Read SEBR SÕNGO, 1998 2DĨM DÃMBA 10 Bible Online

2DĨM DÃMBA 10 - SEBR SÕNGO, 1998 bible

2DĨM DÃMBA 10

¹A Akab kamb pisopoe n da be Samari. A Zewu gʋlsa sebr n tool Samari nanamsã la nin-kẽembã la a Akab kamba ba wubdsã.

²A gʋlsa woto: «Ade, yãmb sẽn get dĩma kamb yelle, n tar bilim-bilm, wiidi, zab-teedo la y kẽed tãnsoben-doogẽ, y sã n deeg sebr kãnga,

³bɩ y ges yãmb zu-soaba kamb sʋka ãnd la nin-sõng la nin-tɩrga; zĩndg-y bi-kãng a ba naama zaoorẽ la y zab n fãag y zu-soaba roogo.»

⁴Dabeem yõk-b-la al wʋsgo tɩ b yeel taaba: «Dĩm dãmb a yiib sã n ka tõog nin-kãnga, tõnd yɩta a wãna n tõog-a?»

⁵Dẽ me la sõgen-kãsenga, tẽnga kombere, nin-kẽemba la kamba ba-wubds tʋm tɩ b yeel a Zewu: «Tõnd yaa yãmb yemse, yamb sẽn yet bũmb ninga bala la d na n maane; tõnd pa na n kõ ned naam ye, maan-y bũmb ninga sẽn zems yãmb nifẽ.»

⁶A Zewu leb n gʋls-b-la sebre n yetẽ: «Sã n ya boto, yãmb sã n kẽeda maam la yãmb sã n kelgda mam koɛɛga, bɩ y fiuus y zu-soaba kamba fãa zutu n wa ne b beoog woto wẽnde, mam nengẽ, Zizreyɛl tẽnga.» Dĩma kamb da yaa pisopoe n be tẽnga nin-bɛd zagsẽ tɩ b wubd-ba.

⁷Sebra sẽn ta bãmba, b yõga dĩma kamba n kood bãmb pisopoe wã fãa, n sagl b zutã pet pʋga n tool a Zewu, Zizreyɛl tẽnga.

⁸B sẽn tʋm a soaba kẽe n yeela a Zewu: «B waa ne dĩma kamb zutu.» T'a yeele: «Bɩ y rɩgl-b n tedg, tẽngã noorẽ, zĩis a yiibu, tɩ beoog vẽege!»

⁹Beoog sẽn vẽege, a Zewu yii yɩnga n yals n yeel neba fãa: «Ad-y yãmb la nin-sõma tɩ taal ka y zug ye! Maam bal zug la yell dog yã tɩ maam n zãmbe la m kʋ a Zoram. La nin-bãmba fãa sẽn ka wã, ãnda n kʋ-ba?

¹⁰Bɩ y bãng tɩ Soaala-Wẽnd gomd ba a ye ka lʋɩt vɩʋʋgẽ ye. Bãmb n gom n kãab a Akab roogo. Naaba-Wẽnd pidsa b gomdã b sẽn yeel ne b bãngd a Eli noorã.»

¹¹[18†] La a Zewu kʋ-la a Akab doog rãmb fãa sẽn kell Zizreyɛl, a kombɛɛmba, a na-yir dãmba, a maan-kʋʋdba, ali n ka bas ned ba a yembre t'a põs ye.

¹²La a Zewu sẽn yi be, a kẽnga Samari. A rɩka sore, n ta Rũm-kɩɩms Bɛt-Ekɛd, n seg Zɩɩda dĩma saam-biisi, n sok-ba: «Yãmb yaa ãnd dãmba?»

¹³Tɩ b leoke: «Tõnd yaa a Akaziyas saam-biisi, la d wat n na n pʋʋsa dĩma kamba la a kamba ma, a Zezabɛl.»

¹⁴La a Zewu, yeelame: «Yõg-y bãmb fãa vɩɩse» B yõg-b-la vɩɩse, t'a kood-ba Bɛt-Ekɛd ko-baoora sɛɛga, bãmb pis-naase la a yi. A Zewu ka bas ned ba a ye t'a põs ye.

¹⁵A Zewu yiime n yãend a Zonadab, a Rekab biiga, sẽn da wat a segbo. A Zewu pʋʋs-a lame la a yeel-a lame: «Fo pʋg yaa pɛɛlg ne maam, wala mam pʋg sẽn ya pɛɛlg ne fooma bɩ?» T'a yet tɩ n-yẽe! T'a paas: «Sã n ya boto bɩ f tud f nugu.» T'a Zonadab yõk a nugu; t'a Zewu tak-a t'a rʋ bilim-bilma pʋga, yẽ sɛɛgẽ.

¹⁶A yeelame: «Tũ maam tɩ f na yãe m sũur sẽn yik seem ninga, n na n zab Soaala-Wẽnd yĩnga!»

