Read SEBR SÕNGO, 1998 1DĨM DÃMBA 2 Bible Online

1DĨM DÃMBA 2 - SEBR SÕNGO, 1998 bible

1DĨM DÃMBA 2

¹A Daviid sẽn mik t'a kũum kolgame, a sagla a biig a Salomo woto:

²«M dɩka neba fãa sẽn dɩkd sor ninga n yit moogo. Keng f sũuri, yɩ raoa!

³Tũ Naaba-Wẽnd, f Soaala, sẽn wilgi, tũ b soya, reeg b noya, b raabo, b sẽn togse, b sẽn yals zamaan fãa yĩnga, b sẽn gʋlse a Moyiiz sebrẽ, la woto f sẽn sɩnge bɩ sẽn dat n sɩng tʋʋm niynsa fãa na baas neere.

⁴La Wẽnd na pids b sẽn kãab maama n yeel-ma: ‹F kamba sã n tall b mens neere, n kẽn tɩrg m taoore, ne b sũur fãa, ne b yalẽ wã fãa, f kõn kong ned sẽn na n dɩ naam Israyɛl ye.›

⁵ [3†] Fo mi-la a Seruya biig a Zoab sẽn maan-m bũmb ninga, a sẽn maan Israyɛl tãnsoaben-dãmb a yiibu, a Nɛr biig a Abnɛr la a Yetɛr biiga a Amasa. F mii a sẽn kʋ-b to-to, a yika laafĩ wakato n kʋ, n bol ne zɩɩm a sɛɛg sẽbdg la a neooda.

⁶F na maan sẽn segd n ka bas-a t'a sig bʋg-tẽng bãane ne zoob-peend ye.

⁷[4†] Sã n yaa a Barzilayi Galaad daoã kamba, f na zã-b ne nonglem la b na lagm-f laag a yembre, tɩ m sẽn waa n zoet f kẽem a Absalom taoore, b sõng-m lame.

⁸[5†] Ade, a Gera biig, a Simeyi, Bẽnzame Bawurim daoã, n be fo sɛɛgẽ. Yẽ tʋʋ maam tʋ yoodo, m sẽn dɩk Maanayim sor daare. A lɛɛg n seg-m lame, Zʋrdẽ kʋɩlgã, tɩ m wẽen ne Soaala tɩ m sʋʋg kõn sɩɩs-a ye.

⁹Marsã f kõn bas-a n pa sɩbg-a ye, la f mi f sẽn na n sɩlem sɩlem ninga t'a sig bʋg-tẽng ne zoob peendo.»

¹⁰A Daviid gãanda ne a saam-dãmba la b mum-a-la a Na-tẽngẽ.

¹¹[6†] A Daviid dɩɩ naam Israyɛl, yʋʋm pis-naase: Ebrõ yɩɩ yʋʋm a yopoe, Zerizalɛɛm yɩɩ pis-tã la a tã.

¹² [7†] A Salomo dʋ-la a ba zaoorẽ, la a naam paama pãnga.

¹³A Agit biiga, a Adoniyas, kẽnga a Batseba, a Salomo ma nengẽ la a wõgemda a taoore. Paga sokame: «Yaa laafi tɩ f wat ka?» T'a leoke: «N-ye!»

¹⁴A paasa woto: «M tara m koɛɛg ne foo.» Tɩ paga yeele: «Gome!»

¹⁵A Adoniyas yeel-a lame: «Fo miime tɩ naama ra tog n yɩɩ m dẽnda. A Israyɛl gilli me da tẽed-m la ne naama, la ade a yii mam nugẽ n lʋɩ m yao nugẽ, tɩ Wẽnd n kõ-a.

¹⁶Bũmb a ye marsã la m dat n kos-fo, da zãgs ye.» Paga yeel-a lame t'a gome.

¹⁷[8†] T'a yeel: «M kot-f lame tɩ f yeel dĩma, a Salomo, tɩ b kõn tõdg ye, yeel-ba tɩ b kõ-m Sunamitga, bi-pugla a Abisag tɩ m maan m paga.»

¹⁸Paga leokame: «Yaa neere, m na gom dĩma f yelle.»

¹⁹A Batseba kẽnga dĩm a Salomo nengẽ n tɩ gom a Adoniyas yelle. Dĩma yik n seg-a lame, n yaool n lɛɛg n zĩnd a zaoorẽ. B waa ne goeel dĩma ma yĩnga la a zĩnda a biiga rɩtgo.

²⁰Ad-a sẽn yeele. «Yaa bũmb bilf bala la m tar n na n kos-fo, da zãgs ye.» Tɩ dĩma yeele: «Kos-ma tɩ m kõn tõdg ye.»

²¹Tɩ paga yeele: «B tõe n dɩka Sunamitgã, bi-pugl a Abisag, n ko f kẽema Adoniyas t'a maan a pag bɩ?»

²²Dẽ la a Salomo leok a ma: «Yaa bõe la f kot a Adoniyas yĩnga Sunamitga, a Abisag? Bõe tɩ f pa kot naama a yĩnga? A Adoniyas ka mam kẽem La? Bõe tɩ naama pa na n deeg n kõ-yẽ, n kõ maan-kʋʋd a Abiyatar, la tãnsoab a Zoab, a Seruya biiga?»

²³A Salomo wẽena woto: «Bɩ Wẽnd bãg-m wẽnga la b leb n bãg n paase, sã n ka kũum la Adoniyas bao n kõ a menga, n gom wa a sẽn goma.

²⁴Ne Wẽnd ninga sẽn vɩ la sẽn zĩndga maam m ba a Daviid zaoorẽ dũnna, la sẽn kãab naam maam ne m yagense, m wẽen ne Wẽnde, t'a Adoniyas na n kii rũnda bala.»

