Read SEBR SÕNGO, 1998 2NA-ROT 15 Bible Online

2NA-ROT 15 - SEBR SÕNGO, 1998 bible

2NA-ROT 15

¹Soaala-Wẽnd vẽnega a Odɛd biig a Azariya.

²A yɩ n sega a Asa n yeel: «Asa, la yãmb fãa Zɩɩda la Bẽnzame rãmba, kelg-y! Yãmb sã n pa ne Naaba-Wẽnde, bãmb me paada ne yãmba. Yãmb sã n gẽesd-ba, b basdame tɩ b yãend-ba. Yãmb sã n zãag ne-ba, bãmb me zãagda ne yãmba.

³A Israyɛl kaoosame n ka le tar Wẽnd sɩda, n ka le tar maan-kʋʋd sẽn na n zãms-a, wilg noorã, n ka le tar noora ye.

⁴La a pɛta pʋgẽ, a lɛɛg n wa kẽe Naaba-Wẽnd. B bao-b lame, la b basame tɩ b yãend-ba.

⁵Sasa kãnga, tɩ ned ba a ye ka zĩ n pa yɩɩdẽ, tɩ pa gomd a sã n togd sore. Sẽn lebẽ fãa yaa yɛɛsgo la rabeem.

⁶Rĩung ra yikda zabr ne a to, tɩ tẽng yik ne a yaka. Naaba-Wẽnd da gãneg-b-la yɩɩr pʋgẽ.

⁷Sã n ya yãmba, keng-y y sũuri, la y da bas raood ye tɩ y tʋʋma na n paama b rolbo.»

⁸A Asa wʋma bãngda goama, n yeel t'a na n yiisa wẽn-naandsa sẽn da be Zɩɩda ne Bẽnzame tẽn-peelmẽ la tẽnsã sẽn be Efrayim tãnga zugu, a sẽn da pãb n deese. A le manega maan-kugrã sẽn da rɩg wẽnd dooga zãonga noore.

⁹A kɩtame tɩ Zɩɩda ne Bẽnzame tigim taaba, n paas sẽn da yi-b Efrayim, Manase la Simeõ tẽn-peelmẽ tɩ bãmb wʋsg da zoe n kẽ-la a Asa, b sẽn yãend tɩ Naaba-Wẽnd da pʋgda a poore.

¹⁰A Asa naama yʋʋmd piig la a nu soaba, kiuug a tãab soaba, Sivã kiuugu, b fãa waa n tigma Zerizalɛɛm.

¹¹Baraare b yãka b sẽn tɩ paam zabra weoogẽ n kʋ maand Naaba-Wẽnd yĩnga, niis kobs-yopoe la rũms bõones tus a yopoe.

¹²B wẽename tɩ b na n baoo Naaba-Wẽnde, b ba-rãmb Wẽnde, ne b sũur fãa, ne b pãng fãa.

¹³Ned ninga sẽn ka na n bao Naaba-Wẽnd, a Israyɛl Wẽnde, b na n kʋ-a lame, a ya nin-kãseng bɩ nin-bila, pag bɩ raoa.

¹⁴B kãaba Naaba-Wẽnd ne bʋ-raase, tɩ tõntõod la bard peebdẽ.

¹⁵Zɩɩda rãmba fãa sũur yɩɩ noogo ne b kãabgã, tɩ ya bũmb sẽn sɩd yi sũurẽ. B bao Naaba-Wẽnd yamleoogo. La rẽ yĩnga, Naaba-Wẽnd me basame tɩ b yãend-ba la b kõ-b-la laafi ne b yagsa fãa.

¹⁶Dĩm a Asa ma menga, a Maaka, ka le bool tɩ naab ma ye, tɩ yẽ ra kɩtame tɩ b pees wẽn-poak a Asera nin-naande. A Asa luba a yel-yaalgã, n to-a n bõgse, n yõog a bugum Sedrõ.

¹⁷A sãama waoogra zĩis fãa. A Asa yaool n yɩɩ pʋ-peelem soaba a vɩɩma fãa pugẽ.

¹⁸A bĩnga wẽnd dooga pʋga, a ba kũum sõma, a meng kũuni, wanzurfu, sãnem la lagd wʋsgo.

¹⁹Zabr ka le zĩnd n tãag a Asa naam yʋʋmd pis-tã la a nu soab ye.