Read SEBR SÕNGO, 1998 1DĨM DÃMBA 7 Bible Online

1DĨM DÃMBA 7 - SEBR SÕNGO, 1998 bible

1DĨM DÃMBA 7

¹Sã n yaa a meng roogã, yaa yʋʋm piig la a tãabo la a Salomo me-a.

²A mee roogo n pʋd-a tɩ Libã googo. Kãntɩɩs koabg la a woglem, a yalem yaa pis-nu, a zãndlem pis-tã. Rooga ra boondame tɩ Libã googo tɩ raado, ra-sĩdma wa kʋgse, n da tedg taab rũnus a naase, tɩ ra-gilsi ne ra-peg tagd palg b zutu.

³Dooga yĩngr da paga ne ra-sĩdma. Ra-kãens ra sẽba ne ra-paadsa pis-naas la a nu sẽn pɩkã, rũnug fãa bãmb piig la a nu n da zao ra-lug gils zutu.

⁴Vẽ wã ra tonga rũnug a tãabo. Rũnug fãa võor me ra tota a to.

⁵Kʋɩlensa ne b ra-lugsã ra yaa mags-magse la bãmb me ra tota taab zĩis a tãabo.

⁶A Salomo mee zãong ning sẽn boond tɩ ra gils zãongo. A woglem yaa kãntɩɩs pis-nu, a yalem kãntɩɩs pis-tã. A ra bee Libã googa taoore n tar bũmb sẽn kokd wĩndga.

⁷A Salomo mee zãong a to, zaoora yĩnga, n kaood bʋʋda be, tɩ b boond tɩ bʋʋd zãongo. A pʋga ra kaa ra-pegd sĩdma, a tẽngr n ta a yĩngri ra-paadsã.

⁸[21†] A mee a meng zaka kɩreng a to, zaoora zãong poorẽ, la meeba ra wẽnda taaba. A le mee roog a to sẽn wẽnd yẽnda, Ezipt dĩma bi-pugla yĩnga, t'a ra yii kãadem ne Ezipt dĩma bi-pugla.

⁹Ro-bãmb fãa ra mee ne ra-sĩdma sẽn pees n zems taaba, pʋgẽ la poore. Bãmb bal la b tall n me roogã, a tẽngre n ta a yĩngri.

¹⁰Kug niyns sẽn tʋɩ-b tẽngã ra yaa bɛda: kãntɩɩs piiga, bɩ kãntɩɩs a nii.

¹¹B tʋɩɩsa rotã ne kug sẽn pees rẽnd yĩnga n paas ra-sĩdma.

¹²Zag-yalenga n da mee n gilg n sege ne kug peesem sẽn dogl taab rũnus a tãabo la sẽn baas ne ra-pegd-tagdo. Wẽnd dooga zaka la a zãonga me mee boto.

¹³A Salomo kosame n na dɩk a tʋʋmẽ wã Tir tẽng dao a Iram.

¹⁴A yaa Neftali pʋg-kõor a ye biiga. A ba wã da yaa Tir neda. A ra yaa yõaka. A ra miime la a ra tõeeme n tʋm neere zũud tʋʋmd fãa. A waa a Salomo nengẽ, la yẽ n tʋm zũuda tʋʋm fãa.

¹⁵Yẽ n dõog zũud ra-lug bɛd a yiibã. Ra-luk fãa woglem da yaa kãntɩɩs piig la a nii, la gĩsg sẽn ta kãntɩɩs piig la a yi n da mobgd-a n sege. Ra-luk a to wã me ya boto.

¹⁶A baoo zũudu n dõog sẽn na n baas ra-luga zutã, la a ye fãa zãndlem yaa kãntɩɩs a nu.

¹⁷A maana fan-teed buud toor-toore ne zũudu, wa kut gãmbse, wa puud pãneng n kʋk a sẽn dõog n dogl ra-luga zutã, bãmb b yopoe. Zũud ra-luk fãa paama a rẽnna.

¹⁸A rõoga fan-teedo, n mams tɩ-biis wa pooloomse, n sog-b rũnus a yiibu n gilg bũmb ning sẽn na n dogl ra-luga zutã. Ra-luk fãa paama a rẽnna.

