Read SEBR SÕNGO, 1998 1DĨM DÃMBA 14 Bible Online

1DĨM DÃMBA 14 - SEBR SÕNGO, 1998 bible

1DĨM DÃMBA 14

¹Wẽnd kãnga, a Zeroboam biiga a Abiya lʋɩɩ bãaga.

²A Zeroboam yeela a paga: «Yik la f teem futu, tɩ b ra bãng tɩ f yaa Zeroboam pag ye. Fo na n kẽnga Silo, tɩ bãngda a Ayiya bee be, yẽ n da pĩnd n togs tɩ m na n lebga nin-bãmba dĩma.

³Zɩ bur piig ne samsa la sɩɩd ne yubla; kẽng a nengẽ t'a tɩ wilg-fu biiga yell sẽn na n yɩ-la.»

⁴A Zeroboam paga maana boto, n yik n kẽng Silo n tɩ kẽ a Ayiya yiri. A Ayiya da pa le ne ye, a nin da pa le noom ye, kʋʋlem yĩnga.

⁵Wẽnd da yeela a Ayiya: «Ade, a Zeroboam pag n wat n na n kudg kãntɩɩga tɩ f leok-a koɛɛga a biiga bãag poorẽ t'a pa keem ye. Fo na n leok-a la woto ne woto. Mik a sã n wa a na n maana wa ka yẽ la a Zeroboam pag ye.»

⁶La a Ayiya sẽn wʋm a nao wã rãamd bal dignoorẽ, a yeelame: «Aya! Kẽ wɛ, Zeroboam paga! Bõe yĩnga tɩ fo teem f menga. M tara koɛɛg f yĩnga la ka koe-noog ye.

⁷Lebg n tɩ yeel a Zeroboam woto: ‹Ad-a Israyɛl Wẽnnaama koɛɛga: Mam sẽn zẽk foom zãma wã sʋka, n kɩt tɩ fo lebg a Israyɛl naaba,

⁸mam gʋsga naama a Daviid roogẽ n kõ foom; la fo ka togs m tʋʋm-tʋmda a Daviid, sẽn sak mam noya la a tũ maam ne a sũur fãa, n pa maan bũmb a to, sã n ka sẽn noom maam bala.

⁹Fo maana wẽng n yɩɩg sẽn deng-b fooma fãa. Fo kẽng n tɩ maana wẽn-naandse, yõak tʋʋmde, n na n puug m sũuri, n dɩk maam n lob f poorẽ.

¹⁰[55†] Dẽ fãa yĩnga, ade, m na n taka yel-beedo a Zeroboam roog zugu, la m na sãam a Zeroboam zaka, n kʋ rapa fãa a buudẽ, kom-bõones wala kom-bɩɩba; mam na n pɩɩga a Zeroboam rooga zãng kas, wẽnd b sẽn kãagd sagdo, n menes zãnga.

¹¹A Zeroboam zak biig fãa sẽn ki tẽnga pʋgẽ, baas n na n wãb-a, la sẽn ki-a weoogẽ, yĩngri luiili n dɩt-a.› Soaala-Wẽnd n togsd rẽnna.»

¹²Bãngd a Ayiya paasa woto: «Fo na n yik n kula yiri, fo naoor sẽn poog tẽnga bala la f biiga na n ki.

¹³A Israyɛl gill fãa na n wiisa a zugu, tɩ b yaool n mum-a yaoogẽ, tɩ yaa yẽnda a ye, a Zeroboam kamba sʋka, n na n mum yaoogẽ, yẽnda nengẽ bala la b na n yãe bũmb sẽn ta a Israyɛl Soaala yam.

¹⁴La Wẽnd na n zẽka dĩm a to t'a soog Israyɛl la a wã a Zeroboam roog gilli. La rẽ fãa na n yɩɩ rũnna bala, la kabre tɩ m togs n baase: na n yɩɩ mars-mars nooga bala!

¹⁵Wẽnd na n lenga a Israyɛl wala rudum sẽn lengd koomẽ. B na n feooga a Israyɛl tẽn-noogã pʋgẽ, bãmb sẽn dag n kõ a saam-dãmba, la b na n tɩ sẽeg-a la kʋɩlga poore. La rẽ yaa b sẽn saa n sel wẽn-peesdi, n yõog Soaala-Wẽnd sũuri.

¹⁶B na n basa a Israyɛl, t'a Zeroboam maana wẽnga la a tusa Israyɛl kamba tɩ b maan wẽnga.»

¹⁷A Zeroboam paga yik n kulame. A leba Tirsa. La a sẽn gãndg dignoorã, la a biiga sẽn ki.

¹⁸B mum-a la yaoogẽ; a Israyɛl gill fãa wiisa a zugu, wala Wẽnd sẽn da yeel ne bãngda a Ayiya noore.

¹⁹A Zeroboam vɩɩma yɛla, a sẽn zabe la a sẽn dɩ naam to-to, fãa gʋlsa Israyɛl dĩm dãmba kibarẽ.

²⁰Yaa yʋʋm pisi la a rɩ naam. A saka a saam-dãmba la a biig a Nadab n dʋ a zaoorẽ.

²¹A Roboam ba la a Salomo. A ma la a Naama, Amonitga. A rɩɩ naam Zɩɩda. A Roboam da tara yʋʋm pis-naase la a ye, a sẽn waa n sɩng naam rɩɩbo. A rɩɩ naam yʋʋm piig la a yopoe Zerizalɛɛm; Wẽnd tũusa Zerizalɛɛm, Israyɛl tẽnsa fãa sʋka, n na n zĩndg b meng b buuda sʋka.

²²A Roboam maana sẽn ya wẽnga, n yɩɩg a saam-dãmbã. A kɩtame tɩ Soaala-Wẽnd sũur yiki.

²³[56†] Saam-dãmba mee pʋʋsg roto tãms zutu, la kunkubr fãa zugu la tɩɩg fãa sẽn tar maasem tẽngre.

²⁴[57†] Neb tol n yoo yoob, tɩ woto la b wẽn-naandsa rat tɩ b balem-ba, tẽn-kãng pʋgẽ; b togsa yell yood buud fãa neb a taab sẽn maane tɩ Soaala-Wẽnd da rig-ba n yiis a Israyɛl kamba taoore.

²⁵A Roboam naam yʋʋmd a nu soaba, a Sisak, Ezipt dĩma, wa n pãba Zerizalɛɛm;

²⁶[58†] a wʋka arzɛka sẽn da be wẽnd doogẽ wã, la arzɛkã sẽn da be dĩma roogẽ. A wʋka sãnem gãndã fãa a Salomo sẽn kɩt tɩ b kudã.

²⁷Dĩm a Roboam kɩtame tɩ b maan zũud gãndo n lebs sãnem gãnda zĩigẽ la a kɩs-b-la tãnsoaben-dãmba sẽn da gũud dĩma zaka noore.

²⁸Dĩma sã n da kẽed wẽnd doogẽ, gũudba da rɩkd-b lame, n yãag-a n yaool n le wa lebs-b gũudba roogẽ.

²⁹A Roboam tʋʋma, la a sẽn maan fãa, rẽnda pa gʋls a Zɩɩda dĩm dãmba kibara sebrẽ bɩ?

³⁰A Roboam ne a Zeroboam zaba taab wakat buud fãa.

³¹A Roboam tɩ saka a saam-dãmba tɩ b mum-a yaoogẽ ne a saam-dãmba, a Daviid na-tẽngẽ. A Naama la a ma wã yʋʋre, ra yaa Amonitga. A biig, a Abiyam, n led a zaoorẽ.