Read SEBR SÕNGO, 1998 2NA-ROT 11 Bible Online

2NA-ROT 11 - SEBR SÕNGO, 1998 bible

2NA-ROT 11

¹A Roboam sẽn ta Zerizalɛɛm, a tigma a Zɩɩda la a Bẽnzame roogo, bãmb tus koabg la pis-nii, tãb-biis sẽn mi zabre, n na n tɩ zab ne a Israyɛl, sẽn na yɩlẽ t'a leb a Roboam soolmẽ.

²Naaba-Wẽnd koɛɛg ta-la b neda, a Semaya. Koɛɛga yeelame:

³«Taas a Salomo biig a Roboam, taas a Zɩɩda dĩma la Israyɛl kamb sẽn be Zɩɩda la a Bẽnzame tẽn-peelmẽ,

⁴wilg-b tɩ Naaba-Wẽnd yet-b lame: ‹Da tak-y zabre ne y saam-biisa ye. Ned kam fãa leb a yiri, tɩ welgra yaa mam tʋʋmde.› » B kelga Soaala-Wẽnd koɛɛga, b lɛɛgame, b pa tɩ zab ne a Zeroboam ye.

⁵A Roboam tɩ kẽe Zerizalɛɛm, n me tãnsoben-tẽns Zɩɩda.

⁶A le maneg n me Bɛtelyɛɛm, Etam, Tekoa,

⁷Bɛt-Sur, Soko, Adulam,

⁸Gat, Maresa, Zɩf,

⁹Adorayim, Lakis, Azeka,

¹⁰Sorea, Ayalõ, Ebrõ. Bãmb la tãnsoben-tẽns sẽn da be Zɩɩda la Bẽnzame tẽn-peelmẽ.

¹¹A maneg n me-b lame n paas b pãng wʋsgo, n ning tãnsoab bɛda, n pag a dɩ-rɩtem, a kaam la a rãam be.

¹²Gãndo la kãn da be tẽn kãens fãa pʋsẽ. A paasa b pãnga. A waa n sɩd lebga Zɩɩda la Bẽnzame soaala.

¹³Maan-kʋʋdba la Levitsa sẽn da sẽeg Israyɛl tẽn-peelma yi b tẽnsẽ n wa kẽ dĩm a Roboam.

¹⁴Levitsa basa b wãbnega zĩisi la b buuda pʋto n wa Zɩɩda la Zerizalɛɛm. La rẽ yaa a Zeroboam ne a kamba sẽn yeel-b tɩ b kõn le paam maan-kʋʋr tʋʋmd n tʋma yĩnga.

¹⁵[36†] A Zeroboam da bao-la a toorẽ maan-kʋʋdba wẽn-naandsa waoogr yĩnga. Yaool n da yaa boees la nag-bi la b da rõogd ne zũudu, n boond rẽ tɩ b wẽnde, n kʋʋd maand b yĩnga.

¹⁶Sagsa toor-toor neba sẽn da be Israyɛl n yaool n ket n dat n waoogd Naaba-Wẽnd, a Israyɛl Wẽnnaam, tũ-b lame n wa Zerizalɛɛm n na n pʋg b yaab rãmb Wẽnde.

¹⁷Woto b paasa Zɩɩda rĩunga pãnga. B yalsa a Salomo biiga Roboam poorẽ, yʋʋm a tã, tɩ yaa yʋʋm a tã bala la a Roboam tũ a Daviid la a Salomo sẽn tũ sor ningã.

¹⁸A Roboam kẽe kãadem ne a Maalat. Yaa a Yerimot bi-pugla t'a Yerimot me yaa a Daviid bi-ribla. A ma, a Abiayil, da yaa a Eliab bi-pugla, la a Zese yagenga.

¹⁹Ad-a sẽn dog kamb niynsi: a Yewus, a Semariya, a Zaam.

²⁰Dẽ poore a kẽe kãadem ne a Maaka, a Absalom biiga n dog a kamba, a Atayi, a Ziza la a Selomit.

²¹A Roboam waa n nonga a Absalom biig, a Maaka, n yɩɩd a pagb a taabã la pʋg lemsã. A pagb ra yaa bãmb piig la a nii, tɩ pʋg lemsa ya pisoobe. A roga kom-dibli pisi la a nii, a doga kom-pugli pisoobe.

²²A Maaka biig a Abiya la a kõ kãsengo, a lʋɩs-a-la a ba-biisa taoore, n dat t'a wa lebg dĩma.

²³A ra tʋllame n sẽeg a kamba Zɩɩda la Bẽnzame tẽn-peelma fãa, tãnsoben-tẽnsa fãa. A sõng-b-la ne kood la ligdi, n sõng-b ne pagb ka tɛka.