Read SEBR SÕNGO, 1998 2DĨM DÃMBA 13 Bible Online

2DĨM DÃMBA 13 - SEBR SÕNGO, 1998 bible

2DĨM DÃMBA 13

¹A Zowas yaa Zɩɩda dĩma a Akaziyas biiga. A Zowas naama pisi la a tãab yʋʋmde la dĩm me reeg naam Israyɛl tẽn-peelmẽ, Samari tẽnga. Yɩ-la a Zoakaz, a Zewu biiga.

²A Zoakaz dɩɩ naam yʋʋm piig la a yopoe. A maana sẽn ya wẽnga, Soaala-Wẽnd nifẽ; a togsa a Zeroboam sẽn lub Israyɛl yel-wẽnd ninga pʋgẽ; a pa tol n woog a wẽnema ye.

³Soaala-Wẽnd sũ-puur yãnga ne a Israyɛl kamba, tɩ b bas-ba Aram dĩma, a Azayɛl, nugẽ, n le bas-ba a biiga, a Ben-Adad, nugẽ, wakat buud fãa.

⁴La a Zoakaz yõka Soaala-Wẽnd sɛɛga n sigs b sũuri la b reega a kosgo,

⁵tɩ b yãee wẽoogr ninga Aram dĩma sẽn da wẽoogd a Israyɛl. Naaba-Wẽnd kõ-la a Israyɛl fãagda; a Israyɛl kamba tɩlga Aramsã. B leb n zĩnda b rotẽ wẽnd pĩnda.

⁶La baasgo bãmb kell n ka bas a Zeroboam dooga sẽn maan n lub a Israyɛl yel-wẽnd pʋgẽ wã ye. B pʋs n yɩɩga ne wẽnem menga. Ra-peesdma da ket n lugla Samari tẽnga.

⁷Neb sẽn da tõe n bob zabr la sẽn da ket ne a Zoakaz da pa yɩɩd wed-dʋʋdb pis-nu, bilim-bilm piiga la tãb-biis tus piig bal ye. Yaa Aram dĩma sẽn da kʋ n keesa la rẽ. Aram dĩma ra tab-b-la wa nao sẽn tabd tẽng tom.

⁸A Zoakaz tʋʋm a taaba a sẽn maane, la a raoodã, dẽ fãa pa gʋls Israyɛl dĩm dãmba kibara sebr pʋgẽ bɩ?

⁹A Zoakaz tɩ saka a saam-dãmb tɩ b mum-a Samari, t'a biiga a Zowas led-a a zaoorẽ.

¹⁰Zɩɩda dĩma, a Zowas da ta-la a naama pis-tã la a yopoe yʋʋmde. Wakat kãng la Zowas a to, a Zoakaz biig lebg dĩm Samari tẽnga, Israyɛl tẽn-peelmẽ. A rɩɩ naam yʋʋm piig la a yoobe.

¹¹A maana sẽn ya wẽnga Soaala-Wẽnd nifẽ; a ka bas a Zeroboam, a Nebat biiga sẽn maan n lub a Israyɛl yel-wẽnd pʋgẽ ye.

¹²A kell n maana wẽng bala. A Zowas tʋʋm a taaba, a sẽn maan fãa, a sẽn zab ne a Amaziyas, Zɩɩda dĩma, ne raood ningã, dẽ fãa pa gʋls Israyɛl dĩm dãmba kibara sebr pʋgẽ bɩ?

¹³A Zowas tɩ saka a saam-dãmba t'a Zeroboam led-a a zaoorẽ. B muma a Zowas Samari ne Israyɛl dĩm dãmbã.

¹⁴ [24†] A Elize yika pa-keem, a da bẽeda bãag ninga sẽn na n yɩ a yõor bãaga. A Zowas, a Israyɛl dĩma, wa-la a nengẽ, n mobg-a n yãbd la a yetẽ:

¹⁵«M ba, M ba, a Israyɛl pãnga, a tãnsoab menga!» A Elize yeel-a lame: «Rɩk f tãpo, la f pɛɛma.» T'a rɩk tãp la pɛɛma. T'a Elize yeel-a:

¹⁶«Dõos tãpã ne f nugu.» Tɩ dĩma dõos tãpã ne a nugu. La a Elize ninga a nugu dĩma nusẽ n yaool n yeel-a: «Pak võore n tees yaanga» Tɩ dĩma pake.

¹⁷La a Elize yeel-a lame: «Tão!» T'a tão. T'a Elize yeele: «Ad fãagr pĩim sẽn yit Soaala-Wẽnd nengẽ. Yaa pĩim sẽn na n fãag yãmb ne Aram. Fo na n pãba Aramsa Afɛk, ali n sãam-b zãnga.»

¹⁸A Elize le yeelame: «Rɩk pɛɛma!» Tɩ dĩma dɩk-ba, T'a Elize yeele:

¹⁹«Wẽ tẽngã!» Tɩ dĩma wẽ tẽngã naoor a tã n yaase. La Wẽnnaam nedã sũur yika ne-a, a yeelame: «Fo ra kõn wẽẽ naoor a nu bɩ a yoobe woto fo ra na pãbẽ Aram n sãam zãnga la marsã fo na n tõog-a-la naoor a tã bala»

²⁰A Elize kiime tɩ b mum-a. La ade, Moabitsa tãb-biis da mi n kẽeda tẽnga, yʋʋmd yʋʋmd fãa.

²¹Daar a yembre neb da tʋka kũum n na n tɩ mum, la b yãee Moabitsã n lob kũuma a Elize yaoogẽ la b looge. Kũuma sẽn sɩɩs a Elize kõaba, a vʋʋgame n yik n yals yĩngri.

²²A Azayɛl, Aram dĩma wẽooga a Israyɛl, a Zoakaz vɩɩm tɛka.

²³La Soaala-Wẽnd maan-b-la bãn-loeere n zoe b nimbãanega, n wilg-b nonglem, n wẽnemd b neng n ges-ba, zooda sẽn da yõg ne a Abraam, la a Izaak, la a Zakoob yĩnga. B ka sak n sãam-a zãng ye. Wakat kãnga b ka rig-ba n yiis b taoor n zãag ye.

²⁴Dĩm a Azayɛl kiime t'a biiga Ben-Adad led a zaoorẽ

²⁵Wakat kãnga, a Zowas, a Zoakaz biigã, le reega a Azayɛl biig a Ben-Adad nugẽ tẽns-niyns a sẽn da gʋsg a ba a Zoakaz naamẽ, zabr wẽnde. A Zowas tõog-b-la naoor a tã n le reeg a Israyɛl tẽnse.