¹⁹Sã n ya zãongẽ ra-lug bɛdã, bũmb ning sẽn na n dogl b zutã zãndlem yaa kãntɩɩs a naase, la b ra wẽnda lɩɩn-puugu.

²⁰Sẽn na n dogl ra-lug bɛda zuta tẽngre, gãmbsã la pooloomsa kobs-yi wã tẽngre, maabre n da tʋʋg n gilgi.

²¹Yaa wẽnd dooga zãonga taoore la b yals zũud ra-lugã. B yalsa rɩtg soabã n pʋd-a t'a Yakẽ, n yals goabg soabã n pʋd-a t'a Boaz: Wẽnd n wat ne keglem la Wẽnd la pãnga.

²²Zũud ra-luga tʋʋmde, a Iram tõog n baas-a-la neere.

²³A Iram maana ko-sĩnga. A rõog-a-la bedr-bedre ne zũudu; a maan-a-la gilga. A sɛɛga yaa kãntɩɩs piiga. A zãndlem yaa kãntɩɩs a nu. Gĩsg sẽn ta kãntɩɩs pis-tã n da tõe n mobg a lʋgrã n sege.

²⁴Sĩnga noora tẽngre, n gilgi, b ningame n na n paas a neerem, bũmb wa pooloomse. Kãntɩɩg fãa yaa bãmb pisi. B ning-b-la rũnus a yiibu la b ra naagame n dõog ne ko-sĩngã rõog yɛnga.

²⁵Sĩnga ra doga zũud niis piig la a yiib zugu. Lols a tãab neng teesa goabga; a tãab neng teesa nin-taoore, t'a tãab tees rɩtgo, t'a tãab tees yaanga. Sĩnga ra zao b zugu la b seesa ra teesa pʋgẽ.

²⁶Sĩnga taglem yaa nug pʋg yalem la a noor da kõoga wa laag rẽnna, ne lɩɩns puudu. A ra tõe n deega ko-yʋy tus a yiibu.

²⁷A Iram maana bilim-bilm bõonese ne zũudu. Bilim-bilm fãa woglem yaa kãntɩɩs a naase, a yalem kãntɩɩs a naase, a zãndlem kãntɩɩs a tãabo.

²⁸B ra kud-b-la woto: bilim-bilma yaaga ra wʋga ne zũud sẽn ya paklse n ka yalem ye la yɩɩ woto a tẽngr n wat a yĩngri, n maneg n sẽbg ne kud-tagd a naase.

²⁹Bilim-bilma ra ninga fan-teedo: bõnyẽese, lolse, la malɛgse. Yĩngrã, bõnyẽesa la lolsa sẽn tek zĩig ningã, b tablga pãnega, tɩɩs vãad la puudu, tɩ b luundẽ.

³⁰Zũud gʋl a naase n da be bilim-bilm fãa tẽngre. B paasa gʋla sẽn tuiid zĩig ninga pãnga la rẽ fãa naagame n dõog wakat yɛnga. Bãeens niyns Sẽn paasd pãnga ninga sĩnga tẽngre, n welg ne fan-teeda sẽn dõog n naagã.

³¹Bilim-bilma yĩngrã ra kɩbga no-gilga. Noora ra zẽka sẽn ta kãntɩɩga ne bãeensa sẽn pɩʋʋmd taab tẽngrã la ko-sĩng la b wat n sagl a pʋgẽ. Noora yalma yaa kãntɩɩg la pʋɩ-sʋk gĩsg n gilgda n sege. Sĩnga sẽn da sẽgdg zĩig ninga da ka le ya gilg a zugẽ wã ye, lebga maka, la b ra manegame n gʋl bõn-neeba tɩ sakd gesgo.

³²Gʋl a naasa ra tuii kud taokã sẽn be tẽngrã. Gĩsg ning sẽn tõe n gilg gʋlã n sege tata kãntɩɩg la pʋɩ-sʋka.

³³Gʋla ra kuda wa bilim-bilm dẽnna. Kud-bɩlgemda sẽn zãad gʋlã, gʋla nao-beongã, gʋla tẽnsʋk bokã, a tẽnsʋk bãn-dibli wã, fãa ra naag n dõoga rõog yɛnga.