²⁵Yaa a Zoyada biig, a Benaya, la dĩma yeel t'a tɩ kʋ-a. Yɩɩ woto la a Adoniyas maan yõore.

²⁶ [9†] Dĩma yeela maan-kʋʋd a Abiyatar: «Kẽng Anatot, f buud tẽngẽ, tɩ f toga ne kũum, la ka rũnna la m na n kʋ-f ye tɩ pĩnda f paam n tʋka Soaala-Wẽnd zooda kasetã, m ba a Daviid wakato la m ba sẽn wʋm toog ningã fo me yãend-a lame.»

²⁷[10†] A Salomo yiisa a Abiyatar Soaala-Wẽnd maan-kʋʋdba sʋka. La woto b pidsa Wẽnd sẽn da kãab bũmb ninga a Eli, Silo.

²⁸A Zoab wʋma kibarã; yẽ ra yi-la a Absalom poore n kẽe a Adoniyas; woto, a zoe n kẽe sɛka roogẽ, n bri maan-kugra yɩdba.

²⁹B tɩ yeela dĩma a Salomo t'a Zoab kẽe sɛka roogẽ la a mobga maan-kugrã. A Salomo tʋmame tɩ b tɩ yeel-a: «Yaa bõe yĩnga la f zoe n tɩ mobg maan-kugrã?» T'a Zoab yeele: «M zoe yãmb rabeem n tɩ yõk Wẽnd sɛɛga.» A Salomo tʋma a Zoyada biig, a Benaya, t'a tɩ kʋ-a.

³⁰A Benaya kẽnga sɛka roogẽ n yeel a Zoab: «Dĩma n kõt f noor, wa yi yɩnga.» A Zoab yeelame: «Ayo, yaa ka la m na n ki.» A Benaya tɩ wilgã dĩma: «A Zoab yeela woto, n le paas woto!»

³¹Dĩma leok-a lame: «Maan wa a sẽn yeele: kʋ-a la f mum-a. Woto f na zãag ne maam la m ba-roogã a Zoab sẽn daag zɩɩm ninga zaalem-zaalma taale.

³²Wẽnd kɩtame t'a zɩɩm lɛɛg n mad a zugu t'a wẽe neb a yi sẽn yɩɩd yẽnda ne sõmblem, la a kʋ-b-la ne sʋʋga tɩ dĩm a Daviid ka bãng tiir ye. Yaa a Nɛr biig a Abnɛr, a Israyɛl tãnsoaba, la a Yetɛr biig a Amasa, a Zɩɩda tãnsoaba.

³³Bɩ bãmb b yiib zɩɩm lɛɛg n daag a Zoab ne a buud zugu, zamaan ne zamaana. La Wẽnd na kɩt t'a Daviid ne a buudu, a naama la a zaoorã paam laafi, Wẽnd maasmẽ, beoog sẽn vẽeg fãa.»

³⁴A Zoyada biig a Benaya kẽngame, a wẽ a Zoab n kʋ la b mum-a-la a sẽn so vẽenem ninga pʋga, we-kɛɛnga.

³⁵Dĩma ninga a zĩigẽ a Zoyada biig, a Benaya; yẽ n lebg a tãb-biisa tãnsoaba. Maan-kʋʋd a Abiyatar zĩigẽ, a ninga maan-kʋʋd a Sadok.

³⁶A Salomo kɩtame tɩ b bool a Simeyi n yeel-a: «Me f zak Zerizalɛɛm la zĩnd be la ra le zãag ne-a, n kẽn goabg bɩ rɩtg ye.

³⁷Daar ninga f sẽn na n dʋʋg Sedrõ bokã, bãng tɩ f na n kiime. La dẽ yaa foo n daag f meng zɩɩm.»

³⁸A Simeyi leoka dĩma: «Yaa neere, m na n maana wala m zu-soab, m dĩma, sẽn yeele.» A Simeyi paa Zerizalɛɛm.

³⁹La sẽn maan yʋʋm a tã, a Simeyi yem-daad a yi n zoe n kẽng Gat dĩm a Maaka biig a Akis nengẽ. B waa n wilg-a lame t'a yemsa bee Gat.

⁴⁰A Simeyi ninga a bõang gaare n ta Gat, a Akis nengẽ, n tɩ reega a yemse, n lɛɛg n wa.

⁴¹B wilga a Salomo t'a Simeyi yi Zerizalɛɛm n kẽng Gat la a lɛɛg n waame.

⁴²Dĩma bool-a lame n yeel-a: «M da ka kɩt tɩ f wẽen ne Wẽnd, la m da ka wilg f vẽenega tɩ f sẽn kẽng zĩig ning fãa, tɩɩm ka ye, f na ki? Fo yeelame: ‹M sẽn wʋm bũmb ninga yaa sõmbo.›

⁴³Bõe tɩ fo wẽen ne Wẽnd n pa yals f wẽenega zugu, la f reeg m sẽn da kõ f noor ningã?»

⁴⁴Dĩma paasame: «F tẽra wẽng ning fãa f sẽn maan ne m ba, a Daviid. Ad yaa rẽ la Soaala-Wẽnd kɩt tɩ f wẽnema lɛɛg n dɩt-fo,

⁴⁵la Soaala yaool n na n sõnga a Salomo tɩ dĩm a Daviid zaoora da luk a zĩigẽ badaar a ye.»

⁴⁶Dĩma kõ-la a Zoyada biig a Benaya noor t'a kʋ-a. A yii ne-a, yɩnga, n wẽ-a n kʋ. Naama pãng paasa a Salomo nugẽ.