Read SEBR SÕNGO, 1998 2DĨM DÃMBA 5 Bible Online

2DĨM DÃMBA 5 - SEBR SÕNGO, 1998 bible

2DĨM DÃMBA 5

¹Siri dĩma tãnsoaba, a Naama, yamleoog ra kẽ-la a zu-soabã. Dĩma sɩd da nong-a-la wʋsgo, tɩ da tũu ne yẽnda tɩ Naaba-Wẽnd fãag Siri dãmba. Tãnsoaba sẽn da pid ne raoodã da bẽeda yĩng bãaga.

²La Siri dãmba da kẽnga fãabo n tɩ peeg a Israyɛl tẽng bi-pugla n maan yem-poaka, t'a ra tʋmd a Naama paga roogẽ.

³Bi-pugla yeela a zu-soaba paga: «M zu-soaba sã n da tõe n taẽ bãngda sẽn be Samari wã nengẽ, a ra na yols-a ne a bãagã.»

⁴T'a Naama kẽng n tɩ togs a zu-soaba woto: «Israyɛl tẽng bi-pugl n gom woto la woto.»

⁵La Siri dĩma leok-a lame: «Bɩ f kẽng tɩ m na tool Israyɛl dĩma sebre.» La a Naama kẽngame. A zɩɩ wanzurf sẽn ta neb piig la a nu zɩɩbo, sãnem sẽn ta neb a tãab zɩɩbo la fut piiga, a sẽn na n yeelgdẽ n teemnẽ.

⁶A Naama sẽn ta Israyɛl dĩma nengẽ, dĩma kɩs-a la sebre Siri naaba yĩnga. Sebra ra gʋlsa woto: «Sebrã sã n ta yãmb bala, bãng-y tɩ maam n tʋm m sõgne, a Naama, tɩ y sõng t'a tɩlg ne a yĩnga bãaga.»

⁷Israyɛl dĩma sẽn karem sebrã, a kẽesa a futu n yetẽ: «Mam yaa Wẽnd laa, n kʋʋd la m kõt vɩɩm, tɩ b tʋmd wãoor m nengẽ tɩ m sãoog a wãoodo? Ges-y, a ka baood m noor sɩda!»

⁸A Elize, Wẽnnaam neda, sẽn wʋm tɩ Israyɛl dĩma kẽesa a futu, a tʋmame tɩ b yeel dĩma: «Yãmb kẽesa y fut bõe yĩnga? Bɩ a Naama wa m nengẽ la a na bãng tɩ bãngd bee Israyɛl tẽnga.»

⁹A Naama waa ne a wiidi la a bilim-bilm n tɩ yals a Elize dignoorẽ.

¹⁰A Elize tʋmame tɩ b yeel-a: «Kẽng Zʋrdẽ kʋɩlgã n tɩ so naoor a yopoe tɩ f yĩng na sãooge la f kõn le yɩ rẽgd ye.»

¹¹A Naama sũur puugame t'a loog, n yeele: «Ade mam da tẽedame t'a na n yiẽ n sega maam, la a wa a toore n pʋʋs Wẽnnaam, a Soaala, la a rɩk a nugu n sɩɩs mam yĩngã n sãoog m bãagã.

¹²Damas kʋɩlsã, Abana la Farfar, pa são a Israyɛl kʋɩlsa fãa bɩ? Mam ka tõe n so be n paam laafi laa?» La a wẽnemdame n dɩk a sor n kuiisẽ ne sũ-puuri.

¹³T'a sõgen kãsenga kolg n gom ne-a, n yeele: «Ba bãngda sã n da kosẽ yãmb bũmb sẽn ya toogo, y ra kõn maanẽ bɩ? Tɩ b pa gomd a sẽn yeel bala: ‹So tɩ f na paam laafi!› »

¹⁴[8†] Dẽ marsã la a Naama sig n lis Zʋrdẽ koomẽ naoor a yopoe, wala Wẽnnaam neda sẽn kõ noore, la a yĩng lebga wa bi-bilf yĩnga, la a paama laafi.

