Wẽnd sẽn da wilg ne b neda noore.

⁶Dĩma goma woto ne bãngdã: «Sigs Soaala-Wẽnd sũuri tɩ m nuga leb a zĩigẽ.» Bãngda sigsa Soaala sũuri, la dĩma nug leba a zĩigẽ wa pĩnda.

⁷Tɩ dĩma yeel-a: «Wa tũ maam tɩ d kuli, tɩ m tɩ kõ-f bũmbu tɩ f rɩ, la m kõ-f kũuni.»

⁸Bãngda leoka dĩma: «Ba ya f zaka pʋɩ-sʋk la f na n kõ-ma, m kõn tũ n kul ye. M kõn dɩ, m kõn yũ bũmb f zakẽ ye.»

⁹Wẽnd yeel-m la woto: «Da rɩ be, da yũ be, da le tũ so yɛng n wa ye.»

¹⁰A tũu sor a to, ka yɩ a sẽn dɩk a soab n wa Betɛla ye.

¹¹Bãngd kʋdgo n da be Betɛl. A kamba wa n wilg-a-la Wẽnd neda sẽn maan baraare, Betɛl. B wilg-a la bãngda sẽn togs dĩma.

¹²B ba wã sok-b lame: «Yaa so-bʋg la a rɩk yã?» T'a kamba wilg Zɩɩda raoã sẽn dɩk sor ninga.

¹³A yeela a kambã: «Ning-y bõanga gaare!» Tɩ b ning bõanga gaare t'a zombe,

¹⁴n pʋg Wẽnd nedã, la a tɩ paam-a lame t'a zĩ tɩɩg tẽngre, t'a sok-a: «Yaa yãmb la Wẽnd ned ning sẽn yit Zɩɩda wã bɩ?» T'a yeele: «N-ye!»

¹⁵Tɩ bãngd kʋdga yeel-a: «Tũ maam n kuli, n tɩ paam bũmb n ning f noorẽ.»

¹⁶T'a yeele: «M pa tõe n leb ne foo ye, m pa tõe n dɩ bɩ n yũ bũmb ka ye.

¹⁷Wẽnd kõ-m-la no-kãnga: Da rɩ, da yũ bũmb ba a ye, da tũ f pipi sorã n lɛɛg n wa ye.»

¹⁸Dẽ la nin-kẽema yeel yã: «Mam me yaa bãngd wa foo, la malɛk n yeel maam: ‹Wẽnd kõt-f la noore tɩ f tall daoã n kul f yir t'a rɩ la a yũ.› » La ra yaa ziirẽ la a togsda.

¹⁹Woto wã bãngda tũ-a lame la a tɩ yũume, la a rɩ a zakẽ.

²⁰B sẽn waa n dɩtẽ Wẽnd yiisa gomd bãngd kʋdga yĩnga,

²¹la bãngd kʋdga taasa Zɩɩda nedã: «Naaba-Wẽnd koɛɛga: Fo sẽn kɩɩs Wẽnde, fo sẽn pa reeg f Soaala-Wẽnnaam noore,

²²fo sẽn lɛɛg n wa rɩ la f yũ zĩig ning b sẽn da yeel f tɩ f da rɩ la f ra yũ wã, ad-f yĩnga kõn mum f ba rãmba yaadẽ ye.»

²³Sɩda a sẽn dɩ la a yũ n sɛ, b ninga bõanga gaar t'a zomb n looge.

²⁴La bõnyẽeg n seg-a n kʋ-a. A paa sora noore. Bõanga ne gɩgemda kell n pa-la a sɛɛgẽ.

²⁵Neb n tũ sorã, n yãend kũuma la bõnyẽega sẽn yɛs a sɛɛgẽ, n wa wilg bãngd kʋdgã, tẽnga pʋga.

²⁶Bãngda sẽn da kɩt t'a lɛɛgã sẽn wʋme, la a sẽn yeele: «Yaa bãngd ning sẽn kɩɩsa Wẽndã. Wẽnd bas-a la ne bõnyẽega, t'a lub-a n kʋ-a, wala a sẽn da paam Wẽnd vẽnegre.»

²⁷A yeela a kambã: «Ning-y bõanga gaare.» Tɩ b ning bõang gaare.

²⁸Bãngda tɩ yãenda kũuma t'a rɩg sora pʋga, tɩ bõnyẽega yɛs a sɛɛgẽ. Bõnyẽega pa sɩɩs kũuma, a pa kaoog bõanga kõbr ye.

²⁹Bãngda rɩka kũuma n palg a bõanga, n tall-a n wa Betɛl n na n maan a kʋʋre la a mum-a.

³⁰A ninga kũuma a meng yaoogẽ, n kelm a kʋʋre: «Wiyee, m yao sõngo!»

³¹A sẽn mum-a n sɛ, a yeela a kamba: «M sã n ki, bɩ y naag-m ne Wẽnnaam neda yaoog a ye pʋga. Gãneg-y m kõaba n yelg a rẽnna.

³²Sɩda nin-kãnga goma Soaala yʋʋr yĩnga a sẽn togs Betɛl maan-kugra poorẽ Samari tẽn-peelmẽ tãmsã zutu pʋʋsga zĩisi poorẽ, sɩda a sẽn togsa fãa na n pidsame.»

³³Yell kãensa logr poore, a Zeroboam ka tedg a manes wẽnsa ye. A kell n bao maan-kʋʋdba a sẽn paamẽ. Sẽn data fãa ra lebgda tãmsa zut maan-kʋʋda.

³⁴Dẽ kɩtame t'a roog lʋɩ yel-wẽndẽ, tɩ Soaala-Wẽnd wa ne a sãoongo la a wãab, saaga tẽngre.