¹⁷A tall-a-la ne bilim-bilma n ta Samari, n kʋ a Akab doog-rãmb sẽn da ket Samari. A kʋ-b-la zãng fãa, wa Soaala-Wẽnd sẽn da yeel a Eli.

¹⁸A Zewu yaool n tigma neba fãa n yeel-ba: «A Akab waooga a Baal bilf bala, a Zewu yẽ na n waooga a Baal wʋsg-wʋsgo.

¹⁹Marsã, bɩ y bool a Baal bãngdba ne a maan-kʋʋdba fãa tɩ b wa sak-ma, la ned ba a ye da vaal ye, tɩ mam dat n maana maoong kãsenga n kõ a Baal. Sẽn vaala fãa kõn tɩlg ye.» Mik a Zewu da maanda yam n na sãam a Baal kẽedba fãa.

²⁰A kõo noor n yetẽ: «Bool-y neba tɩ b maan tigsg sõngo n waoog a Baal» B boola neba tɩ wa tigsgã.

²¹A Zewu tʋmame tɩ b sa n togs Israyɛl gilli la a Baal kẽedba fãa waame, la ned ba a ye ka pa n ka wa ye.

²²B kẽ a Baal wẽnd doogẽ, tɩ Baal wẽnd doogã pid zãnga. A Zewu yeela ned ninga sẽn da so-a futa bĩngri: «Yiis futã n kõ-ba.»

²³A Zewu tũ-la a Zonadab, a Rekab biiga, n kẽ a Baal wẽnd doogẽ, la a yeela nebã: «Bɩ y bao n gese sãnd sẽn pʋʋsd-b Naaba-Wẽnd ka naage, n ges yaa a Baal kẽedba bala n be ka.»

²⁴La b kẽeme n na n kʋ laafi kosgo la yũ-noog maoongo. A Zewu yaool n da yãka neb pis-nii tɩ b yals yɩnga, la a da yeel b lame: «Nin-bãmba sẽn dɩk n sagl yamb nusẽ wã, bɩ nin-yend meng ra põs ye. Sẽn basa ned t'a põse, yẽ la b kʋʋda.»

²⁵A Zewu sẽn kʋ yũ-noog maoongã n sɛ, a kõo tãb-biisa sẽn zao wiidi la wed-kɩɩmbã noor kanga: «Aya, wa-y! Bɩ y kʋ b fãa tɩ ned ba a ye da yi ye.»

²⁶La tãb-biisa ne wed-kɩɩmba kẽeme n kʋ-b ne sʋʋse. B tɩ loba b yĩnsa we-kɛɛnga n le kẽ a Baal wẽnd doogẽ wã n yiis da-peesma n yõog bugum.

²⁷B luba a Baal maan-kugrã, n lub a waoogra roogo, n maan t'a lebg neb rõbendg zĩiga; la rẽ n ket n be rũnna.

²⁸Woto, a Zewu kɩtame t'a Baal menem a Israyɛl sʋka.

²⁹[19†] La baasgo fãa, a Zewu ka bas yel-wẽna fãa a Nebat biig, a Zeroboam, sẽn maane, n lub a Israyɛl, yel-wẽnd pʋgẽ ye. A ka yiis sãnem nag-bi wã sẽn da be Betɛl la Dã ye.

³⁰Soaala-Wẽnd yeela a Zewu: «Fo sẽn maan sẽn ya neer la tɩrga mam nifẽ yĩnga, n maan m sũur sẽn da rat ne a Akab roogã, f yagens na n zaoonda a Israyɛl naam zaoore tɩ maan zamaan a naase.»

³¹Baasgo, a Zewu pa modg n tũ Israyɛl Wẽnnaam noor ne a sũur fãa ye. A pa zãag a meng ne yel-beed niyns a Zeroboam sẽn maan n lub a Israyɛl yel-wẽnd pʋgẽ ye.

³²Dẽ me la Naaba-Wẽnd le sɩng a Israyɛl soolma wãdsgo, t'a Azayɛl, Siri dĩma, kaoog zabre ne Israyɛl kamba, Israyɛl soolmẽ gilli, n tõog-ba.

³³A tõog n deega tẽns niyns fãa sẽn be Zʋrdẽ kʋɩlga yaanga la tẽns niyns sẽn be Aroɛr goabga, Arno kʋɩl bɛɛga noorẽ, dat n yeelame tɩ Galaad la Bazã. Be la a Gad, a Rubẽ la a Manase yagensa da kẽeda.

³⁴A Zewu tʋʋm a taaba, a sẽn maana fãa, a sũ-keelma, dẽ fãa pa gʋls dĩm dãmba sebr pʋgẽ bɩ?

³⁵A Zewu tɩ saka a saam-dãmb, b mum-a-la Samari; a biiga a Zoakaz n led-a zaoorẽ.

³⁶A Zewu dɩ a Israyɛl naam, Samari, tẽnga, yʋʋm pisi la a nii.