Read SEBR SÕNGO, 1998 2DĨM DÃMBA 2 Bible Online

2DĨM DÃMBA 2 - SEBR SÕNGO, 1998 bible

2DĨM DÃMBA 2

¹Ad bũmb ning sẽn maane Soaala-Wẽnd sẽn wa n kɩt t'a Eli tũ sɩlmand n dʋ yĩngrã. Sega yẽ ne a Elize sẽn waa n zãagd ne Gilgal,

²t'a Eli yeel a Elize: «Kabre! La kell n yaas kaalẽ, tɩ Soaala-Wẽnd tʋm-m-la al Betɛl.» La a Elize leokame: «M wẽend ne Wẽnd la ne yãmb menga, tɩ mam kõn serg n bas yãmb ye!» B tũu taab n ta Betɛl.

³Bãngdba karen-biis sẽn da be Betɛl yii n sega a Elize n sok-a: «Yãmb bãngame tɩ dũnna Soaala-Wẽnd na n dɩka y zu-soabã n loog ne b yĩngri bɩ?» T'a leoke: «Mam me miime, bɩ y da le gom ye!»

⁴A Eli yeela a Elize: «Bɩ f pa kaalẽ tɩ Soaala-Wẽnd tʋm-m-la Zeriko bala.» T'a Elize leoke: «M wẽend ne Wẽnde, la ne yãmb menga, tɩ m kõn serg n bas yãmb ye!» B tũ taab n kẽng Zeriko.

⁵Bãngdba karen-biis sẽn da be Zeriko, bãmb me kolg n soka a Elize: «Yãmb bãngame tɩ dũnna Soaala-Wẽnd na n dɩka y zu-soabã n loog ne b yĩngri bɩ?» T'a leok-ba: «Mam me miime, bɩ y da le gom ye!»

⁶A Eli yeel-a lame: «Bɩ f yaas kaalẽ tɩ Soaala-Wẽnd tʋm-m-la Zʋrdẽ.» La a leokame: «M wẽend ne Wẽnd la ne yãmb menga, tɩ mam kõn serg n bas yãmb ye!» Bãmb b yiib le rɩka sore.

⁷Bãngdba karen-biis pis-nu yõsg-b lame n tɩ yals b taoore, yɩɩga, tɩ bãmb b yiib yaool n yɛs Zʋrdẽ kʋɩlga noore.

⁸A Eli yeega a fuug n kʋ n dɩk n wẽ kooma t'a welg rɩtg la goabga, tɩ bãmb tab tẽn-koɛɛnga n dʋʋge.

⁹[3†] B sẽn waa n dʋʋgd kʋɩlgã, a Eli yeela a Elize: «Sok n ges yaa bõe la m na n maan f yĩnga tɩ m nan ka loog n bas-fo?» T'a Elize leoke: «Pʋdg-y maam y yama, la m pʋɩɩr yɩ pidungu.»

¹⁰T'a Eli leoke: «Fo kota bũmb sẽn ya toogo; b sã n wa loogd ne maam tɩ fo yɛs n getẽ, f na pam f sẽn kotã, la kõn yɩ boto f sã n ka yãend-m ye.»

¹¹Bãmb sẽn da kẽnd la b sõsd ne taaba, bugum bilim-bilm la bugum wiidi n waa n welg-b ne taaba, t'a Eli tũ sɩlmand n dʋ yĩngri.

¹²[4†] A Elize da ne-a lame la a kelemdẽ: «M ba, m ba, a Israyɛl bilim-bilm la a wed-dʋʋdb tãnsoaba!» A waa n pa le ne-a ye; la a taka a fuug n kẽeg a yiibu;

¹³A rɩka fuugã sẽn da paag a Eli bãgdo n lʋɩ wã, n lɛɛg n wa Zʋrdẽ n yals kʋɩlga noor.

¹⁴A rɩka a Eli fuugã n wẽ kooma n yetẽ: «Soaala-Wẽnde, a Eli Wẽnda bɛɛ?» Yẽ me wẽe kooma t'a welg rɩtg la goabga t'a rʋʋge.

¹⁵Bãngdba karen-biis sẽn yi-b Zeriko la sẽn da yɛs n getẽ yãenda a Elize sẽn maana la b yeelame: «A Eli pãnga siga a Elize zugu.» B kẽngame n tɩ seg-a la b wõgemda tẽnga, a taoore.

¹⁶B yeel-a lame: «Ad-y neb pis-nu sẽn tar raoodo n paas tõnd y yemsã n be ka. Bas-y tɩ d saag n bao y zu-soabã. Tõe tɩ Soaala-Wẽnd pãnga dɩk-b lame n tɩ bas tãng ninga zug bɩ longẽ.» T'a Elize leok-ba: «Da tʋm-y ned ye!»

¹⁷B sẽn da ket n tar-a pẽdgre yĩnga a yeel-b lame: «Bɩ y tʋm neb!» B tʋma neb pis-nu wã tɩ b bao a Eli dasem a tã la b pa yãe-a ye.

¹⁸Tɩ b lebg n wa bʋʋg a Elize sẽn da be Zeriko, n togs, t'a yeel-ba: «Mam da pa pĩnd n yeel yãmb tɩ ra kẽng bɩ!»

¹⁹Tẽnga rãmba wa n yeela a Elize: «Wala d zu-soaba sẽn ne wã, tẽnga zĩndgu bee neere, la yaa kooma bal n pa sõmbe, n sãamd dogem.»

²⁰A Elize yeelame: «Wa-y ne lengre paalga la yamsem.»

²¹Tɩ b tall n wa. A Elize kẽnga kooma sẽn da bund zĩig ninga, n yãk yamsem n lob koomẽ wã n yeele:

²²«Naaba-Wẽnd koɛɛg la woto: Mam manega kooma t'a lebg sõngo, a kõn le wa ne kũum, a kõn le sãam dogem ye!» La kooma lebga sõmbo n ta ne rũnna, wala a Elize sẽn yeele.

²³A Elize yii be b dʋ Betɛl, la a sẽn da wa n dʋʋda, kamb yii tẽng pʋgẽ n laad-a n yetẽ: «Zug kõoga rʋ! Zug koella rʋ!» [5]

²⁴T'a Elize wẽneg poorẽ n ges-ba, n kãab-b beed ne Wẽnde. La rũms a yi toolem sẽn yɩɩd gɩgemde yii kãoongẽ n wãb bãmb pis-naas la a yi.

²⁵A Elize yii be n kẽng Karmɛl tãngã la a yaool n lebg n waa Samari.