Read SEBR SÕNGO, 1998 2DĨM DÃMBA 17 Bible Online

2DĨM DÃMBA 17 - SEBR SÕNGO, 1998 bible

2DĨM DÃMBA 17

¹Zɩɩda dĩma a Akaz naam piig la a yiib yʋʋmde, a Oze, a Ela biiga, lebga Israyɛl dĩma, Samari. Yaa yʋʋm a wɛ la a a rɩ naam.

²A maana sẽn pa neere Soaala-Wẽnnaam nifẽ, la pa yɩ wala Israyɛl dĩm dãmba sẽn deng yẽ wã ye.

³Asiri dĩm a Salmanazar waame n na n zab ne a Oze, la a tõog-a lame n kit t'a yaood fadgo.

⁴Asiri dĩma waa n bãngame t'a Oze da zãmbd-a lame. A Oze da soos n tʋma neb tɩ b kẽng Ezipt dĩm a So nengẽ, la a da pa yao Asiri dĩma fadgo wala yʋʋmd fãa ye. Asiri dĩma kẽes-a-la bi-bees roogẽ, n balg-a bãnga.

⁵Asiri dĩma bobame n na n zab ne tẽnga fãa, n wa gũbg Samari, n na n yẽd-a, n pãb-a, yʋʋm a tã tõre, n tõog-a.

⁶La a wʋka Israyɛl kamba n kẽng yembdo Asiri. A tɩ zĩndig-b-la Ala, la Abor, Gozã kʋɩlga noorẽ, la Mɛd dãmba tẽnsa pʋsẽ.

⁷Sẽn yɩ woto wã, yaa a Israyɛl kamba sẽn beeg Naaba-Wẽnd, bãmb Wẽnnaam, sẽn da yiis-b Ezipt tẽnga, n yols-b ne Ezipt dĩma wẽoogre. Yaa b sẽn bas tɩ wẽn-naandsa rabeem yõk-bã.

⁸Bãmb tũu bu-zẽmba noya, bu-zẽmb niyns Naaba-Wẽnd sẽn da rig b rãmba n yiis bãmb taoorã. B tũu noy-niyns Israyɛl dĩm dãmba sẽn da kõ b mense.

⁹Israyɛl kamba tʋma sẽn kisi, n paoog Naaba-Wẽnde, bãmb Wẽnnaam. B mee roto b kunkuba zutu, wẽn-naandsa waoogr yĩnga, b sẽn kẽ tẽng ning fãa, gasda zutu wala b tãnsoben-dotẽ.

¹⁰[34†] B lugla maan-kuga, n sel ra-peesdi tãmsã fãa zutu, la tɩɩsa maasmẽ.

¹¹B kunkuba zutu b yõoga tɩdare wala buud a taaba, Soaala-Wẽnd sẽn dig b rãmb n yiis bãmb taoore. B tʋma tʋʋm yoodo n beeg Naab Wẽnde.

¹²Bãmb waooga wẽn-naandse, la Naaba-Wẽnd da yaool n yeela bãmba: «Da saag-y n maan dẽnna ye.»

¹³Naaba-Wẽnd da sagla a Zɩɩda ne a Israyɛl ne no-rɛɛsdba la bãngdba fãa. B sagl-b la woto: «Bɩ y teem zʋgo, reeg-y m noya, pids-y m daabã. Noy bãmb la m sẽn kõ y ba rãmba tɩ m tʋʋm-tʋmdba la bãngdba reeg n taas yãmbã.»

¹⁴La b pa reeg noora ye; b kenga b yubla n yɩɩd b saam-dãmba sẽn maane, n pa tẽ Naaba-Wẽnd, bãmb Wẽnnaam ye.

¹⁵B sãbsa b noya ne b Zoodã b sẽn yõg ne b saam-dãmbã. Naaba-Wẽnd maka zaalem n na leb n nek b pʋtẽere. Bãmb zoe n pʋga sẽn ka võore, la ad-b sẽn yɛs zaalem. B pʋga buud niyns sẽn da gũbg bãmbã. Soaala-Wẽnd da yaool n sagl-b lame tɩ b ra maan wa bãmb ye.

¹⁶[35†] Bãmb zãgsa Naaba-Wẽnd, bãmb Wẽnnaam, noya fãa; bãmb yõga zũudu n maan nag-bi a yiibu. Bãmb peesa raado, n sel, n sɩng-b waoogre, b waooga yĩngr ãdsã, b waooga a Baal.

¹⁷[36†] Bãmb kɩtame tɩ b kom-pugli la b kom-dibli pɩʋʋg bugum; b bʋga bagre, n sok wẽn-naandse, n sak wẽnem n beeg Wẽnnaam b Soaala.

¹⁸La Naaba-Wẽnd sũur yĩiga ne a Israyɛl, ali wʋsgo, tɩ b yiis-a b taoore, n kees a Zɩɩda bal a ye.

¹⁹A Zɩɩda me ka reeg Naaba-Wẽnd noya ye. Yaa a Israyɛl sẽn da yals bũmb niynsa la a tũ yã.

²⁰Dẽ n so tɩ Soaala-Wẽnd yam yi ne Israyɛl buud gilli, tɩ b ning-a yãnde n bas-a ne fãadba, n wa baas n dig-b n zãag bãmb taoore.

