Read SEBR SÕNGO, 1998 2NA-ROT 36 Bible Online

2NA-ROT 36 - SEBR SÕNGO, 1998 bible

2NA-ROT 36

¹A Zoziyas biig a Zoakaz lebg dĩma; b yuga a naama Zerizalɛɛm na-tẽnga.

²A Zoakaz sẽn waa n na n dʋ zaoor t'a tara yʋʋm pisi la a tã. A dɩɩ naam kiis a tã Zerizalɛɛm.

³Ezipt dĩma wa n yiis-a-la Zerizalɛɛm, la a kɩtame tɩ tẽnga rãmb yao wanzurf sẽn ta neb koabg la pis-nu zɩɩbo la b yao sãnem sẽn ta neb piig la a nu zɩɩbo.

⁴[67†] A Zoakaz ba-biiga a Eliakim la a kõ Zɩɩda naam. A teka a yʋʋrã tɩ lebg Zoakim. Ezipt dĩm a Neko talla a Zoakaz n kẽng Ezipt.

⁵ [68†] A Zoyakim sẽn waa n na n dʋ zaoor t'a tara yʋʋm pisi la a nu. A rɩɩ naam yʋʋm piig la a ye Zerizalɛɛm. A maana ka ta Naaba-Wẽnd, a Wẽnnaama, yam ba bilfu.

⁶[69†] Babilon dĩm, a Nabikodonozor zaba ne-a n yõk-a n balg bãense n tall-a n loog Babilon.

⁷A looga ne wẽnd dooga teed kẽer me n tɩ bĩng a na-yir, Babilon.

⁸A Zoyakim kibare, a sẽn lak ne Naaba-Wẽndã, a sẽn maan tɩ neba fãa mii, fãa gʋlsa Zɩɩda la Israyɛl dĩm dãmb sebrẽ. A biig a Zoakẽ n led-a zaoorẽ.

⁹A Zoakẽ da tara yʋʋm a nii a sẽn waa n dʋ zaoore la a dɩɩ naam Zerizalɛɛm kiis a tã la la rasem piiga. A maana sẽn ka ta Soaala-Wẽnd yam.

¹⁰[70†] Yʋʋmd sẽn vẽke, dĩm a Nabikodonozor toolame tɩ b tɩ wa ne-a. A tall-a lame n kẽng Babilon ne wẽnd dooga teedo, n yaool n lebs a ba-biig a Sedesiyas a zaoorẽ, Zerizalɛɛm.

¹¹ [71†] A Sedesiyas da tara yʋʋm pisi la a ye a sẽn waa n dʋ zaoore la a dɩɩ naam yʋʋm piig la a ye Zerizalɛɛm.

¹²A ka maan sẽn ta Naaba-Wẽnd, a Wẽnnaam, yam ye. A ka reeg a kongre bãngd a Zeremi taoor ye. Soaala-Wẽnd n yaool n da tʋm a Zeremi a nengẽ.

¹³[72†] A zẽka a zug ne dĩm a Nabikodonozor; a yaool n da kãaba Naaba-Wẽnd taoore t'a na n tũu bãmba. A Sedesiyas naka a kãare, n kidb a sũuri, a ka lɛɛg n pʋg Naaba-Wẽnd a Israyɛl Wẽnnaam ye.

¹⁴Sẽn paas wẽnema, ad-y maan-kʋʋdba taoor dãmba, ne kãsem dãmb a taabã ka vʋʋs ne b tʋʋm yooda ye, b maan bu-zẽmba wɩɩbda gilli, n dẽgem doog ninga sẽn da me Zerizalɛɛm Soaala-Wẽnd yĩngã.

¹⁵Naaba-Wẽnd, b yaab rãmb Wẽnnaama, tʋma bãngdb ka tɛka, la naoor yaka, n yeel-b tɩ b maan gũusgu. La rẽ yaa b sẽn da zoet b buuda nimbãanega la b ra pa rat b rooga sãoongã.

¹⁶B laa bãngdbã, b sãbsa b goama, al tɩ Naaba-Wẽnd sũur wa puug ne-ba, la b sũ-puura ka le yãend tɩɩm ye.

¹⁷[73†] Dẽ me la b kɩt yã tɩ Babilon dĩma kood b kom-bɩɩba, b wẽnd dooga pʋga, n ka kees bi-ribla, bi-pugla, bɩ nin-kẽem zug sẽn pelg ye. Soaala-Wẽnd bas-b-la fãa Babilon dĩma nugẽ.

¹⁸Wẽnd dooga teed fãa, te-bɛd la te-bõonese, wẽnd dooga laogo, dĩma arzɛka, nin-bɛda rẽnna, a looga ne fãa Babilon.

¹⁹B yõoga wẽnd doogã, n tus Zerizalɛɛm lal-gũbrã n lubi, b yõoga dĩma zak la a roto, la a sẽn da tar fãa tɩ ya yõodo.

²⁰Sʋʋga sẽn ka kʋ b rãmba, a Nabikodonozor wʋk-b lame n kẽng yembd Babilon. B paa be n tʋm dĩma ne a kamb yĩnga, n ta Pɛrs rãmb sẽn wa n vigl b rĩungu Babilon.

²¹[74†] Woto taasa Soaala-Wẽnd sẽn da yeel ne bãngd a Zeremi noore: «Tẽnga na n yaoo vʋʋsga raar sama, a me na vʋʋs ne wombo, yella sẽn na n lʋɩ a zugu tɛka, tɩ yʋʋm wa pid pisopoe.»

²²Pɛrs dãmb dĩm, a Sirus, pipi yʋʋmde, sẽn na n yɩlẽ n pids koɛɛg ning b sẽn yiis ne a Zeremi noore, Naaba-Wẽnd kõ-la a Sirus yam sõngo, t'a kɩt tɩ b moon la b gʋls n yaglge, a soolma fãa pʋgẽ.

²³[75†] Ad-a Sirus, Pɛrs dãmb dĩma koɛɛga: «Naaba-Wẽnd, yĩngr Wẽnnaam dɩka dũni wã rĩunda fãa n sagl m nugẽ. Bãmb n yeel maam tɩ m me roog n kõ-b Zerizalɛɛm. Ned ning fãa sẽn yaa b buuda ned, bɩ Wẽnd zĩnd ne-a la a rɩk Zerizalɛɛm sore!»