Read SEBR SÕNGO, 1998 2NA-ROT 20 Bible Online

2NA-ROT 20 - SEBR SÕNGO, 1998 bible

2NA-ROT 20

¹Dẽ sẽn looge, Moabitsã la Amonitsã, ne Maonitsã waa n yika zabre ne a Zozafat.

²B waa n togsa a Zozafat woto: «Zãma ka tɛk n yi mogra rʋʋnde la Edom, n wat n na n tak zabre ne foo. Marsã b taa Asasõ-Tamar, dat n yeelame tɩ En-Gedi.»

³Rabeem yõka a Zozafat t'a na n yõk Naaba-Wẽnd sɛɛga. A yiisa a koɛɛga, a yeela Zɩɩda tõre tɩ b loe noore.

⁴Zɩɩda rãmb fãa tigma taab n na n yõk Naaba-Wẽnd sɛɛga. Tẽng fãa sẽn be Zɩɩda yiisa a neb tɩ b wa Zerizalɛɛm.

⁵B sẽn waa n naag Zerizalɛɛm dãmbã, a Zozafat yaasa yɩng zãong paalga taoore,

⁶n yeele: «Naaba-Wẽnd, d yaab rãmb Wẽnde, ka yãmb n so bʋ-zẽmba fãa rĩunda bɩ? Pãng la tõog be-la y nugẽ. Ned ka be n kolg yãmb ye.

⁷[39†] Ka yãmb la tõnd Wẽnd bɩ, ka yãmb n dig a Israyɛl taoore tẽn-kãnga pipi soaalba bɩ? Yãmb pa rɩk-a n kõ y sẽn nong b rãmba, a Abraam yagens bɩ?

⁸B kẽe tẽn-kãnga, n me roogo y yʋʋr yĩnga, la b yetẽ:

⁹‹Yell sa n pak do, zabre, sɩbgre, bã-longdem, kom, d na wa y taoore la y rooga taoore, tɩ y zĩndga y meng a pʋgẽ. D yɩɩra pʋga d na tees-y n kelem, y na wʋme la y na fãag-do.›

¹⁰[40†] Ges-y Amonitsã, Moabitsã, Seyir tãng zug rãmbã. Yãmb ka bas t'a Israyɛl sãam-ba, a sẽn wa n yi Ezipt n watẽ ye. A lakame n bas-ba, n ka sɩɩs-b ye.

¹¹Ges-y b sẽn don b sõm to-to, n wat n na n yiis tõnd y sẽn kõ-d soolem ninga pʋgẽ.

¹²Soaala, y ka na n kao d bʋʋdo n fãagd-d nin-bãmba sẽn ka be tɛka nugẽ, tɩ b waa n na n zaba ne-do? Tõnd ka mi d sẽn na n maneg ye. Woto wã yãmb bal la d geta.»

¹³Zɩɩda neba fãa, b pagb la b kom-bõones ra yɛsa Soaala-Wẽnd taoore.

¹⁴Soaala-Wẽnd vẽnega a Yaaziyɛl, a Zakari biiga la a Benaya yagenga. A Benaya ba la a Yeyiyɛl, a Yeyiyɛl ba la a Mataniya, Levitga la a Asaf biiga.

¹⁵[41†] A tãsame: «Kelg yã, yãmb fãa Zɩɩda la Zerizalɛɛm dãmba, la yãmba, dĩm a Zozafat, ad Soaala-Wẽnd koɛɛga: ‹Da zoe-y rabeem ye, da yɛɛs-y zãma kãsenga taoor ye. Ka yãmb n so zabra ye, yaa Naaba-Wẽnde.

¹⁶Beoog bɩ y sig n seg y bɛɛbã. Yaa puuda kunkubra sor la b rɩk yã. Y na seg-b sudga noorẽ, Yeruwɛl weoogẽ.

¹⁷[42†] Ka zabr la y na n zab ye. Yals-y bala, tong-y bala la y na yãend fãagr ning Soaala-Wẽnd sẽn segl Zɩɩda la Zerizalɛɛm yĩnga. Da zoe-y rabeem ye. Da yɛɛs-y ye, yi-y beoogo n seg-ba, tɩ Soaala-Wẽnd na zĩnd ne yã.› »

¹⁸A Zozafat wõgemdame n kɩ a neng tẽnga. Zɩɩda la Zerizalɛɛm dãmba me wõgemdame n waoog Naaba-Wẽnde.

¹⁹Levitsa, a Keyat la a Kore yagense, sɩnga Soaala-Wẽnd pẽgre ne b koees pãng tɛka.