²¹Sɩd me, Naaba-Wẽnd sẽn waa n welg a Israyɛl ne a Daviid roogo, t'a Israyɛl yãka a Zeroboam, a Nebat biigã, n kõ a naam, ad-y yaa yẽnna, ad-y yaa a Zeroboam n zãag a Israyɛl ne Naaba-Wẽnde, n kɩt t'a lʋɩ yel-wẽn-kãseng pʋgẽ.

²²A Israyɛl kamba togsa a Zeroboam n maan yel-wẽn niyns fãa a sẽn maana.

²³Naaba-Wẽnd me waa n makame n kong n dig a Israyɛl n yiis b taoore, wala b sẽn da kɩt tɩ bãngdbã, bãmb neba, pĩnd n togs-ba. B waa n kong n basame tɩ b wʋka a Israyɛl kamba n kẽng Asiri, tɩ b zãag ne b tẽnga, n ta rũnna.

²⁴Asiri dĩma kɩtame tɩ neb yi Babilon, n yi Kuta, Ava, Amat la Sefarwayim, n zĩndig-b Samari tẽnsã fãa pʋsẽ tɩ b reeg a Israyɛl kamba zĩiga. B reega Samari n maan b tẽnga n kẽ a tẽn-peelma fãa.

²⁵B sẽn wa n ta tẽnga paalem, bãmb sẽn da pa waoogd Naaba-Wẽnd yĩnga, Naaba-Wẽnd tʋma gɩgma tɩ b wat n kʋʋd-ba.

²⁶Dẽ me la b waa m yeel Asiri dĩma: «Neb niyns fo sẽn wa n zĩndig Samari wã pa mi tẽnga rãmb wẽnda sẽn waoogd seem ning ye, la yaa rẽ la b wẽnda tʋm gɩgma tɩ b wa wãb-ba.»

²⁷Asiri dĩma kõo noor kãnga: «Bɩ y yãk maan-kʋʋd a ye m sẽn kẽes yembdo t'a lebg n wa zĩnd ka n zãms-b Israyɛl Wẽnnaam pʋʋsgo.»

²⁸La maan-kʋʋdba b sẽn da yõg Samari n loog pa-weerã sʋka, ned a yembre n wa n zĩnd Betɛl: la a da zãmsd-b-la Naaba-Wẽnd sẽn tog n waoog seem ninga.

²⁹La sã n ya sɩda, Asiri rãmba maana wẽn-naandse n kõ b menga, n ning-b pʋʋsga zĩisẽ, Samari dãmba sẽn da me wã. Buud kam fãa ra maanda boto, a sẽn da be tẽng ning pʋgẽ:

³⁰Babilon dãmba da maana b Sukot-Benot, tɩ Kuta rãmba maan b Nergal, tɩ Amat rãmba maan b Asima. [37]

³¹Awa rãmba maana b Nibaz la b Tartak, tɩ Sefarwayim dãmb ket n yõod b kamb bugum a Adramelɛk la a Anamelɛk waoogr yĩnga. Bãmb n da ya Sefarwayim wẽn-naandsã.

³²B da rigda Naaba-Wẽnd dabeem la bãmb sʋka, b ra tũusa neba n maan b maan-kʋʋdba, sẽn da pʋʋsd bãmb zĩigẽ, b wẽn-naandsa rotẽ.

³³Woto b ra waoogda Naaba-Wẽnd la b ra waoogda b wẽn-naandsa me, wala bu-zẽna sẽn da maand b tẽnsẽ.

³⁴ [38†] Al ne rũnna, b ket n tũuda b pĩnd dog-m-mika. B ra pa waoogd Naaba-Wẽnde, b pa tũud b sẽn yeel-b tɩ b waoog b seem ninga, b pa tũud saglsã la noya Naaba-Wẽnd sẽn da kõ a Zakoob kamba n tol n pʋd a yʋʋr t'a Israyɛla ye.

³⁵[39†] Naaba-Wẽnd da yõga zoodo ne bãmba n da kõ-b noor kãnga: «Bɩ y da saag n waoog bu-zẽn wẽn-naandsa ye, da wõgemd-y bãmb taoor ye; da pʋʋs-y-b ye; la y da kõ-b maand ye.

³⁶[40†] Yaa Naaba-Wẽnd bal n yiis yãmb Ezipt soolmẽ ne b pãng kẽeng ningã, b sẽn tẽeg b kanga raarã. Yaa bãmb la yãmb na n pʋʋs la y waoog ne maando.

³⁷Yãmb na n tũ b sẽn wilg yãmb tɩ y pʋʋs seem ninga, n deeg noya b sẽn gʋls n kõ yãmba, la y reeg b neer daar fãa, la y ra waoog wẽn-naandsa ye.

³⁸Bɩ y da saag n yĩm zooda mam sẽn yõg ne yãmb ye, la y da waoog wẽn-naandsa ye.

³⁹Waoog-y Naaba-Wẽnd, yãmb Wẽnnaam bala, la bãmb na n fãaga yãmb y bɛɛb nusẽ.»

⁴⁰La a Israyɛl kamb pa reeg b noor ye, bãmb kell n tũu b pĩnd dog-n-mikã.

⁴¹Woto nin-bãmba buudu da waoogda Naaba-Wẽnd, la b da waoogd wẽn-naandse tɩ b kamba la b yagens ket n maand dẽ rũnna.