Read SEBR SÕNGO, 1998 2NA-ROT 28 Bible Online

2NA-ROT 28 - SEBR SÕNGO, 1998 bible

2NA-ROT 28

¹A Akaz sẽn waa n na n dʋ zaoora t'a tara yʋʋm pisi. A rɩɩ naam yʋʋm piig la a yoob Zerizalɛɛm. A ka maan sẽn ta Soaala-Wẽnd yam wa a yaab a Daviid ye.

²Yaa Israyɛl dĩm dãmba vɩɩm la a togs yã. A tol n kɩtame tɩ b rõog Baal dãmba.

³A yõoga wisdu b yĩnga, Inom bãg-faagẽ. A yõoga a kamb bugum, wala bu-zẽmb niyns Naaba-Wẽnd sẽn dig n zãag a Israyɛl taoorã sẽn da maande.

⁴A kʋʋ maando, a yõoga wisd tãmsa zutu, kunkuba zutu la tɩɩs sẽn tar maasem tẽngre.

⁵Naaba-Wẽnd, a Wẽnnaam, dɩk-a lame n sagl Aramsa nugẽ. B yõga neb wʋsgo n tall n kẽng yembd Damas tẽnga. Soaala-Wẽnd bas-a-la Israyɛl dĩma me nugẽ. A konga raood zabrẽ.

⁶[51†] A Remaliya biig a Peka kʋʋ Zɩɩda rãmb neb tus koabg la pisi raar a ye. Fãa ra yaa zab-mitba la b sẽn pa zabrẽ wã yaa b sẽn lak ne Naaba-Wẽnd, b ba rãmb Wẽnde.

⁷Efrayim gãndaoog a ye, a Zikri, kʋʋ na-biig a Maaseya, n paas samand naab a Azrikam, la dĩma komber, a Elkana.

⁸B yõga Zɩɩda neb tus kobs-yi, pagba, rapa, kom-pugli, kom-dibli. A loga ne teed zembal Samari.

⁹Bãngd a ye n da be n boond t'a Odɛd. A yi n sega tãb-biisa Samari noorẽ n yeel-ba: «Ade, Naaba-Wẽnd, yãmb Wẽnnaam, sagla Zɩɩda rãmb y nugẽ, b sũur sẽn puug ne b yĩnga. Yãmb sẽn kʋ-b kʋʋb ninga, saaga meng reeg n wiisdame.

¹⁰Y gomdame tɩ y na n dɩka Zɩɩda kamba n maan y sõgen-kamba. Woto wã ka yãmb meng n dogl yell y zugu Soaala-Wẽnd taoore?

¹¹Kelg-y m koɛɛga, bas-y y saam-biisã tɩ b soog b mense, tɩ Soaala-Wẽnd sũur da yik ne y ye.»

¹²Efrayim kãsem-dãmba kẽer sɩd yika ne sẽn kẽng-b zabr n lɛɛg n watẽ wã. Yaa a Zoana biig a Azariya, a Mesilemot biig a Berekiya, a Salum biig a Yeyizkiya la a Adlayi biig a Amasa.

¹³B yeelame: «Da wa-y ne y sẽn yõg b rãmba ka ye, ka rẽ d na n beega Naaba-Wẽnde. Y datame n paas d yel-wẽna la d samde sẽn zoe n ya wʋsgo, n takd Naaba-Wẽnd sũ-puur, a Israyɛl zugu.»

¹⁴Tãpa rãmb basa fãa kãsem-dãmba la zãma wa taoore.

¹⁵B yãka neb tɩ b na n bels b sẽn yõg b rãmbã. B baoo fut n yeelg sẽn da ka tar-b fuugu; b pʋɩ-b-la futu, neooda, dɩɩbo, koom, la roogo. B zombga bõeens zutu sẽn da pogl-bã la b talla b fãa n wa lebs Zeriko, koms tẽnga; b le lɛɛg n dɩka Samari sore.

¹⁶Yaa wakat kãng la a Akaz tool Asiri naab nengẽ t'a wa sõng-a.

¹⁷Edomitsa le wa kẽe Zɩɩda. B tõog-a lame, la b wʋka b neb n looge.

¹⁸Filisti rãmba sẽegame n pid tãmsa zut la tãmsa sees tẽnsã, la Zɩɩda Negɛb. B pãbame n deeg Bɛt-Semɛs, Ayalõ, Gederot, Soko, ne a tẽn-kogse, Timna ne a tẽn-kogse, Gimzo ne a tẽn-kogse la b kẽe be n zĩndi.

¹⁹Naaba-Wẽnd kɩtame t'a Zɩɩda rɩ bõne, Israyɛl dĩm a Akaz yĩnga. A basa Zɩɩda t'a maan a raabo la yẽ meng laka ne Wẽnde.

²⁰A Teglat-Falasar, Asiri dĩma, zãgsa a wa sõng-a, n wa gũbg-a a tẽngẽ n pãb-a n tõog.

²¹A Akaz kong n yãka Soaala-Wẽnd arzɛka, ne dĩma la na-komsa rẽnna n tool Asiri dĩma, la pa zĩnd yõod ye.

²²Tẽnga sẽn waa n wẽe n gũbgã, dĩm a Akaz maneg n laka ne Soaala-Wẽnd n paase.

²³Damas wẽn-naandsa sẽn da tõog yẽnda wã, a baas n kʋʋ maand b yĩnga. Ad-a sẽn yeel a menga: «Aramsa dĩm dãmb tara wẽn-naands sẽn sõngd-ba, woto wã m na kʋ-b maando tɩ daare b na sõng-ma.» Mik yaa bãmb n na n wa ne a meng wãabo la Israyɛl gill wãabo.

²⁴A Akaz tigsa wẽnd dooga teed kẽere, n wã-ba, n pag Soaala rooga kʋɩlensã, n sa n ning maan-kug Zerizalɛɛm pʋga.

²⁵Tẽng fãa pʋgẽ a yãka zĩiga n na n yõog wisd wẽn-naandsa yĩnga, n puug Naaba-Wẽnd, a ba-rãmb Wẽnda sũuri.

²⁶A vɩɩma kibare, a sɩngre n taa a baasgo, a manesem ne dĩm dãmb a taaba, fãa gʋlsa Zɩɩda la Israyɛl dĩm dãmba sebrẽ.

²⁷[52†] A Akaz kiime tɩ mum-a Zerizalɛɛm, Israyɛl dĩm dãmba yaadẽ. A biig a Ezekiyas n led-a a zaoorẽ.