Read SEBR SÕNGO, 1998 2NA-ROT 21 Bible Online

2NA-ROT 21 - SEBR SÕNGO, 1998 bible

2NA-ROT 21

¹A Zozafat kiime. B mum-a-la a saamb a Daviid na-tẽngẽ. A biig a Zoram n led-a a zaoorẽ.

²A Zoram yaopa, dĩm a Zozafat kamba, yɩ-la a Azariya, a Yeyiyɛl, a Zakari, a Azariya, a Mikayɛl, la a Sefatiya.

³B ba a Zozafat ra kõ-b-la ligd naoor yaka, n kõ-b sãnem, wanzurfu, fan teedo, tãnsoben-tẽns sẽn be Zɩɩda tẽn-peelmẽ; naama la a bas n kõ a Zoram, tɩ yẽ la kãsma.

⁴A Zoram deega naama, la a naama sẽn waa n paam pãnga, a kooda a yaopa fãa ne Israyɛl taoor dãmb kẽere.

⁵A sẽn waa n na n dʋ zaoorã t'a tara yʋʋm pis-tã la a yiibu. A rɩɩ naam yʋʋm a nii Zerizalɛɛm.

⁶A togsa Israyɛl dĩm dãmba vɩɩm. A maana waa a Akab, t'a ra yii kãadem ne a Akab bi-pugla. A maana sẽn ka ta Soaala-Wẽnd yam.

⁷[43†] Baasgo Naaba-Wẽnd ka tʋlg n wãa a Daviid doogo, tɩ b ra yõga zood ne a Daviid, la b ra kãab-a lame tɩ wakat buud fãa fitil na widgi, yẽ yĩnga la a kamb yĩnga.

⁸ [44†] Yaa yẽ zãmaanẽ la Edom yi a Zɩɩda soolmẽ; a bao dĩm n kõ a menga.

⁹A Zoram gãndga a Edom toaaga ne a tãnsoaben-dãmba la a bilim-bilm gilli. A yika ne yʋngo, n pãb Edom tãb-biisa sẽn da gũbg-a. A tõoga bilim-bilma tãnsoaben-dãmba.

¹⁰Dẽ tɛka Edomitsa fʋsg yi-la a Zɩɩda soolmẽ, n ta ne rũnna. Yaa wakat kãng me la Libna fʋsg n yi a soolmẽ. La rẽ yaa a Zoram sẽn da bas Naaba-Wẽnd, a ba-rãmb Wẽnde.

¹¹Yẽ n wa ne wẽn-naandsa waoogre Zɩɩda tẽn-peelmẽ. Yẽ n kɩt tɩ Zerizalɛɛm la Zɩɩda rãmb wɩɩbe.

¹²Bãngd a Eli waa n tool-a-la sebr a ye. Sebra ra yetame: «Ad Naaba-Wẽnd, f ba a Daviid Wẽnda koɛɛga: Fo sẽn pa tũ f ba a Zozafat la Zɩɩda dĩm a Asa nao,

¹³n yaool n tũ Israyɛl dĩm dãmba, f sẽn kɩt t'a Zɩɩda la Zerizalɛɛm dãmba wɩɩbe, wala a Akab roogo, f sẽn kʋ f yaopa, f ba-biisã sẽn da são fooma,

¹⁴rẽ fãa yĩnga, Naaba-Wẽnd na n sɩbg-f-la ne sɩbgr kãsenga,

¹⁵foo ne f nebã, f kamba, f pagba, f sẽn tar fãa. Fo meng na n bẽe bã-toose, na n yɩɩ pʋg roog bãaga la f na wʋba f yãada zãnga.»

¹⁶Soaala-Wẽnd tusa Filisti rãmba, Arabsã, Nubi rãmbã tɩ b maan zabre ne a Zoram.

¹⁷B waa n wẽe Zɩɩda, n tõog-a, n wʋk dĩma zak teedo ne a kamba, la a pagba. A kamba yao-zʋʋg bala, a Akaziyas, n põse.

¹⁸Dẽ sẽn looge, Naaba-Wẽnd lob-a-la pʋg-roog bãag sẽn ka tɩɩm ye.

¹⁹Bãaga kaoosa sẽn yɩɩd yʋʋmde. Sẽn maan yʋʋm a yi, a wakat sẽn ta, a wʋba a yãadã, n nams wʋsgo, n ki. B pa yõog tɩdar a yĩng wala b sẽn maan a ba wã kaalmẽ ye.

²⁰A Zoram sẽn waa n na n dʋ zaoore t'a yʋʋm yaa pistã la a yiibu; a rɩɩ naam yʋʋm a nii Zerizalɛɛm. A loogame tɩ ned ba a ye ka yãb-a ye. B mum-a-la a Daviid na-tẽngẽ la pa yɩ dĩm dãmba yaadẽ ye.