¹⁵A leba Wẽnnaam neda nengẽ ne a poorẽ dãmba fãa n tɩ yals a taoore n yeele: «Marsã, mam miime tɩ Wẽnd ning sẽn be Israyɛl tẽnga bala la Wẽnnaam tẽng zug ka. La marsã, m kotame tɩ y sak n deeg yãmb yamba kũuni.»

¹⁶A Elize leokame: «M wẽend ne Wẽnd ning m sẽn tũud a soabã, tɩ m kõn deeg ye.» Ne a Naama sẽn da pẽdgd-a t'a reegã, a pa sak ye.

¹⁷A Naama yeelame: «Sã n ya boto bɩ y kõ-m sore tɩ b yãk tẽnga tãndo n zɩlg bõn-wees a yiibu, m yĩnga, tɩ m ka na n le kʋ yũ-noog maoongo bɩ yamleoog maoong n kõ ned a to sã n ka Naaba-Wẽnd ye.

¹⁸M sẽn kot yaa Naaba-Wẽnd maan-m sugri tɩ m zu-soaba sã n kẽed a Rimõ doogẽ n na n pʋʋse b minim n tikda m kanga, tɩ ma me naagd bãmb n wõgemd a Rimõ roogẽ. Bɩ Naaba-Wẽnd kõ-m sugri manesem kãng yĩnga.»

¹⁹A Elize leok-a lame: «Bɩ f kẽng ne laafi!» La a kulame.

²⁰A Naama sẽn zãag bilfu, Wẽnnaam neda, a Elize sõgne, a Geazi yeela a sũurẽ: «Mam zu-soaba basa a Naama, Siri nedã, t'a loog n ka reeg bũmb ye; la m wẽend ne Wẽnd tɩ m na babs-a n tɩ paam bũmbu.»

²¹La a Geazi zoe n babsa a Naama. A Naama sẽn yãe t'a zoet n pʋgd a poore, a zĩnda a bilim-bilma pʋga n sig tao-tao n seg-a, n sok-a: «Yaa noogo?»

²²T'a leoke: «Noog bala! M zu-soabã n tʋm-m tɩ m wa yeel yã: ‹Kom-bɩɩb a yiib n yi Efrayim tãngã n wa mars-mars noogã; b yaa bãngdb karen-biisi; mam kotame tɩ y yãk wanzurf wakɩ koɛɛng a ye n kõ-ba, n paas fut a yiibu.› »

²³T'a Naama yeele: «Bɩ y sak n deeg wakɩ koeems a yi.» La a pẽdg-a lame t'a reeg, la a kɩtame tɩ b loe wanzurf wakɩ koeems a yi sẽn wã bõonego, yond a yi, n kɩs sõgen-kamb a yi, tɩ b tʋk n lʋɩ a Geazi taoore.

²⁴B sẽn ta Ofɛl, a reeg-b-la bãmb nusẽ n tɩ bĩng a yiri, la a kulsa sõgen-kamb a yi wã tɩ b looge.

²⁵La a Geazi yaool n bʋʋga a zu-soaba, a Elize, tɩ yẽ sok-a: «Geazi, f yita yɛ?» T'a leoke: «Yãmb sõgna pa kẽng ni ye.»

²⁶La a Elize yeel-a lame: «Ka vẽnegre n vẽneg-m tɩ m yãe ned sẽn yi a bilim-bilma n tiimd tẽng n zoe n seg fooma laa? La m sok n gese, yaa marsã, la fo na n deeg fu-neeba la ligdi, n da oliviye tɩɩse, bugsuntundu n paas piisi, niisi, yem-daado la yem-pogs bɩ?

²⁷Bãng t'a Naama bãaga na n yõka foom ne f yagens daar fãa.» A Geazi sẽn yi a Elize nengẽ, a lebga yĩng soaba n pelg wa goore.