²⁰B sãda beoogo n dɩk Tekoa we-raooga sore. B sẽn waa n looda, a Zozafat yaasa yĩngr n yeele: «Kelg-y-ma, Zɩɩda la Zerizalɛɛm dãmba. Da yi-y Naaba-Wẽnd poorẽ tɩ y na tilge. Tẽ-y bãngdba sẽn togsã tɩ y yɛl na baas neere.»

²¹A reng n yẽsa ne zãma wã, la tãb-biisa taoore, a lʋɩɩsa Naaba-Wẽnd yɩɩn-yɩɩndba sẽn da yeelg b tʋʋmda fu-sõma n tar b pẽgre. B ra yetame: «Pẽg-y Naaba-Wẽnd, tɩ b nonglma ka be sɛɛb ye.»

²²B sẽn waa n pʋt b pẽgr la b sũ-noog yɩɩla, Wẽnd lobga sẽeg-taab yam, Amonitsã, Moabitsã la Seyir tãnga zug rãmba.

²³Amonitsã la Moabitsã yika zabre ne Edomitsa, Seyir tãnga zug rãmbã, la b kʋ-b-la zãnga n pa tol n kees ned ye. Amonitsa la Moabitsa me lɛɛg n kẽe taaba n kʋ taaba.

²⁴B sẽn ta we-raoog noore t'a Zozafat dʋ kunkubr n na n gese, ad-a sẽn yãende: yaa sẽn ki n dɩg bala. B pa yãe sẽn põs ye.

²⁵A Zozafat waa ne a nebã n zɛ-ba. B yãee rũms ka tɛka, lagdo, futu, la sãnem teedo. B waa n wʋkame tɩ yaa n loog b zɩɩbo. Te-zɛɛdma sẽn da labs yĩngã, dasem a tã tõre la b zõond ne b wʋkre. Ne rẽ fãa b pa tõog n sɛ ye.

²⁶Daar a naas soaba, b tigma taab Beraka bãg-faagẽ. B pẽga Soaala-Wẽnd be, b pʋʋs-b-la barka la yaa rẽ yĩng la b boond zĩiga tɩ pẽgr la bark puusg zĩiga, n ta ne rũnna.

²⁷Zɩɩda ne Bẽnzame neba lɛɛga ne sũ-noogo n wa Zerizalɛɛm. A Zozafat da kẽnda b taoore. Wẽnd deega b bɛɛba sũ-noogo n kõ bãmba.

²⁸B sẽn ta Zerizalɛɛm, b kẽe wẽnd doogẽ wã tɩ kola wẽedẽ, tɩ ruuds wãagdẽ, tɩ tõntõod peebdẽ.

²⁹Dabeem kãseng yõka tẽnsa fãa b sẽn waa n wʋm tɩ Naaba-Wẽnd meng b toore n da tak zabre ne a Israyɛl bɛɛbã.

³⁰A Zozafat rɩɩ a naam ne bãane. Wẽnd kõ-a-la laafi ne a yagse.

³¹A Zazafat dɩɩ naam Zɩɩda. A ra tara yʋʋm pis-tã la a nu a sẽn waa n lebg dĩma, la a rɩɩ a naama yʋʋm pisi la a nu Zerizalɛɛm. A ma la a Azuba, a Sili biiga.

³²A tũ-la a ba, a Asa, vɩɩm n ka bʋdg ye, n maand sẽn ya neere Naaba-Wẽnd nifẽ.

³³Wẽn-naandsa ka wã zãng ye, woto zãma wã sũur ka tõog n kẽ b ba rãmb Wẽnda zãng ye.

³⁴A Zozafat vɩɩma, a sɩngre n ta a baasgo, fãa gʋlsa a Anani biig a Yewu tʋʋma sebrẽ, seb kãng pʋgẽ la b gʋls Israyɛl dĩm dãmba kibare.

³⁵A Zozafat waa n yik n tɩ yõga zoodo ne Israyɛl dĩm a Akaziyas, la yẽ n tus-a t'a maan wẽnga.

³⁶A naag-a lame n maan koom-kogend sẽn na n tʋgd Tarsis. Yaa Esiõ-Gebɛr la b maan-ba.

³⁷Maresa dao a Dodava biig a Eliezɛr, yiisa bãngr goam beed a Zozafat poorẽ. «Fo sẽn tɩ yõg zood ne a Akaziyas yĩngã, Naaba-Wẽnd wurga f tʋʋm sõma wã lalga.» Kogenda fãa wãame, b pa tõog n loog Tarsis ye.