³⁴Ko-sĩnga sẽn da zao bãeens a naas niyns sẽn pɩʋʋmd-b b taab tẽngrã ra naagame n dõog rõog yɛnga.

³⁵Bilim-bilma yĩngrã, b ra gõda bãng sẽn ta kãntɩɩg pʋɩ-sʋka n maan gãtga. Gãtga maneg n soga ne tẽngr bãn-tagdã.

³⁶Ko-sĩnga zugu, gãtsa la tẽngr bãeensa zugu, b ra kɩɩsa ne kɩtga, n gilgi, malɛgse, bõnyẽese, koms vãado; tɩɩs vãad ne puud pãnega la b rõog n gilgi.

³⁷Yaa woto la a Iram kud bilim-bilm piigã. B fãa rõoga rõog yɛnga, b bedrema ra taa taaba, la b ra wẽnda taaba.

³⁸ [22†] A Iram maana zũud sĩms piiga. A ye fãa da reegda ko-yʋy pis-naase, a ye fãa da magda kãntɩɩs a naase. Bilim-bilm fãa da tara a ko-sĩnga.

³⁹A yalsa bilim-bilm a nu wẽnd dooga goabga, n ning a nu rɩtgo. Sã n ya ne mogrã (ko-sĩng bedrã), yaa wẽnd dooga nug rɩtg la b yals yẽnda, n tees yaang bilfu.

⁴⁰ [23†] A Iram sẽn yõg yõg-laase, zɩ-mesdem laase la kardo, a baasa tʋʋmd ning fãa a Salomo sẽn da yet t'a tʋm a yĩng wẽnd dooga pʋgẽ. Ad teeda sõadga:

⁴¹A yõga zũud-ra-lug bɛd a yiibã, n paas sẽn dog b zugẽ wã, gãms a yiibã sẽn mobg ra-lug bɛda zug sʋka,

⁴²kitrizĩgnis kobs-naasã, sẽn da sog gãmsa, rũnus a yiibu, ra-luga sɛtmẽ.

⁴³A yõga bilim-bilm piiga la sĩms piigã b sẽn da zɩtã,

⁴⁴sĩn-kãseng a ye wã ne a lols piig la a yiibã;

⁴⁵tompɛglma laase, zɩ-mesdma laase, kardã la ted a taaba sẽn kella fãa. A Iram sẽn maan bũmb ning a Salomo yĩng wẽnd dooga pʋga da yaa zũud sẽn maneg n duugi.

⁴⁶Yaa Zʋrdẽ sɛɛgẽ la a rõog teedã, Sukot ne Sartã sʋka. Yagd da ka tuud n kong be sẽn na n maan teeda gãag-lung ye.

⁴⁷Teeda fãa wala b zĩigẽ. Teeda ra labsame, b pa tõog n geelg zũudã b sẽn dɩk n tʋma zɩslem ye.

⁴⁸ [24†] A Salomo kɩtame tɩ b maan wẽnd dooga pʋg teeda fãa, sãnem maan-kugrã la te-roagendgã, Soaala-Wẽnd bura yĩnga. Yẽ me yaa sãnem.

⁴⁹[25†] Fitils piig la b rõog ne sãnem; sõmblem dooga yĩnga, a nu rɩtgo, a nu goabga. Le paasa puudã, fitilsã, yɩʋʋda sẽn bolg sãnema,

⁵⁰la-bõonesã, wõrsdsã, zɩ-mesdma laase, yõg laasã, wisda laase sẽn dõog ne sãnem menga, kut niyns sẽn be kʋɩlensa rĩirẽ, sõmblem dooga la maanda rooga rĩirẽ.

⁵¹ [26†] Tʋʋm niyns fãa a Salomo sẽn kɩt tɩ b maan wẽnd dooga yĩnga sẽn waa n baase, a waa ne a ba, a Daviid, sẽn da kõ Soaala-Wẽnd teed niynsã: wanzurfã, sãnema, yõg-laasã, la a ning-b la wẽnd doogẽ, wa Soaala-Wẽnd arzɛka.