Read SEBR SÕNGO, 1998 1DĨM DÃMBA 19 Bible Online

1DĨM DÃMBA 19 - SEBR SÕNGO, 1998 bible

1DĨM DÃMBA 19

¹A Akab tɩ togsa a Zezabɛl a Eli sẽn maan fãa la a sẽn kʋ bãngdba fãa ne sʋʋga.

²A Zezabɛl tʋma ned a Eli nengẽ, t'a tɩ yeel-a: «M wẽnd dãmba sãam-ma, n le sãam-m n bãge, mam sã n ka maan ne foo wa f sẽn maan ne bãngdbã.»

³La a Eli sẽn wʋm woto a yik n zoeeme n na n fãag a yõore. La a taa Beerseba, a Zɩɩda soolmẽ, la a basa a dakõora be.

⁴[68†] La a meng kẽna weooga pʋga daar a ye tõre, la a tʋlga kũum n yeele: «Sekame marsã, Soaala-Wẽnde. Bɩ y reeg m vɩɩma, tɩ mam pa são m saam-dãmb ye.»

⁵La a gãand n gũsa tɩɩg a ye tẽngre. La ade, malɛk n sɩɩs-a n yeel-a: «Yik n dɩ!»

⁶La a sẽn gese, a yãee a sɛɛgẽ, miisgu sẽn dõos kug paklg sẽn wɩng bugmẽ, n paas koom ne yubla. A rɩɩme, a yũume, a le gãandame.

⁷La Soaala malɛkã le wa naoor a yiib soaba n le nek-a n yeele: «Yik n dɩ tɩ sora ra yɩɩ wok f yĩng ye.»

⁸A yik n dɩɩme la a yũ. La rɩ-kãnga pãng yĩnga a kẽna dasem pis-naase, wĩntoog la yʋngo n wa ta Orɛb, Wẽnd tãngã.

⁹Beene, a Eli kẽe tãn-boko n gãand n vẽeg beoogo la ade, Soaala-Wẽnd leok-a la b koɛɛg: «Eli, fo maanda bõe ka?»

¹⁰[69†] T'a yeel: «Soaala-Wẽnde, dũni fãa Soaala, yãmb nonglma yik-m-la wa bãaga la m ka le tõe n sak tɩ Israyɛl kamba paoog-y woto ye. B sãama zoodã, b wãa yãmb maan-kugã, n kʋ y bãngdbã. Kella maam m ye bala tɩ b baood maam n na n dok m yõore.»

¹¹Soaala-Wẽnd yeelame: «Yi n yals tãnga zugu, Wẽnd taoore. Gese, Soaala-Wẽnd na n loogame.» Sobg kãseng yika ne pãnga, n miim tãmsã, la a wãad pĩisi, Soaala-Wẽnd taoore. La Soaala-Wẽnd da ka be sobga pʋg ye. Sobgã sẽn looge, yɩɩ tẽng n miimi. La Wẽnd da ka be tẽnga miuungẽ wã ye.

¹²Tẽnga miuung poore yɩ bugum. La Wẽnd da ka be bugma pʋgẽ ye. La bugma sẽn looge, yɩɩ pems maasga la faasg bʋʋre.

¹³La a Eli sẽn wʋm rẽnda a rɩka a fuug n lud a nenga n yi. A yalsa tãn-boka noore, la a wʋma sẽn yeele: «Eli, fo maanda bõe ka?»

¹⁴T'a yeele: «Soaala-Wẽnde, dũni fãa Soaala y nonglma sũur n yik-ma tɩ m pa rat tɩ Israyɛl kamba le paoog-y ye. Sɩda b sãama zoodã, n wã y maan-kugã, n kʋ y bãngdbã. La kella maam m ye bala, tɩ b baood maam n na n dok m yõore.»

¹⁵ [70†] Wẽnd yeela a Eli: «Aya! Kẽnge, le rɩk f sor, n pɩʋʋg weoogã n leb Damas. F sã n ta beelẽ bɩ f zɛ a Azayɛl naam kaam t'a yɩ Aram dĩma;

¹⁶[71†] La f zɛ a Yewu, a Nimsi biigã, t'a yɩ Israyɛl dĩma; la f zɛ a Elize, a Safat biigã, Abɛl-Meola, t'a yɩ bãngda n led fo zĩigẽ.

¹⁷La bũmb ning sẽn na n yɩ, yaa tɩ sẽn põsa a Azayɛl sʋʋga, a Yewu n kʋʋd-a, la sẽn põs a Yewu sʋʋga, a Elize na kɩt tɩ b kʋ-a.

¹⁸[72†] La mam na n basa a Israyɛl pʋgẽ dap tus a yopoe, sẽn pa ning rũmdi a Baal taoore, tɩ b noor ka mogs-a ye.»

¹⁹A Eli yika zĩ-kãng n looge, n seg a Elize, a Safat biigã, wakat kãng t'a ra koodame; nag-koods sẽn balg a yiib-yiibu, bãmb sags piig la a yi n da be a taoore t'a ra pʋgd piig la a yiib soaba. A Eli kolg-a lame n dɩk a fuug n lob-a.

²⁰La a Elize basa a niisã n zoe n pʋg a Eli; a yeelame: «Kõ-y maam sore, tɩ m tɩ mobg m ba la m ma, la m yaool n wa tũ yãmba.» La a Eli leok a lame: «Aya, lebe! M kos-f la bũmb bɩ?»

²¹La a Elize lebame n tɩ yõk a nag-koods a yiibu n kʋ, n dɩk nag-koodsã yubl daoog n dʋg b nemdã n kõ neba tɩ b rɩ, la a yaool n tũ-la a Eli n lebg a sõgne.