Read SEBR SÕNGO, 1998 2DĨM DÃMBA 3 Bible Online

2DĨM DÃMBA 3 - SEBR SÕNGO, 1998 bible

2DĨM DÃMBA 3

¹A Akab biiga, a Zoram, yɩɩ Israyɛl dĩm Samari. Yɩɩ Zɩɩda dĩma, a Zozafat wakatẽ, a sẽn waa n dɩt a yʋʋm piig la a nii naam. A Zoram rɩɩ naam yʋʋm piig la a yi.

²A sẽn maana yɩɩ wẽng Naaba-Wẽnd nifẽ. Baasgo, a wẽnema ka ta a ba la a ma rẽnd ye. A vika Baal kug peesma a ba sẽn da lugli.

³A yam pa tol n lak ne yel-wẽnd ning a Nebat biig a Zeroboam sẽn da kɩt t'a Israyɛl lʋɩ a soab pʋgẽ wã ye. Bũmb pa woog ye.

⁴Moab dĩm, a Mesa, da gʋʋnda rũmsi, la yʋʋmd fãa, a ra yaooda a Israyɛl dĩma fadgo ne pe-kõbdo. Yaa pe-bi tus koabga la pe-raad tus koabg rẽnna.

⁵A Akab kũum poore, Moab dĩma zãgsame t'a kõn le yao a Israyɛl dĩma bũmb ye.

⁶Dẽ la a Zoram yi Samari n saag n sõd a Israyɛl gilli.

⁷A tɩ kɩtame tɩ b yeel Zɩɩda dĩm, a Zozafat: «Moab dĩma tõdga m noore, f na n tũ-m lame tɩ d tɩ tak zabr ne-a bɩ?» T'a yeele: «Mam na n tũume. Ad tõnd na n yɩɩ bũmb a ye bala, maam ne foom, mam soolma rãmb na n yɩɩ wa fo soolem, mam wiida na n yɩɩ wa fo rẽnna.»

⁸La a le yeelame: «D tũuda so-bʋgo n kẽnge?» T'a leoke: «Edom we-raooga sore!»

⁹Israyɛl dĩma, Zɩɩda dĩma la Edom dĩma loogame. B sẽn kẽne, b maana rasem a yopoe la koom waa n paooga tãb-biisã la rũmsã sẽn da pʋgd-b ne teedã.

¹⁰Tɩ Israyɛl dĩma yeele: «M ba yeee! Yaa Naaba-Wẽnd n tigim tõndo, dĩm dãmba a tã, n na n dɩk-do n sagl Moabitsa nugẽ»

¹¹T'a Zozafat soke: «Wẽnd bãngd a ye ka be ka, tɩ d tũ a maasem n sok Soaala-Wẽnd laa?» La Israyɛl dĩma na-yir-dao n leoke: «A Elize, a Safat biigã, n be ka la yẽ ne a Eli n da zemsd taaba.»

¹²Tɩ Zɩɩda dĩm yeele: «Soaala-Wẽnd bee ne-a n gomd ne-a.» Israyɛl dĩma, Zɩɩda dĩma, la Edom dĩma kẽnga a Elize nengẽ.

¹³A Elize yeela Israyɛl dĩma: «M toogo be ne foom? Kẽng n tɩ bʋʋg f ba wã la f ma wã wẽn-faada bãngdba.» Dẽ la Israyɛl dĩma leok yã: «Ayey! Yaa Naaba-Wẽnd meng b toore n bool tõnd d tãabo, n na n dɩk-d n sagl Moab rãmb nusẽ.»

¹⁴A Elize yeelame: «M wẽend ne Naaba-Wẽnde, pãng rãmba Zu-soaba, m sẽn tũudã, tɩ m sã n da ka ningdẽ sʋka, Zɩɩda dĩm, a Zozafat, m kõn kelg f leokr ba a ye, m kõn ges-f ne m nif meng ye!

¹⁵Ges marsã n bao yɩɩn-yɩɩnd a ye sẽn mi yɩɩla n kõ-ma!» Yʋʋmba sẽn waa n yɩɩnẽ, Soaala-Wẽnd nug tika a Elize,

¹⁶t'a yeele: «Soaala-Wẽnd koɛɛg la woto: Kẽ-y sudga pʋga n tu bogd wa y sẽn dat tɛka!

¹⁷Wala Soaala-Wẽnd sẽn togsde, yãmb nif kõn yãend sobgo, a kõn yãend saag ye, la sudga na n pida ne koom, tɩ y yũ, yãmb ne y tãb-biisi la y rũmsi.

¹⁸La rẽ yaa wa zaalem, n ka tõe n mak ne b sẽn na n dɩk a Moab n sagl y nugẽ wã ye.

¹⁹Yãmb na n pãbame n sẽeg b tẽnsã sẽn gũbg ne lalse, la b tẽn-bɛdã; yãmb na n kɛɛ b tɩ-rɩtsa fãa, yãmb na n yẽda b bulsa fãa, yãmb na n wʋka kug n sam b pʋtã n sãam ba.»

²⁰Beoog sẽn vẽege, maoonga kʋʋb wakato, koom fõda Edom n wa yʋgemd tẽngã zãnga.

²¹Moabitsa sẽn da wʋm tɩ dĩm dãmba sũu taaba n wat n na n tak zabr ne bãmba, boola neb niyns fãa sẽn da tõe n bob zab teedo, kom-bɩɩba la neb yʋʋm sẽn paam n fisgi, la b tɩ yalsa tẽnga toaagẽ.

²²Dɩlla b sẽn nek yibeoogo la b ne wĩndgã sẽn yãgd koom zugu, Moabitsa yãendame tɩ kooma rɩga b taoor miuug wa zɩɩm.

²³B yeelame: «Yaa zɩɩm! Daare dĩm dãmba wõoga b sʋʋse n zab n kɛ taaba. Aya, Moab kamba, d zoe marsã n tɩ zɛ d zɛɛbo!»

²⁴La bãmb sẽn kolg Israyɛl kamba tãb-sika, a Israyɛl kamb yik n kaooga zabre ne bãmb n tõog-ba, tɩ b zoe. B kell n pʋg-b-la b tẽngẽ n kʋ-ba.

²⁵B luba tẽnsa lalse, tɩ ned kam fãa wʋk kug n lob b pʋtẽ, n yẽd b bulsã, n kɛ b tɩ-rɩtsã. Kir-Aresɛt bal n wa n kelle, tɩ loobsa rãmb gũbg-a n lob-a kuga.

²⁶Moab dĩma sẽn mik tɩ zabrã yɩɩda a pãnga, a yãka neb kobs-yopoe sẽn bob sʋʋse la b yii ne pãnga n na n bʋʋg Edom dĩma, la b pa tõog ye.

²⁷Woto wã, a yõka a bi-kẽenga, sẽn da tog n led-a a zaoorẽ wã, n kodg-a, n maan maoong lalga zugu, la nebã yika beem menga ne Israyɛl kamba tɩ b bas Moab dĩma n zoe n leb b tẽnsẽ.