Read SEBR SÕNGO, 1998 2NA-ROT 1 Bible Online

2NA-ROT 1 - SEBR SÕNGO, 1998 bible

2NA-ROT 1

¹A Daviid biig a Salomo naama waa n paama pãnga. Naaba-Wẽnde, a Wẽnnaama, da bee ne-a. B zẽka a naam n ta naam zĩigẽ.

²Dẽ la a tigim a Israyɛl gilli, tãnsoaben-dãmba sẽn da rɩt naam neb tusr bɩ neb koabg zugu, bʋ-kaoodba, kombɛɛmba, sags kãsem-dãmba gilli.

³B tigma taaba, bãmb ne a Salomo, n dʋ Gabaõ tãnga tɩ be la b ra bĩng Sɛka roogo, roog ninga a Moyiiz, Wẽnnaam neda, sẽn da kɩt tɩ b ti Wẽnd yĩng we-raoogẽ wã.

⁴[1†] Sã n ya Wẽnd zooda kasetã, a Daviid yaool n da yiis-a-la Kiriyat-Yearim n tɩ bao zĩig n bĩng-a Zerizalɛɛm, zãnd a to tẽngre.

⁵[2†] A Uri biiga la a Ur yagenga, a Besaleyɛl, da kuda zũud maan-kugri la b da rɩgl-a-la wẽnd dooga taoore. Ad-y yaa yẽ sɛɛgẽ la a Salomo tigim a zãma wã n na n waoog Naaba-Wẽnde.

⁶Yaa maan-kugr kãng zugu, la Soaala-Wẽnd taoore, la a Salomo kɩt tɩ b rʋʋ n kʋ yũ-noog maoong ne rũms tusri.

⁷Yʋng sẽn ta, Soaala-Wẽnd lika a Salomo n yeel-a: «F sẽn dat tɩ m kõ-f bũmb ning bɩ f kose.»

⁸T'a Salomo leoke: «Yãmb maana neer wʋsgo ne m ba a Daviid la y kõ-m-la naam a zaoorẽ.

⁹[3†] Soaala-Wẽnde, y pidsa kãabg ning y sẽn da kãab m ba a Daviid, tɩ marsã y kõ-m-la naam bu-yaleng zugu, buud neb sõor sẽn ta tẽnga bĩisri.

¹⁰Dẽ yĩnga kõ-y maam yam la bãngre, tɩ m tõog n zã m meng neere, y buuda taoore. Ãnda n tõe n zã bu-yalengo wa buud kãnga?»

¹¹Dẽ la Naaba-Wẽnd leok a Salomo: «Sẽn ya fo raabã, tɩ fo pa kos arzɛka, n pa kos sãnem, n pa kos ziiri, n pa kos f bɛɛba wãabo, n pa kos yõ-woko f meng yĩnga, f sẽn kos yam la bãngre n tõog n zã m sẽn kõ-f neb niynsã,

¹²ad yaa yam la bãngr zulunga la m na n kõ-fo. La m na n paasa f arzɛka, la f ziiri wala dĩm dãmba sẽn deng-b fooma bɩ sẽn na n wa-b fo poorẽ wã sẽn ka na n tõog n paam abada.»

¹³[4†] Dẽ poore, a Salomo zãaga ne sɛka roogo, a yii Gabaõ n leb Zerizalɛɛm. A dɩɩ naam Israyɛl.

¹⁴ [5†] A Salomo baoo bilim-bilm la wiidi. A bilim-bilm yɩɩ tusri la kobs-naase, a wed-dʋʋdba tus piig la a yi. A tɩ kẽesa kẽer tãnsoben-tẽnsẽ, n kẽes kẽer n pẽneg a meng Zerizalɛɛm.

¹⁵A Salomo yĩnga, Zerizalɛɛm pʋgẽ, wanzurf la sãnem yãeebo ra pa toog n yɩɩd kugr ye. Tɩ-bɛda me ra yaa wɛɛla wa yɩls, baoog noore.

¹⁶[6†] Yaa Musri la Koa [7] la a Salomo wiida ra yita. Yaa Koa la a Salomo neba ra kẽnd n daad-ba.

¹⁷B sã n lebg n watẽ, b tekd n da bilim-bilm Ezipt. Bilim-bilm a ye da raada wakɩ koeems kobs-yoobe, tɩ weef ya wakɩ koeems koabg la pis-nu. Ititsa la Aramsa dĩm dãmb fãa da raada b rẽnna a Salomo neba nengẽ.

¹⁸A Salomo waa n yeelame tɩ b me roog a ye Soaala-Wẽnd yĩnga la b me a meng na-yiri.